ඉන්දියානු රසිකයෝ එක්ක ශ්වේතා සිං සීඅයිබීයට බලපෑම් කරයි…
සුෂාන්ත් සිං රාජ්පුත්ගේ හදිසි අභාවය සිදුවී වසරක්, හමාරක් පමණ ගෙවී ගියද අදටත් ඒ කඩවසම් නළුවාගේ මතකය… ඔහුට ආකර්ෂණය වී සිටි රසික සිත්වලින් මැකී ගිහින් නැත.
පසුගිය දිනෙක ඉන්දීය රූපවාහානී සේවාවක සාකච්ඡාවක් සඳහා පැමිණ සිටි රිහා චක්රබෝර්ති… විනාඩි ගණනක් ගොළුව සිටියේද සුෂාන්ත් සිං රාජ්පුත් ගැන මතකය එතැනදී
අවදි වීම නිසාය.
ස්ත්රී සිත් සහ හැඟීම් මනමෝහනය කරන රූපකායක් සේම රංගන ශෛලියක්ද හිමි සුෂාන්ත් තම ප්රේමය පූජා කොට තිබුණේ රිහාට පමණය.., කදිමට හැඩට ඒ ඒ තාලයට දෙපා තබමින් ඩාන්ස් කරන්නට දන්නා සුෂාන්ත් වෙනුවෙන් තම කුමරි බඹසර පවා පූජා කරන්නට ඉන්දියානු යෞවනියන් පොරබදද්දී සුෂාන්ත් තම ජීවිතයෙන් කොටසක් කර ගත්තේ රිහාවය. ඒ තරමටම සුෂාන්ත් රිහාගේ පෙමින් ආතුරව සිටියේය.
සුෂාන්ත් වෙත අවාසනාවන්ත ලෙස මරණය කැන්දාගෙන ආවේ ඒ ආතුර වූ ප්රේමය නොවේද..?
නිල වශයෙන් තවම එය තීන්දු වී නැත. කෙසේ වුවද සුෂාන්ත්ගේ අකල් මරණයට වගකිවයුත්තකු වූ රිහා චක්රබෝර්ති ගැන නීතිමය වශයෙන් වූ සැකසහිත වංහුං සියල්ල හමස් පෙට්ටියට දමා අවසන්ය.., ඒ විතරක්ද..? සුෂාන්ත්ගේ අබිරහස්මය මරණයද සියල්ල හමස් පෙට්ටියට දමා ඇති බවට තොරතුරු අනාවරණය වී ඇත.
සියල්ලන් යැයි මෙතැන හඳුන්වන්නේ කවුරුන් ගැනද..?
සියල්ලන් යැයි හඳුන්වන්නේ ඉන්දියානු මාධ්ය සහ ‘සී.බී.අයි’ සංවිධානය ගැනය..,
එතකොට සුෂාන්ත්ට ආදරය කළ රසික රසිකාවියන්ටත් ඔහුගේ දුක්ඛිත මරණය අමතක වෙලාද..?
කොහොමවත් නැහැ.., 2020 ජුනි 14 වැනිදායින් පසුව අද වනතුරුම ගෙවී ගිය කාලය තුළ සුෂාන්ත්ගේ සුන්දර ප්රතිරූපයට ඇලුම් කළ සියලුම රසික, රසිකාවියන් වාගෙම ඔහුගේ ලක්ෂ සංඛ්යාත ‘ට්විටර්’ අනුගාමිකයන්ද සුෂාන්ත් ගැන මතකය තුළ ඉතාම සංවේදී ලෙස දවස ගෙවූයේ සිත, මනස කීරි ගසන ආකාරයේ වදන් වරින්වර සනිටුහන් කරවමිනි.
එයට එක් සුවිශේෂී හේතුවක් වූයේ, සුෂාන්ත්ගේ සහෝදරිය වූ ශ්වේතා සිං කීර්ති, සුෂාන්ත්ගේ ශෝචනීය මරණයෙහි දුක, ශෝකය ඔවුන් සමග නිතර බෙදාගත් නිසාය. තම සෙනෙහෙබර සහෝදරයාට ඔවුන් තවමත් ළෙන්ගතුව සිටීම ශ්වේතාට ඉමහත් වූ සතුටක් සේම අස්වැසිල්ලක්ද විය.
