හයිය තියෙන කාලේ පුළුවන් තරම් වැඩ ගන්න ඕනේ…
මගේ පෙනුම හින්දා තමයි ඒවා දෙන්නේ…
ඇය සිය ප්රේක්ෂකයන් වසඟයට ගත්තේ ඇගේ කොණ්ඩය නිසා කිව්වොත් නිවැරැදියි. මේ දිනවල ‘දිවිතුරා’ හා ‘SHADOW’ හරහා තමන්ගේම අනන්යතාවයකින් කරළියට පැමිණි සුදීක්ෂා සමාධි පෙරේරා අපිත් එක්ක එකතු වුණා. ඇගේ ආගිය තොරතුරු අපිත් එක්ක බෙදා ගන්න.
සම්පූර්ණ නම?
රණසිංහගේ සුදීක්ෂා සමාධි පෙරේරා.
උපන් දිනය?
ඔක්තෝබර් 08.
සුදීක්ෂාගේ පවුලේ විස්තර මොනවද?
අම්මා, තාත්තා, මල්ලී. තාත්තා පොලිසියේ ‘එස්.අයි’ මහත්තයෙක්. මල්ලි ‘එන්.ඩී.බී.’ බැංකුවේ බෑන්ක් මැනේජර් කෙනෙක්.
උස කීයද?
අඩි 5යි අඟල් 4යි.
සුදීක්ෂා Leisure Time එක ගෙවන්න කැමැති කොහොමද?
විවේක කාලයක් ලැබුණොත් නිදාගන්න කැමැතියි. ගෙදර අය එක්ක වැඩිපුර කාලය ගතකරන්න කැමැතියි.
දඟකාර, කටකාර චරිතම සුදීක්ෂාට ලැබෙන්නේ සුදීක්ෂාගේ කොණ්ඩෙ නිසා කිව්වොත්?
ඔව්… මේතාක් කළේ දඟකාර, කටකාර චරිත තමා. මගේ පෙනුමත් එක්ක එහෙම හිතලා ඒ වගේ චරිත දෙනවා ඇති. හැබැයි මමත් කැමැතියි වෙනස් දෙයක් කරන්න සහ වෙනසක් බාර ගන්න. ඉතින් බලාගෙන ඉන්නවා බලමු අපි.
ඒකපාර්ශ්වීය ආදරය ප්රකාශ කරන්න බය යාළුකම නැතිවෙයි කියලද?
ඒකපාර්ශ්වීය ආදරය එහෙම යාළුකම් නැති වෙයි කියලා බය නැහැ. ඒ කෙනා දන්නවා මම ආදරෙයි කියලා. සමහරවිට මම ගැළපෙන්නේ නැහැ කියලා හිතලා ඒක අඟවන්නේ නැති වෙන්න පුළුවන්. මමත් ඉතින් ඒක දැනගෙන පැත්තකට වෙලා ඉන්නවා.
රෙහානා හා සුදීක්ෂාගේ ජීවිතවල ඇති සමානකම් මොනවද?
රෙහානා කියන්නේ ‘ඊෂා’ එයාගේ යාළුවට ගොඩක් එකතු, එයා යාළුවො වෙනුවෙන් ඕනෑම දෙයක් කරන්න කැමැති හරිම හිත හොඳ අවංක චරිතයක්. මම කියන්නේ නෑ මම රෙහානාමයි කියලා. හැබැයි රෙහානාගේ තියෙන සමහර සිතුවිලි මගේ තියෙනවා. මොකද මමත් යාළුවොත් එක්ක ගොඩාක් සමීප කෙනෙක්. මට ඉන්න සීමිත යාළු පිරිසක් එක්ක හැමදේම බෙදාහදා ගන්නවා. උදව් කරනවා. ‘රෙහානා’ සමාධි කියන්නත් බැහැ. හැබැයි රෙහානාගේ තියෙන සමහර ආකල්ප සමාධිගේ තියෙනවා.
අපට දැනගන්න ලැබුණු විදියට ඔබ ව්යාපාරිකාවක්. ඒ මොන අංශයෙන්ද?
ඔව්… මගේම කියලා සැලෝන් එකක් තියෙනවා. ඒක තමයි මගේ ව්යාපාරය.
ඔබ ව්යාපාරිකාවක් විදියට කටයුතු කරන්නේ රංගනයෙන් ජීවිතේ ගොඩනඟා ගන්න බෑ කියලා හැමෝම කියන නිසා කියලා කිව්වොත්?
නෑ… මෙහෙමයි… වැඩ කරන්න තියෙන්නේ බොහොම සීමිත කාලයක්. අපට ජවය තියෙන වෙලාවේ කාලය අපතේ හරින්නෙ නැතුව හරි දේකට හරියට යොදා ගන්න ඕනේ. මට කරන්න පුළුවන් දෙයක් නම් ඒක මම උපරිමයෙන් කරනවා. ඉතින් ඒකෙදි මම හිතන්නේ නැහැ මගේ වෙලාව. අද ඉතුරු කරන දේ අනාගතයට. අනාගතය කොයි වගේ වෙයිද කියලා දන්නේ නැහැ. හැබැයි වර්තමානය සැලැසුම් කරනවා අනාගතයට.
