ස්මාර්ට් ෆෝන්, සෝෂල් මීඩියා වගේ නවීන තාක්ෂණ දියුණුවක් නැති ඒ දවස්වල ශ්රී ලාංකේය ප්රේක්ෂකයෝ සිංහල සිනමාවත් එක්ක පිස්සු වැටිලයි හිටියේ. ඒ බයිස්කෝප් පිස්සුවත් එක්ක. එක එක ජාතියේ උන්මාදයන් තුළින්ද ඔවුන් සතුටක් ලැබුවා. ඒ එක උන්මාදයක් තමයි ජෝඩු විලාසිතාවන්ට ඇලුම් කිරීම. හෙළ නිළි රැජින මාලනී ෆොන්සේකා එක්ක සිනමා සක්විති ගාමිණී ෆොන්සේකා පෙම් රැඟුම් රඟනවාට ප්රේක්ෂකයා කැමැති වුණා. තව කාලෙක විජය – මාලනී, තවත් කාලෙක විජය – මාලනී, තවත් කාලෙක තිස්සයි මාලනීයි. ඔන්න ඔය විදියට ඒ උන්මාද වෙනස් වුණා.
ශ්යාමා ආනන්ද කියන්නෙත් එක කාලයක ප්රේක්ෂකයන් අතර තිබුණු අපූරු උන්මාදයක්. ඒ උන්මාදය ඇතිවුණේ ‘ශ්යාමා’ කියන නමින් ආපු චිත්රපට පෙළ නිසයි. ‘හලෝ ශ්යාමා’ වගේ ‘නංගි ශ්යාමා’, ‘චණ්ඩි ශ්යාමා’ වගේ චිත්රපටවලට ප්රේක්ෂකයෝ පුදුම විදියට පෙරේත වුණා. ඒ හැම චිත්රපටයක්ම ආරම්භක සිනමාහල්වල දින 100 පහුකළා. බොක්ස් ඔෆිස් වාර්තා තිබ්බා. ශ්යාමා නමින් යන චිත්රපට කලාවට වගේම ශ්යාමා ආනන්දටත් ඔවුන් ඇලුම් කළා. ඒ බොකුටු කොණ්ඩයක් තියෙන, රවුම් ඇස් දෙකක් තියෙන ලස්සන හිනාවක් තියෙන හිනාවෙනකොට දෙකොපුල් වළගැහෙන මේ හුරුබුහුටි නවයොවුන් නිළි තාරකාවට ආදරය කරන දස දහසක් රසික රසිකාවන්ගෙන් කවදාවත් හිඟයක් තිබුණෙ නැහැ. ඒ වගේම ඒ රසිකත්වයට වයස් භේදයක් තිබුණෙත් නැහැ. බාල, තරුණ, වැඩිහිටි හැමෝම ශ්යාමාට ආදරය කරන්න ගත්තා.
වෙනස්ම විශේෂය වන්නේ ශ්යාමා තරුවක් වුණේ පෙම්වතියක ලෙස හෝ ජෝඩු ෆැෂන් එකට තරුණ නළුවො එක්ක පෙම් චරිත රඟපාලා නෙවෙයි. ඈ කවමදාවත් සිනමාවේ පෙම්වතියක වුණේ නැහැ. නළුවන්ට හාදු දුන්නේ නැහැ. ඇඳුම් මාරු කර කර මල් ගස් වටේ දිව්වේ නැහැ. හැබැයි කාගෙත් සිත්ගත් ජනප්රියම නිළියක් වුණා. ශ්යාමා නමින් නිර්මාණය වුණු බොහෝ චිත්රපටවල ඇගේ සහාය නළුවා වුණේ ගාමිණී ෆොන්සේකා. ඒ වැඩිමල් සහෝදරයා හෝ තාත්තා හැටියටයි. හැබැයි ශ්යාමාගේ ඇත්තම නමින් ශ්යාමා විලාසිතා හදපු ඒ චිත්රපට මාස ගණන් දිව්වේ ශ්යාමාගේ වෙනස්ම තාලේ ඇයටම ආවේණික වූ සුන්දර රංගන විලාසය නිසයි. නිර්මාණශීලී ප්රවීණ කැමරා ශිල්පියකු වූ එස්.