ආදරණීය සුෂාන්ත්.., සෙනෙහසින් ලියා සිටිමි.., අනේ ඔබ අද සිටියා නම් අපට එය කෙතරම් අස්වැසිල්ලක්ද..? කළු පැහැති මරණයෙහි කඩතුරාව මඳකට හෝ විවර කර දෑස අයා බලන්න.
ඔබ ආදරය, සතුට බෙදා දුන් හදවත් තවමත් ඔබ සමගය. බලන්න… හැමදාම අපේ ජීවිතවල ආඩම්බරය වූ ඔබ දසදහස් ගණනක හදවත් තුළ ඇති කළ ආදරය කෙතරම් ආකර්ෂණීයද… මොනතරම් පුදුමාකාරයිද.., ඔවුන් ඔබ වෙනුවෙන් ගෙන යන ආදරණීය සටනට තවමත් තිත තබා නැත.., ඔවුන් සමග එක්ව මමද දෙවියන් යදිමි… ඒ ඔබද ගරුත්වයෙන් සැලකූ දුර්ගා අම්මා හමුවේය.
ආදර අම්මා… කරුණාකර සත්යය හෙළිදරව් කරගන්නට උදව් කරන්න… නොසන්සුන්ව තිබෙන අපේ හදවත්වලට සාමය සමග අස්වැසිල්ල දානය කළ මැනවි…’
ශ්වේතා සිය සහෝදරයා වෙනුවෙන් පසුගිය දවසෙක තැබූ ‘ටිව්ටර්’ පණිවුඩයෙහි එසේ සඳහන් විය. එක්සත් ජනපදයේ පදිංචිව සිටින ශ්වේතා සිං කීර්ති නවරාත්රී දුර්ගා පූජාව වෙනුවෙන් ඉන්දියාවට පැමිණියාය. තම පියා සහ මව සමග එක්ව ඇය ‘සී.බී.අයි.’ සංවිධානය වෙත බලකර සිටියේ සත්යය හෙළි කොට තම සහෝදරයාගේ මරණය පිටුපස සැඟවී සිටින පවුකාරයන් නීතියේ රැහැනට හසුකර දෙන ලෙසය.
කරුණාකර ඔබ වෙතින් මඟහැරී ගිය සුෂාන්ත් සිං රාජ්පුත්ගේ අබිරහස් මරණය වෙත නැවැත යොමු වන්න… සත්යය හෙළි කරන්න.., අප ඉවසා සිටි තරමෙහි සීමාව දැන්නම් හොඳටම ඇතියැ…’ යනුවෙන් ස්වේතා සිං කීර්ති සුෂාන්ත් සිං රාජ්පුත්ගේ රසිකයන් සමග එක්ව ‘ට්විටර්’ පණිවුඩයක් නිකුත් කළාය.
ස්වේතා සිතන්නේ රිහා චක්රබෝර්ති මෙයට සම්බන්ධය කියලද..?
නැහැ… එවැන්නක් ඇගේ වචනවල සඳහන්ව නැත. ඈ පවසා සිටින්නේ ‘සත්යය’ යටපත් නොකරන ලෙසය..,
සුෂාන්ත්ගේ අභිරහස් මරණය ගැන සඟවන්නට යමක් ‘සී.බී.අයි.’ සංවිධානය සතුව තිබෙනවාද?
කියන්නට දන්නේ නැත..,
නමුත් දුරකතන පටිගත කිරීම් සහ සුෂාන්ත් ගැන මවුපියන් පවසන දෑ ඇසූ විට සුෂාන්ත්ට දිවිනසා ගැනීමේ වුවමනාවක් තිබී නැත..,
සුෂාන්ත්ට සිදුවූ දේ හරියටම දන්නේ උඩ ඉන්නා දෙවියන් සහ මියගිය සුෂාන්ත්ම පමණය..,
සුෂාන්ත්ට නම් දැන් කිසිවක් පවසන්නට බැරි ලෙස මරණය ඔහුගේ හඬට අගුළුලා ඇත…
දෙවියන් නම් සියල්ල දන්නේය…
මිනිස් වෙසකට ආවේශව එහෙව් දෙවියන් එය ලොවට කවදා හෝ පවසනු ඇත…
එතෙක්, මිනිස් ආත්මයක් ලද ස්වේතා ඇතුළු රාජ්පුත් සිං පවුලට නිහඬව බලා සිටින්නට සිදුවනු ඇත.
-දමයන්ති රේණුකා ප්රනාන්දු
