ගැහැනු චරිත මුල්කරගෙන චිත්රපට හදන ප්රවීණ සම්මානනීය අධ්යක්ෂිකා ආචාර්ය සුමිත්රා පීරිස් හදපු ‘ගැහැනු ළමයි’ ෆිල්ම් එකෙන් තමයි මේ ලස්සන පින්තූරය කොපි කරගත්තේ. ගැහැනු ළමයි කියන්නේ විචාරක පැසසුමට ලක්වෙච්ච බොක්ස් ඔෆිස් වාර්තා තියපු ෆිල්ම් එකක්. ඒක හෝල්වලට ආවේ 1978 අවුරුද්දේ. ඒ වෙනකොට ප්රවීණ නළු අජිත් ජිනදාසගේ දැලි රැවුල යන්තමට එන්න ගත්තා විතරයි. ඒ තරමට ගැටවර වයසකයි ඔහු හිටියේ. සම්මානනීය ජනප්රිය නිළි වසන්ති චතුරාණි හිටියේ ඕලෙවල් කරන ගමනුයි. (Sri Lanka Latest News)
‘ගැහැනු ළමයි’ එකේ ප්රධාන ගැහැනු ළමයාගේ චරිතයට හරියන බාලිකාවක් හොය හොයා අධ්යක්ෂිකා සුමිත්රා පීරිස් ලංකාවේ හුඟක් ඉස්කෝලවලට ගියාලු. ගමේ වගේම නගරයේ ඉස්කෝලවලටත් ගියාලු. අන්තිමට ඔන්න ගම්පහ හෝලි ක්රොස් එකටත් ආවලු. කොන්වන්ට් එක පුරාම ආරංචිය යනකොට සුමිත්රා පීරිස් තමාගේ හිතේ මැවුණු කුසුම්ව හොයාගෙන ඕලෙවල්, ඒලෙවල් පන්තිවල කෙල්ලන්ව විසිටර් රූම් එකට ගෙන්නුවලු. ඒ විදියට එතැනට ආවේ කුසුම්ගේ චරිතය තමන්ට ලැබෙයි කියන ආසාව බලාපොරොත්තුව හිතේ ඉපදුණු බාලිකාවන් තමයි. ගම්පහ හෝලි ක්රොස් කොන්වන්ට් එකේ මොන තරම් ලස්සන ළමයි හිටියත් ඒ ආව එක කෙල්ලෙක්වත් ඇගේ හිතට හරිගියේ නැහැ. ඩිසපොයින්ටඩ් හැඟීමකින් සුමිත්රා පීරිස් ආයෙම එන්න හැරුණා. ක්රීඩා පිට්ටනිය හරහා එනකොට ඉද්ද ගැහුවා වගේ ඈ නතර වුණේ මාර ගහක් යටට වෙලා කෙල්ලෝ රෑනක් එක්ක කච කචේ දාගෙන හිටපු බෝල මූණක් එක්ක රැලි කොණ්ඩයක් තියෙන ලස්සන හුරුබුහුටි කෙල්ලක්ව දැකලයි. ‘හිතේ මැහුණු නියම කුසුම්… හිතුවටත් වඩා හොඳට මෙන්න ඉන්නවා…’ සුමිත්රාට හිතුණේ එහෙමයි. ඒ බෝල මූණ අයිති කෙල්ලගේ නම වසන්තා ඩොරීන් පීටර්සන්. ඒ කියන්නේ ඒ තමයි අපේ වසන්ති චතුරාණි.
‘ඔයාට මේ නම හරියන්නේ නැහැ. අපි සිනමා කලාවට හරියන නමක් දාමු’ කියලා වසන්තා ඩොරීන් පීටර්සන්ව වසන්ති චතුරාණි කෙරෙව්වෙත් සුමිත්රා පීරිස් මහත්මියම තමයි. ගැටවර වයසේ හිටපු අජිත් ජිනදාසවත් යොවුන් නිළි කෙල්ලන් වූ ශ්යාමා ආනන්ද සහ ජෙනිටා සමරවීරත් සෙසු චරිත සඳහා තෝරාගත්තා. චිත්රා වාකිෂ්ට සමග ටි්රලීෂියා ගුණවර්ධන අම්මාවරුන් ලෙස අතිවිශිෂ්ට රංගනයක යෙදුණා. ප්රවීණ ගත්කරු කරුණාසේන ජයලත්ගේ කෘතියක් ඇසුරෙන් ‘ගැහැනු ළමයි’ තිර නාටකය ලිව්වේ සුමිත්රා පීරිස්මයි. ඇගේ මේ සොඳුරු නිර්මාණකරණයට නිෂ්පාදන සහාය දුන්නේ සම්මානීය නිර්මාණකරු ආචාර්ය ලෙස්ටර් ජේම්ස් පීරිස්. සංගීතය ප්රවීණ සම්මානනීය සංගීතඥ නිමල් මෙන්ඩිස්ගෙන්.
අලුත් කතා රසයක් එක්ක සංවේදී පෙම් පුවතක් විදියට ගැහැනු ළමයි සැලෝලයිට් පටවල එතෙනකොට ප්රේක්ෂකයන් එය ආදරයෙන් වැලඳ ගත්තා. සුමිත්රා පීරිස් ගැහැනු ළමයි හැදුවේ සම්භාව්ය චිත්රපට කලාව වෙනුවෙන් වුණත් ‘ගැහැනු ළමයි’ වාණිජ පැත්තෙන්ද නොහිතපු විදියට සාර්ථක වුණා. විශාරද නීලා වික්රමසිංහගේ ළයාන්විත මුවින් ගැහුණු ‘වියෝ ගී ගැයෙනා හදේ’ සින්දුව අදටත් මොන තරම් ෆේමස්ද? එතකොට විශාරද වික්ටර් රත්නායක ගැයූ ‘ගැහැනු ළමයිනේ’ සින්දුවත් ඒ තරමටම ජනප්රියයි.
කුසුම්ගෙයි නිමල්ගෙයි ආදර කතාව තරමටම ගැහැනු ළමයි චිත්රපටයද සිංහල සිනමාවේ අමරණීයම නිර්මාණයක් වුණා.
එය ජාත්යන්තරයටත් ගිහින් සම්මානනීය වූ චිත්රපට කතන්දරයක්. ගැහැනු ළමයි ගැන ‘මව්රට’ හාට් පිටුවට ලියන්න අදහස දුන්න මේ පින්තූරේ හොරාගත්තේ මුහුණු පොතෙන් හොඳේ…
දමයන්ති රේණුකා ප්රනාන්දු
