සිරස නාලිකාවේ “කොටු” ටෙලිය හරහා “නිසල්”ට පණපොවන ඔහු ජීවිතයේ නිහඬ ප්රේමවන්තයෙකි. ජීවන වේදිකාවේ ආචාර්යවරයෙක් ලෙස සිය වෘත්තීය ජීවිතය ගතකරන ඔහු මංගල ගමන ආරම්භ කරයිද? නැතිනම් කලා කේෂත්රය තුළ දිගු ගමනක් යන්න සුදානමින්ද? අඩුවක් නැතුව ඒ හැම දේම දැනගන්න, ප්රේක්ෂක ආදරය නොඅඩුව ලබන හිරුෂාන් හෙට්ටිආරච්චි සමග කතාබහක් ආරම්භ කරන්නයි ‘මව්රට’ අපේ මේ සුදානම.
හිරුෂාන් කොහොමද මේ දවස්වල ජීවිතේ?
ජීවිතේ මේ මොහොත හොඳින් විඳගෙන වැඩ ටිකත් කරගෙන ඉන්නවා. ඒ වගේම ටෙලිනාට්ය තුනකට රංගනයෙන් දායක වෙනවා. සින්ටෝ, කොටු, දෙවෙනි ඉනිම. ඒ වගේම තමයි වෙළෙඳ දැන්වීම් සහ මියුසික් වීඩියෝ කිහිපයකටත් සම්බන්ධ වෙලා ඉන්නවා සහ වේදිකා නාට්ය ගීතයකටත් රංගනයෙන් දායක වෙනවා.
නාලිකා තුනක චරිත තුනක්. ඉතින් හිරුෂාන් වැඩිපුරම කැමැති චරිතය මොකක්ද?
පොදුවේ මම එක වගේ තුනටම කැමැතියි. හැබැයි දැන් මේ දවස්වල මං කැපවෙලා වැඩ කරනවා කොටු එකේ නිසල්ගේ චරිතයට. මගේ පෞද්ගලික ජීවිතයට වඩා හාත්පසින්ම වෙනස් චරිතයක්. සාමාන්ය ජීවිතයට වඩා වෙනස් චරිත තුනක් තමයි මට ලැබිලා තියෙන්නේ.
චරිත තුනම සාමාන්ය ජීවිතයට වඩා වෙනස් නම් හිරුෂාන්ගේ සාමාන්ය ජීවිතය ගැනත් කියමු?
ඇත්තටම මං හරිම නිශ්ශබ්ද චරිතයක්. වැඩ ටික පාඩුවේ කරගෙන ඉන්න චරිතයක්. සින්ටෝ නාට්යයේ චරිත්ගේ චරිතය ටිකක් මගේ ජීවිතයට සමානයි. හැබැයි මං මැරි කරලා නෑ. සින්ටෝ එකේ චරිත් මැරි කරලා.
ඉතින් හිරුෂාන් ප්රේමවන්තයෙක්ද?
ඔව්. ප්රේමවන්තයෙක්. කැම්පස් කාලේ ඉඳන් ආදරේ කරන්නේ. දැන් අවුරුදු හතක් වගේ. එයා මගේ පහළ බැච් එකේ.
එහෙනම් ළඟදි මැරි කරයි?
මැරි කරන්න අදහසක් තියෙනවා. ඉතින් බලමු. කාලයට භාර කරමින් මගේ රංගන කටයුතු කරන ගමන් ඉදිරියේදී විවාහ ජීවිතයට එළඹෙන්න බලාපොරොත්තුවෙන් ඉන්නවා.
දැන් පුංචි තිරයෙන් සිනමාවට යන්න කාලෙ හරි. චිත්රපටවලට අවස්ථාවක් ලැබුණේ නැද්ද?
චිත්රපට දෙකක පොඩි කොටස්වලට සම්බන්ධ වුණා. හැබැයි තාම සිනමාවේ ප්රධාන චරිතයක් කරන්න ආරාධනාවක් ලැබුණේ නෑ. ඉතින් මට ඉදිරියේදී ආරාධනාවක් ලැබුණොත් චරිතෙ කොහොමද බලලා මට කරන්න පුළුවන් නම් කරන්න බලාපොරොත්තුවෙන් ඉන්නවා.
හිරුෂාන් පාසලක ආචාර්යවරයෙක්. කොහොමද වෘත්තීන් දෙකක් කරන්නේ?
ඇත්තටම පුදුම විදිහට බැලන්ස් කරගෙන කරනවා. හරිම දුෂ්කර වැඩක්. මොකද අනිවාර්යයෙන්ම මම වෘත්තියට කැපවෙන්න ඕනේ. මම මූලිකත්වය දෙන්න ඕනේ. ඒවගේම මම රංගනයටත් මූලිකත්වය දෙන්න ඕනේ. ඇත්තටම මේ දෙක බැලන්ස් කරනවා කියන්නේ ලේසි වැඩක් නෙමෙයි. හැබැයි මම කොහොම හරි කරනවා.
හිරුෂාන්ට පෙම්වතියගෙන් හොඳ සහයෝගයක් ලැබෙනවා ඇති නේද?
ඔව්. එයාගෙන් හොඳ සහයෝගයක් ලැබෙනවා සහ එයාගේ පවුලෙන් සහ අපේ පවුලෙන් මට ගොඩක් ලොකු සහයෝගයක් ලැබෙනවා. එයා කැමැති නැහැ රඟපාන චරිත නිසා අපේ පෞද්ගලික ජීවිතයට ගැටලු ඇතිවෙනවට. මාත් එහෙමයි. නළුවෙක් වුණාම ඕනෙ චරිතයක් කරන්න පුළුවන් වෙන්න ඕනෙ. හැබැයි මං නිතරම හිතන්නේ මට කරන්න පුළුවන්ද සුදුසුද නැද්ද කියලා බලලා මං චරිතයක් තෝරගන්නේ. හැබැයි මේ කාරණය එකිනෙකට සාපේක්ෂයි. ඉතින් ඒ නිසා කොහොමත් එයාගෙන් ලොකු සහයෝගයක් ලැබෙනවා.
පෙම්වතියටත් රඟපාන්න අවස්ථාවක් ලැබුණොත්?
රඟපාන්න අවස්ථාවක් ලැබෙනවාට ඇත්තටම මගේ අකැමැත්තක් නෑ. ඇය සෞන්දර්ය විශ්වවිද්යාලයේ මට පහළ බැච් එකේ හිටියේ. ඉතින් එයා නර්තනය මූලිකව තමයි අධ්යාපන කටයුතු කළේ. දැන් එයා උපාධිය අරගෙන අපේ කැම්පස් එකේම නර්තනය සම්බන්ධ බාහිර කථිකාචාර්යවරියක් විදිහට වැඩ කටයුතු කරගෙන යනවා. එයාට ටෙලිනාට්යවලට අවස්ථාවක් ලැබුණේ නෑ. ඒ වෙනුවෙන් වැඩ කරන්න ලොකු නැඹුරුවක් තිබුණෙත් නෑ. ඉදිරියේදී සම්බන්ධ වීමට ආරාධනාවක් ආවොත් තෝරා බේරගෙන මගෙනුත් දේවල් අහලා කරන්න ඉඩ තියෙනවා. එයාගේ පෞද්ගලික ආසාවක් තියෙනවා වෙළෙඳ දැන්වීම්වල රඟපාන්න. ඉතින් ඉදිරිය කොහොම වෙයිද කියලා අපි බලමු.
ඉන්දු ජයවර්ධන