අවස්ථාවට විතරක් මිනිස්සු ආශ්රය කරනවා කියලා සුදීක්ෂාට චෝදනා ඇවිත් තියෙනවා නේද?
එහෙම අවස්ථාවට විතරක් මිනිස්සු ආශ්රය කරන්නේ නැහැ. මම හැමදේටම මිනිස්සු ආශ්රය කරනවා. මාව ආශ්රය කරපු සහ මාත් එක්ක ගනුදෙනු කරපු අය දන්නවා. සමහර මිනිස්සු තමා අවස්ථාවාදී විදියට මාව ආශ්රය කරන්නේ කියලා.
පාසල් කාලයේදී සමස්ත ලංකා දක්වා ගිය ගමනේ ලබාගත් අත්දැකීම් එක්ක කැමැති නැද්ද ටෙලිනාට්ය අධ්යක්ෂණය හෝ නිෂ්පාදනවලට යොමු වෙන්න?
පාසල් කාලයේදී හැම ජයග්රහණයක්ම ලබා ගනිමින් ක්රීඩා හා නාට්ය අංශවලින් සමස්ත ලංකා දක්වා ගිහින් තියෙනවා. වර්තමානයේ රංගන ක්ෂේත්රයේ ඉන්නවා. ඔව්… නිෂ්පාදනය පැත්තට යොමු වෙන්න ආසයි. ඒක මගේ හීනයක්. බලමු… ඒකට ගොඩක් අත්දැකීම්, දැනුම් අවශ්ය වෙනවා සුදුසු කාලය ආවම ඒක කරනවා.
සුදීක්ෂා රංගනයෙන් දායක වුණු චරිත අතරින් වැඩිම FAN BASE එකක් එකතු වුණේ මොන චරිතයටද? ඇයි ඒ..?
හේලි නතාෂාට තමා වැඩිපුරම වූ ප්රේක්ෂක පිරිස හිටියෙ. වර්තමානයේ මම ජනප්රිය වුණේ ‘දිවිතුරා’ ටෙලිනාට්යයේ රෙහානා නිසා. රෙහානා කියන්නේ හරිම සන්සුන්, නිදහසේ ඉන්න ගෑනු ළමයෙක්. යාළුවට ගොඩක් ආදරෙන් සහ යාළුවා ආරක්ෂා කරගෙන හිටිය නිසා ඒ චරිතය ගොඩක් ජනප්රිය වුණා.
සුදීක්ෂාගේ කොණ්ඩය නිසා තමයි සුදීක්ෂාව ලංකාවේ BRAND එකක් විදියට මිනිස්සු හඳුනන්නේ කියලා කිව්වොත් ඔයා ඒක පිළිගන්නවද?
මෙහෙමයි… මගේ කොණ්ඬේ කර්ල්. හැමෝටම කොණ්ඩයක් තියෙනවා. හැබැයි මගේ කොණ්ඩෙ මගේ බාහිර පෙනුමට ලැබිච්ච ආභරණයක්, දායාදයක් විදියට තමා මම දකින්නේ. මගේ කොණ්ඩෙට ආදරේ කරන පිරිසකුත් ඉන්න පුළුවන්. හැබැයි මම හරියට රඟපානවා. ඒ රඟපාන චරිතය හරහා තමයි මිනිසුන්ගේ හිත්වලට ළං වෙන්න පුළුවන් සහ බ්රෑන්ඞ් එකක් වෙන්න පුළුවන්. මගේ කොණ්ඩෙ මාව හඳුනගන්න තියෙන සලකුණක් විතරයි.
‘තෙරුනි’ අතීත මතක සොයා යන්න ගිහින් ‘තෙරුනි’ තමන්ගේ ජීවිතය කණපිට පෙරළාගනීද?
‘තෙරුනි’ගෙ චරිතයට මාව තෝරා ගත්තේ නාලක විතානගේ. මුලින්ම ඒක කියන්න ඕන. ‘තෙරුනි’ කියන්නේ අතීතය ගැන හොයන හාරඅවුස්සන හරියට ප්රශ්න ලිහා ගන්න උත්සාහ දරන චරිතයක්. ඉතින් ‘එයැරමබස’ මුළු නාට්ය පුරාම අතීතය හෙව්වට අමාරුවේ වැටෙන චරිතයක් නෙවෙයි.
සුදීක්ෂාගේ ජීවිතේ ඉදිරි බලාපොරොත්තු මොනවද?
මේ බාරගත්ත නිර්මාණ කිහිපය සාර්ථකව නිම කිරීමට තමා බලාපොරොත්තුව. ඕනෑම නිර්මාණයකින් ඉදිරියට එන්නත් බලාපොරොත්තුවකුත් තියෙනවා. සමහර විට ටෙලි නිර්මාණවල මාව අඩුවෙන් දකින්න ලැබෙන්නත් පුළුවන්. ඉදිරියේදී පොඩි විවේකයකුත් ගන්නවා.
සටහන සහ ඡායාරූප – භාෂණ වික්රමාරච්චි