එම්. ආනන්දන් තමයි ඇගේ තාත්තා. හැබැයි දුව රඟපාන්න නම් ආවේ ඒ තාත්තා කැමරා ශිල්පියෙක් වෙච්ච නිසා නෙවෙයි. එම්.එස්. ආනන්දන්ට දැනෙන්න ඇති මේ හැඩකාර කෙල්ලගේ ඇඟ ඇතුළේ දක්ෂ නිළියක් හැංගිලා ඉන්නවා කියලා. ඒ නිසයි ‘ප්රවේශම් වෙන්න’ චිත්රපටයේ ද්විත්ව චරිත නිරූපණයට ඇයව තෝරාගත්තේ. ඒ 1969 අවුරුද්දෙයි. අම්මා නිෂ්පාදනය කරලා තාත්තා අධ්යක්ෂණය කරපු ඒ චිත්රපටයේ ප්රවීණ නළු නිළි කාණ්ඩයක් එක්ක අවුරුදු 10ක් විතර වයස මේ පුංචි කෙල්ල කරට කර රඟපෑවා. ඒ රංගනය මොන තරම් කදිමයිද කියනවා නම් හොඳම ළමා නිළිය ලෙස ඈ දීපශිකා සම්මානයත් දිනාගත්තා.
ඉන් පස්සේ ශ්යාමා ආනන්ද නව යොවුන් දැරියක වෙද්දී ‘හලෝ ශ්යාමා’ ‘මගේ නංගි ශ්යාමා’ ‘චණ්ඩි ශ්යාමා’ යන චිත්රපට පෙළෙහි එක දිගට හොඳ අපූරුවට රඟපෑවා. ඇයට චිත්රපටවලට බොහෝ ආරාධනා ආවත් ඇය රඟපෑවේ තාත්තා හදන චිත්රපටවල විතරමයි. ඒකට හේතුව දන්නේ නැහැ. හැබැයි ප්රවීණ චිත්රපට අධ්යක්ෂිකා සුමිත්රා පීරිස් ‘ගැහැනු ළමයි’ චිත්රපටයේ පද්මිණීගේ චරිතයට ශ්යාමාව ඉල්ලද්දී එම්.එස්. ආනන්දන්ට නොදී බැරිවුණා. කැමරා ශිල්පියා විදියට ඔහු චිත්රපටයේ වැඩ කළ නිසා හෝ සුමිත්රා වැනි ගෞරවනීය අයකුට බැහැයි කියන්නට බැරි හින්දා හෝ ශ්යාමා, පද්මිණීට රඟපෑවා. ඒ රංගනයත් අතිවිශිෂ්ටයි. ඇයට සම්මානත් ලැබුණා. ඒ සම්මානනීය රංගනයෙන් පසුව ඇයට තව සම්භාව්ය සහ වාණිජ චිත්රපටවල චරිත සඳහා ආරාධනා ලැබුණත් ශ්යාමා ඒ චරිත භාරගෙන තිබුණේ නැහැ. මතකය නිවැරැදි නම් ඇගේ අවසාන චිත්රපටය වුණේ එම්.එස්. ආනන්දන් අධ්යක්ෂණය කොට නිෂ්පාදනය කළ ‘හලෝ ශ්යාමා’යි. ඒකත් බොක්ස් ඔෆිස් ගණයේ චිත්රපටයක්.
ඉතින් මේ මතකය අවදි කළේ ශ්යාමා නමින් ආ ශ්යාමා ආනන්දගේ උන්මාදනීය වූ ආනන්දය ගැන මතක් කරන්නයි. ඈ ගැන ලියන්න තව බොහෝ දෑ ඇතත් මෙතැනින් මේ සටහනට තිත තියන්නම්. කොහොම වුණත් ශ්යාමා තවමත් ප්රේක්ෂක සිත් අතර ජීවමානයි. ළඟකදී ඈ ගැන ලියවිලා තිබුණු ෆේස්බුක් සටහන දකිනකොට ඊට පාමුලින් තිබුණු කමෙන්ට්ස් දකිනකොට ඒ ටික හිතුණා.
මල්මි කෞශල්යා
