මහණ වෙන්න ලැබුණේ පෙර පිනකට…
ඉදිරියේදී ඒවා ශ්රාවකයන්ට අසන්නට ලැබේවි…
එදත් අදත් විවිධ චරිත නිරූපණය කිරීමට උනන්දු වන ඔහු මේ දවස්වල ඔබේ දෙනෙත් හමුවට එන්නේ ‘හදවිල අරණ’ ටෙලිනාට්යයේ විමල් ලෙසින්. ඔහු සංජය වෙදආරච්චි. මේ ඔහු සමග අප කළ සාකච්ඡාවක්.
🔴 සංජය දැන් පෙම්වතාගෙන් මිදිලා සැමියෙක් බවට පත්වෙලා නේද? ගත්ත තීරණය හදිසි වැඩියි කිහලා හිතෙන්නෙ නැද්ද?
එහෙම නැහැ. වෙනසකටත් එක්ක හිතුණා එහෙම රඟපාලා බලන්න. මේ දිනවල විකාශය වන ‘හදවිල අරණ’ ටෙලිනාට්යයේ විමල්ගෙ චරිතය තමයි මම රඟපාන්නේ. හිතුවට වඩා හොඳ ප්රතිචාර ලැබෙනවා. මීට වඩා වැඩිමල් චරිතයක් වුණත් රඟපාන්න මම සූදානම්. ඒ වෙනුවෙන් මගේ බාහිර ස්වරූපය වුණත් වෙනස් කරගන්න කැමැතියි.
🔴 ‘යශෝදරා’ චිත්රපටය සඳහාත් ඔබ එවැනි කැපකිරීමක් කළ බව අපි දැක්කා?
ඔව්, මම ගොඩක් ආශාවෙන් හිටියේ පැවිදි චරිතයක් නිරූපණය කරන්න. ඒත් මම හිතුවෙ නැහැ මේ තරම් ඉක්මනට ඒ අවස්ථාව උදාවෙයි කියලා. ‘යශෝදරා’ චිත්රපටයේ සැරියුත් මහරහතන්වහන්සේගේ චරිතය මම රඟපෑවේ. එවැනි ශ්රේෂ්ඨ පැවිදි චරිතයක් රඟපාන්න වාසනාව ලැබෙන්න මට පෙර පිනක් තියෙන්න ඇති.
🔴 ‘යශෝදරා’ චිත්රපටයෙන් පසු ඔබට සිනමාවෙන් දුර ගමනක් යන්න දොරගුළු විවර වුණේ නැද්ද?
‘යශෝදරා’ චිත්රපටය හරහා තමයි මාව ගොඩදෙනෙක් හඳුනාගත්තේ. වසර දෙක තුනක ඉඳලා රටට විවිධ බලපෑම් ප්රශ්න මතුවුණා. ඉතින් ඒ බලපෑම් කලා ක්ෂේත්රයටද බලපෑවා. නිර්මාණකරුවන් පවා නිර්මාණ කිරීමට උත්සාහ කළේ නැහැ ඇතිවුණු ප්රශ්නත් එක්ක. ඉතින් ඒ නිසා මට සිනමාවෙන් යමක් කරන්න අවස්ථාව අඩුවෙන්න ඇති කියලා හිතනවා.
🔴 ඔබ රංගන ශිල්පියෙක් වගේම නිෂ්පාදකවරයකු ලෙසත් කටයුතු කරන කෙනෙක්. ඉතින් කොහොමද ඒ අත්දැකීම?
ටෙලි චිත්රපට කිහිපයක් කළා. අත්දැකීම් නම් එමටයි. එය මෙහෙමයි කියලා පැවැසීමට අපහසුයි. හැබැයි ඉතින් නිර්මාණ කරලා ඒවා විකාශය කරගැනීමට ලොකු හිතවත්කමක් තිබිය යුතුයි. නැතුව නිර්මාණයක් විකාශය කරගැනීමට අපහසුයි. මගේ අදහසක් තියෙනවා හොඳ නිර්මාණයක් කරන්න. බලමු ඉදිරියේදී.
🔴 මේ දවස්වල කලාව වෙනුවෙන් ඔබේ දායකත්වය කොයි වගේද?
‘සිත්’ ටෙලිනාට්යයේ රූගතකිරීම්වලට තමයි පසුගිය දවස්වල සම්බන්ධ වෙලා හිටියේ. මේ දවස්වල මම ගෙදරට වෙලා ගීත කිහිපයක් රචනා කරමින් කාලය ගෙවනවා. නිකම්ම කාලය ගතකරන්න බැහැනේ. හිතට සැහැල්ලුවක් තිබෙන නිසා හොඳ ගීත කිහිපයක් ලියන්න පුළුවන් මනසක් තියෙනවා. ඉදිරියේදී ඒවා ශ්රාවකයන්ට අසන්නට ලැබේවි. මම රචනා කරපු ‘දුර ගිය ආදරයක්’ ගීතයට ගොඩක් ප්රතිචාර ලැබුණා.
🔴 ඔබේ සමකාලීන මිතුරන් ආදර සුව විඳිමින් කාලය ගතකරනවා. ඒත්, ඔබ එයින් පසුබසින බව අපි දකිනවා?
හැම දේකටම වෙලාව තමයි. මේ ප්රශ්නත් එක්ක විවාහයක් ගැන දැන්ම හිතන්න අපහසුයි. කාලයත් එක්ක හැම ප්රශ්නයකටම පිළිතුරු ලැබෙයි කියලා හිතනවා.
– වසන්ත විතාරණගේ
