මේ පින්තූරේ ඉන්නේ ශ්යාමා ආනන්ද. ශ්යාමා ආනන්ද කියන්නේ හැත්තෑව දශකයේ බොක්ස් ඔෆිස් වාර්තා තැබූ චිත්රපටවල රඟපෑ අතිශයින්ම ජනප්රිය තරුණ නිළියක්. ශ්යාමා කවදාවත් නිළියක ලෙස ඒ කිසිම චිත්රපටයක පෙම් චරිත රඟපෑවේ නැහැ. මල්ගස් වටේ දිව්වෙත් නැහැ. ප්රවීණ චිත්රපට නිර්මාණකරු එම්.එස්. ආනන්ද කියන්නේ ශ්යාමා ආනන්දගෙ තාත්තා. ඔහු තමන්ගේ දුවව සිනමාවට ගෙනාවේ ‘ප්රවේසම් වන්න’ ෆිල්ම් එකෙන්. එතකොට ඇගේ වයස අවුරුදු 10යි. ‘ප්රවේසම් වන්න’ ෆිල්ම් එකේ ටෝනි රණසිංහ, මාලිනී ෆොන්සේකා, ජෝ අබේවික්රම වගේ ප්රවීණයෝ රඟපෑවත් ප්රේක්ෂකයන් අතර ජනාදරයට පත්වුණේ ශ්යාමාගේ ඩබල් ඇක්ටින් එකයි ඇගේ තාත්තාත් ඒක දැනගෙන හිටියා. හැබැයි තමන්ගේ දුවව ඉස්සරහට දාලා සල්ලි හම්බ කරන කලාවක් එම්.එස්. ආනන්දගේ හිතේ තිබුණේ නැහැ. Sri Lanka Latest News
ඒකට හොඳම නිදර්ශනය තමයි ශ්යාමා ඇගේ තාත්තා හදන ෆිල්ම්වල විතරක්ම රඟපාපු එක. හැත්තෑ ගණන්වල බොක්ස් ඔෆිස්කාරයෝ ශ්යාමාව දාලා පෙරළිකාර චිත්රපට හදන බලාපොරොත්තුවක හිටියත් ඇගේ තාත්තා ඊට අවසර දුන්නේ නැහැ.
නව යෞවනියක වූ ශ්යාමා 76, 77, 78 අවුරුදුවල ඇගේ නමින් චිත්රපට පෙළක රඟපෑවා. චණ්ඩි ශ්යාමා නමින් නිර්මාණය වූ ඒ චිත්රපට සියල්ල බොක්ස් ඔෆිස් වාර්තා බිඳදමා තිබුණා. ඒ හැම චිත්රපටයක්ම ප්රේක්ෂක සිත් ඇද බැඳ ගන්න තාලෙට නිර්මාණය කළේ එම්.එස්. ආනන්දයන්. ‘හලෝ ශ්යාමා’ චිත්රපටයේ ඈ කරට කර හරිහරියට රඟපෑවේ සිනමා සක්විති ගාමිණී ෆොන්සේකා එක්කයි. ඒ තාත්තයි දුවයි විදියටයි. ඇගේ සුන්දර රුවින් සිනමා පත්තර වගේම කාන්තා පත්තර සරසන්නත් කර්තෘවරු එක පොරයට සැදීපැහැදී සිටියා.
ඔන්න ඔය අතරේ ටිකක් වෙනස් කතන්දරයක් ප්රසිද්ධ වුණා. ඒ තමයි ප්රවීණ චිත්රපට අධ්යක්ෂිකා සුමිත්රා පීරිස් ‘ගැහැනු ළමයි’ චිත්රපටයේ පද්මිණී සේනාරත්නගේ චරිතයට ශ්යාමාව තෝරාගැනීම. සුමිත්රා, ශ්යාමාගේ තාත්තගෙන් ඇය පද්මිණීගේ චරිතය වෙනුවෙන් ඉල්ලා සිටියා. සුමිත්රාට කොහොම බැහැයි කියන්නද? තාත්තා දූට අවසර දුන්නා. ඒකත් අමුතු පෙරළිකාර චරිතයක්. ඈ අතිදක්ෂ ලෙස එය හැසිරෙව්වා. ඕ.සී.අයි.සී. සම්මානත් ලැබුණා. හොඳම ළමා නිළිය ලෙස ‘ප්රවේසම් වන්න’ චිත්රපටයට ඈ එදා දීපශිකා සම්මාන ලැබුවා. ළමා කාලයේම ජනප්රිය වූ නිසා ඇයව බේබි ශ්යාමා යන නමින්ද එකල හැඳින්වූවා.
කොහොමත් රංගනය ගැන උණක් ශ්යාමාට තිබුණේ නැහැ. ජනප්රිය නිළියක වීමේ ආශාවෙන් කූපන දාන මේනියාවක් ඇයට තිබුණේ නැහැ. ජෝඩු විලාසිතාවට රඟපාලා තිරයේ ජනප්රියම පෙම්වතිය වෙන්න පිපාසයක් ඇයට තිබුණේ නැහැ. අඟපසඟ නිරාවරණය වෙන ඇඳුමක් ඇඳලා කවර් පේජ් එකක්වත් ඇය කවදාවත් කළේ නැහැ.
ඒත් හැත්තෑව දශකයේ බයිස්කෝප් පිස්සන් අතර ඈ අතිශයින්ම ජනප්රිය වුණා. ඈ රඟපෑ ‘ශ්යාමා චිත්රපට පෙළ’ බොක්ස් ඔෆිස් රෙකෝඩ් තිබ්බා. බලාගෙන යනකොට ‘ශ්යාමා ආනන්ද’ කියන්නෙත් අමුතුම ටයිප් එකක බ්රෑන්ඩ් එකක් නේද?
දමයන්ති රේණුකා ප්රනාන්දු
