පසුගිය සතියේ ‘මව්රට’ ‘හාට්’ තුළින් ‘කාපු කට්ට’ විශේෂාංගයට ඉතා හොඳ ප්රතිචාර ලැබුණා. ඒ නිසාම මේ සතියේ අපි තවත් සුවිශේෂ කාර්මික ශිල්පියෙක් ගැන ඔබට කියන්න හිතුවා. රැයක් දවාලක් නැතිව නිර්මාණ වෙනුවෙන් කැපවෙන ඔහු, පසුකාලීනව හොඳම ශබ්ද විකාශන ශිල්පියා ලෙසත් රයිගම් සම්මාන හිමිකර ගත්තා. ඔහු චාමර සමරතුංග. මේ කතාබහ ඔහු සමගයි.Sri Lanka Latest News
‘යොවුන් වසන්තය’ සමග ගෙවෙන ජීවිතය කොහොමද චාමර?
ගෙවන ජීවිතය නම් ඉතා සුන්දරයි. මොන බාධක ප්රශ්න ආවත් ඒ දේවල් දැනෙන්නේ නැති තරමට නිර්මාණය සමග සම්බන්ධ වෙලා වැඩ කරනවා. සුන්දර පවුලක් විදියට මේ දවස්වල නිර්මාණ කිහිපයකම මම එක දිගටම වැඩ. යොවුන් වසන්තය, කළු අයස, ආලේ, මන්දාරා, මේ ටෙලිනාට්ය සියල්ලම ඉන්දික ධර්මතිලක තමයි අධ්යක්ෂණය කරන්නේ. ඉතින් එකම කණ්ඩායමක් විදියට එක දිගට නිර්මාණවල වැඩ කරනකොට ගොඩක් සතුටින් කටයුතු කරගෙන යනවා.
චාමරගේ රාජකාරිය මොන වගේද කියලා දැනගන්න කැමැතියි?
කෙටියෙන්ම කිව්වොත් සවුන්ඩ් රෙකෝඩින් ශිල්පියෙක් විදියට තමයි මම කටයුතු කරන්නේ.
එතකොට චාමර මේ වෘත්තියට සම්බන්ධ වුණේ කොහොමද?
මගේ සීයා චිත්රපට නිෂ්පාදකවරයෙක්. මගේ මාමා අජජිත් ශාන්ත. ඔහු හරහා තමයි මම මුලින්ම සී පික්සල් මීඩියා ආයතනයට සම්බන්ධ වෙන්නේ 2006 වර්ෂයේ. මට නුහුරු දෙයක් වුණාට මගේ පවුලේ හිතවතුන් කිහිපදෙනකුම කලාවට සම්බන්ධ නිසා ඒ ආභාෂයත් සමග පොඩි ආශාවක් තිබුණා මේ වෘත්තියට සම්බන්ධ වෙලා වැඩ කරන්න. ඉතින් මම කාර්මික ශිල්පියෙක් විදියට හැම දේම ඉගෙන ගත්තා.
හිතන තරම් සුන්දරද?
අපි මොන රාජකාරිය කළත් හිතන තරම් සුන්දර නැහැ. කට්ටක් කන්නම ඕනෙ ඒ ප්රතිඵල අත්විඳින්න. එහෙම හිතලා හෙමින් ගමන ආවොත් ඉතින් කාටවත් වරදින්න විදියක් නැහැ. මමත් එහෙම හිතලා ගේමක් ගහලා තමයි මේ තැනට ආවේ. අද ඉතින් බලනකොට සුන්දරයි. සෑහෙන්න මහන්සි වෙන්න ඕනේ. හැබැයි මට ගුරුහරුකම් ලබාදුන්න අය හරියටම මේ වෘත්තිය ගැන කියලා දුන්නා. මමත් ඉතින් ඒ හැම දේම හොඳට ඉගෙනගෙන උත්සාහයෙන් කැපවීමෙන් අවබෝධ කරගෙන වැඩ කරගෙන යනවා තවමත්.
ආවාට ගියාට සවුන්ඩ් පටිගත කරන්න බැහැ නේද?
එහෙම කරන්න පුළුවන් වෘත්තියක් නෙවෙයි මේක. හොඳ අවබෝධයක් අනිවාර්යයෙන්ම තිබිය යුතුයි. රූගත කිරීම් කරන දර්ශන තලය අනුව තමයි සවුන්ඩ් රෙකෝඩ් එක කරන්නේ. නවීන තාක්ෂණය උපයෝගී කරගෙන නිර්මාණයට හොඳ සාධාරණයක් කිරීමට තමයි මම නිරන්තරයෙන්ම උත්සාහ කරන්නේ. අනෙකුත් ශිල්පීන්ගේ වගකීම එහෙන් හරියටම කරනකොට මම මගේ වගකීම 100%ක් උපරිමව කරනවා.
හාපුරා කියලා ඔබේ වගකීම අකුරට කිරීමට මුල් වුණු නිර්මාණය?
මුල් කාලවල සහාය සවුන්ඩ් පටිගත කිරීම් ශිල්පියෙක් විදියට මම වැඩ කළා. ගිහාන් රෝහණ අධ්යක්ෂණය කළ ‘සඳට නුඹ ආදරෙයි’ ටෙලිනාට්යයේ තමයි මම මුලින්ම වැඩ කරන්න සම්බන්ධ වුණේ.
මෙගා ටෙලිනාට්යවල වැඩ කිරීමට ඔබ ඒ තරම් කැමැත්තක් නැහැ වගෙයි?
ඇත්තටම කිව්වොත් දීර්ඝ නිර්මාණ සඳහා වැඩකිරීමට මම ඒ තරම් කැමැති නැහැ. ගුණාත්මක නිර්මාණ සඳහා තමයි මම කැමැති. සවුන්ඩ් එක පටිගත කිරීම වුණත් ලොකු පහසුවක් තියෙනවා. ඒ බාහිර ගැමි පරිසරය අනුව. උදාහරණයක් විදියට රූපරාමුවට අවශ්ය මූසල හැන්දෑවක් වුණොත් සවුන්ඩ් පැත්තෙන් වුණත් එයට රහක් එකතු කරන්න පුළුවන්. හැබැයි ඉතින් ජීවන රටාවත් එක්ක එහෙම තෝරා බේරාගෙන වැඩ කරන්න අමාරුයි.
වසන්ත විතාරණගේ
