තාත්තෙකුගෙයි පුතෙකුගෙයි සෙනහස ගැන අමුතුවෙන් කිවයුතු නැහැ. පුතෙකුට තාත්තා රජෙක් කියන්නේ කට කහනවට නෙවෙයි. දුක් මහන්සි වෙමින් තාත්තලා සිහින දකින්නේ තම දරුවන්ට හොඳ අනාගතයක් ගොඩනගන්නයි. ඈත දුෂ්කර ගමක ඉතා අසීරු ජීවිතයක් ගතකරන මේ තාත්තාගෙයි පුතාගෙයි කතාව මේ දිනවල ඔබේ හදවතේ ලැගුම් ගෙන හමාරයි. ලසිත කාරියවසම් අධ්යක්ෂණය කරන ‘ගේට්ටුවා’ ටෙලිනාට්යයෙන් ඔබට සමීප වන ‘සුසිරි’ එහෙමත් නැත්නම් ගේට්ටුවා චරිතයට පණ දෙන විනාත් තේසන් සමගයි ‘හාට්’ අපේ මේ ආදරණීය කතාබහ.Sri Lanka Latest News
මේ දිනවල විනාත් ගැන බොහෝ දෙනෙක් කතාබහ කරනවා?
ගොඩ දෙනෙක් මගේ චරිතය ගැන මගේ රඟපෑම ගැන කතා වෙනවා. තවත් සමහරු ගේට්ටුවා කවුද කියලා හොයනවා. ඒ තරමට සමහරුන්ට මාව හඳුනාගන්න බැහැ. මම ප්රධාන චරිතයක් රඟපාන ප්රථම අවස්ථාව තමයි මේ. ගොඩක් සතුටුයි. කාලෙක ඉඳලා මම සිහින දැකපු ආදරණීය චරිතයක් අද මේ විදියට දකිනකොට. විශේෂයෙන්ම මාව මේ ටෙලිනාට්යයට තෝරගත්ත ගේට්ටුවා ටෙලිනාට්යයේ අධ්යක්ෂ ලසිත කාරියවසම් මහතාට ස්තුති කරනවා මේ කතාව ආරම්භ කරන්න පෙර. ඒ වගේම කාලෙකට පස්සේ මම ගැන මේ විදියට අකුරු කරන ‘මව්රට’ ජාතික පුවත්පතටත් ස්තුතියි.
කාලෙක ඉඳලා දැකපු සිහිනයක් කිව්වේ?
මම ‘ගේට්ටුවා’ ටෙලිනාට්යයට සම්බන්ධ වුණේ 2019 වර්ෂයේ. එතකොට මම සාමාන්ය පෙළ විභාගයට සූදානම් වෙන කාලේ. ඒ කාලේ පාසලේ ගුරුවරු මාව දන්න කියන අය ඇහුවා කවද්ද ටෙලිනාට්ය විකාශය වෙන්නේ කියලා. මම සම්බන්ධ වුණු පළමු ප්රාසාංගික ටෙලිනාට්යය නිසාත් මගෙත් ආශාවක් තිබුණා ටෙලිනාට්යය විකාශය වෙනකම්. කොහොම හරි අවුරුදු හතරක විතර කාලයක් ගියා ‘ගේට්ටුවා’ ටෙලිනාට්යය විකාශය වෙන්න.
හිතේ පුංචි කොනක තියෙන්න ඇති කාලයත් එක්ක චරිතය වෙනස් වෙයි කියලා?
එහෙම නැහැ. ලසිත කාරියවසම් මාමා කිව්වා මේ ටෙලිනාට්යයේ සුසිරි චරිතයට සුදුසුම කෙනා මම කියලා. කවදා හරි දවසක ටෙලිනාට්යය විකාශය වුණු කාලයක මාවම තමයි ගන්නේ කියලා. ඉතින් කාලය වෙනස් වීමත් සමග මගේ ස්වරූපය පවා දැන් වෙනස්. ටෙලිනාට්යය නරඹන සමහරුන්ට කුතුහලයක් තියෙනවා ඒ මමද සුසිරි චරිතය රඟපාන්නේ කියලා. මගේ වෙනස්වීමත් එක්ක. හිතේ දුකක් නම් තිබුණා ටෙලිනාට්යය විකාශය වෙන්නේ නැති වෙයි කියලා.
කනත්තක ගෙවපු ජීවිතයේ මිහිරි බව කොහොමද?
ඒ ගැන නම් කතා කරන්නම ඕනේ. කැලෑවක් මැද තමයි මේ කනත්ත තිබුණේ. පාන්දර වෙනකම් කනත්තේ රූගත කිරීම් තිබුණු අවස්ථා තිබුණා. කනත්තක මම නිදාගත්ත පළමු අවස්ථාව මෙයයි. එය මගේ ජීවිතයට මිහිරි අත්දැකීමක්.
විනාත් ගොඩ දෙනෙක් අතරට ගියේ බංටි චරිතය තුළින්?
‘හීන හොයන සමනල්ලු’ චිත්රපටය හරහා තමයි කලාවට සම්බන්ධ වෙන්නේ. බංටි ප්රධාන චරිතය මගේ රංගන දිවියේ සුවිශේෂ අත්දැකීමක්. මම මේ චිත්රපටයට සම්බන්ධ වුණේ අහම්බෙන්. තිර පරීක්ෂණයට මම අයියලා දෙන්නෙක් එක්ක ගියා. චිත්රපටයේ අධ්යක්ෂ රොහාන් පෙරේරා මාමා කිව්වා අපි තුන්දෙනාටම තිර පරීක්ෂණයට ඉදිරිපත් වෙන්න කියලා. එහෙම ඉදිරිපත් වෙලා දවස් කීපයකට පසු මට රොහාන් මාමා කතා කළා චිත්රපටයේ ප්රධාන චරිතයට මාව තෝරගත්තා කියලා. ඔය විදියට තමයි මම බංටි වුණේ.
ගේට්ටුවා තිර පිටපත බලනකොට මොකද හිතුණේ?
මට මාරම වේදනාවක් දැනුණේ. ඇස්වලට කඳුළු පවා ආවා. ඒ තරමට ගොඩක් දුක හිතුණා මෙහෙම ළමයි මේ රටේ කොයි තරම් ඇතිද කියලා. ඉගෙනීමේ සිහින බොඳ වෙනකොට ඒ ළමයින්ට මොන වගේ හැඟීමක් ඇතිද මේ වගේ ප්රශ්න තියෙනකොට ඊට නිසි පිළිතුරක් නැත්තේ ඇයි කියලා මම තනියම හිතුවා. හැබැයි මම උපරිම සාධාරණයක් කළා සුසිරි චරිතයට.
වසන්ත විතාරණගේ
