රඟපෑම කියන්නෙ භාවනාවක්…
ආදරයෙන් අන්ද වුණු මිනිසුන් අද සමාජයේ බහුලව දකින්නට ලැබෙනවා. ඒ අතර ආදරය කියන ඒ උත්තරීතර සෙනෙහස නොමැතිව පීඩා විඳින මිනිසුන් අප රටේ මොන තරම් ඇතිද? එලෙස ආදරය අහිමි වෙලා ආදරය සොයන සුවිශේෂී චරිතයක් තමයි ‘සකුගේ ලෝකය’ටෙලිනාට්යයේ ‘හිච්චා’. ‘හිච්චා’ට මෙවැනි ඉරණමක් අත්වුණේ කොහොමද කියලා ඔබ හදවතින්ම දුක්වෙනවා ඇති. ‘හිච්චා’ට මවුපියන්ගේ ආදරය අඩු වුණත් ප්රේක්ෂක ආදරය දෝතපුරා පිදීමට ඔබ සූදානමින් සිටින බව අපි දන්නවා. ඉතින් මේ දවස්වල කා අතරත් කතාබහ වෙන මේ සුවිශේෂී චරිතය නිරූපණය කරන රංජිත් කඩුපිටිගේ ප්රථම වතාවට මාධ්යයට හඬ අවදි කළේ ‘මව්රට’ පුවත්පත සමගයි.
ඒත් ඔබව දැන් ගොඩදෙනෙක් දැන හඳුනන්නේ ‘හිච්චා’ ලෙසට නේද?
‘හිච්චා’ චරිතය මගේ පෙර කළ පිනකට ලැබුණු චරිතයක්. විශේෂයෙන්ම ‘සකුගේ ලෝකය’ ටෙලිනාට්ය අධ්යක්ෂ ප්රියන්ත කොළඹගේ මහතා මම ගැන මානුෂිකත්වයෙන් බැලුවා. එතුමා මට දෙවියෙක්. මම මෙයට පෙරත් ඔහුගේ ‘සොඳුරු ගිම්හානය’ ටෙලිනාට්යයේ සුළු චරිතයක් කළා. ඒ දැන හැඳුනුම්කම මත ප්රියන්ත අයියා මම ගැන මානුෂිකව හිතලා තමයි ඔහු මාව මේ චරිතයට තෝරා ගත්තේ. ඒ වගේම අජිත් ලොකුගේ අයියාත් ලොකු සහායක් දුන්නා. ප්රියන්ත අයියා මට මේ අවස්ථාව දුන්නාට මම හිතන්නේ මෙවැනි චරිතයක් මට වෙන අධ්යක්ෂවරයකු දෙයි කියලා.
දැන් ඔබ ‘හිච්චා’ නිසාම ජනප්රිය රංගන ශිල්පියෙක් බවට පත්වෙලා කියලා හිතනවද?
මම ජනප්රිය චරිතයක් වෙන්න හිතාගෙන ඒ ප්රතිරූපය මවාගෙන කවදාවත් ජීවත් වෙන්නේ නැහැ. මම රඟපෑමට යොමු වුණේ භාවනාවක් කියලා හිතාගෙන මගේ හිත සැහැල්ලු කර ගැනීම සඳහායි. රඟපෑම මම දකින්නේ භාවනාවක් විදියටයි.
පසුගිය දවසක ඔබ ජනප්රිය රංග ශිල්පියෙක්ගෙන් කම්මුල් පහරක් කෑවා නේද. මොකක්ද ඇතිවුණු ප්රශ්නය?
‘හිච්චා’ චරිතය තුළින් තමයි මට එහෙම කම්මුල් පහරක් කෑවේ. ප්රවීණ රංගන ශිල්පී ශ්රියන්ත මෙන්ඩිස් තමයි වෙද මහතා ලෙසට රඟපාන්නේ. දැහැමි කරන බොරුවකට ‘හිච්චා’ව අහුකරනවා. ඒ වේදනාවට තමයි වෙද මහත්තයා මට ගහන්නේ.
‘හිච්චා’ චරිතය ඔබේ ජීවිතයට සමාන චරිතයක් බව ඔබ විශ්වාස කරනවද?
මගේ ජීවිතයේ ආදරය කියන දේ නොලැබ, දුක් විඳලා තැනකට එන්න උත්සාහ කරපු සංවේදී චරිතයක්. ඉතින් ඒ වගේම තමයි ‘හිච්චා’ටත් තමන්ගේ මවුපියන් ආදරය නැතුව වෙද ගෙදරක හැදී, වැඩී ජීවත් වෙන චරිතයක්. මගේ ජීවිතයට බොහෝ සමානකම් තිබෙන නිසා ‘හිච්චා’ තුළම ජීවත් වුණු නිසාම රඟපාන්න පහසුවක් වුණා.
ඔබ සැබෑ ජීවිතයේදී ආදරය විඳිනවාද?
මගේ ජීවිතයේ ඒ ආදරය මට අහිමි වුණාට මම තවමත් හොයන්නේ ඒ ආදරයයි. එතැනින් එහාට මට හිතන්නට තවත් දෙයක් නැහැ. මාව තේරුම් ගත්ත කෙනෙක් තවම හමුවෙලා නැහැ. ඉතින් මගේ ආදරයට කවදා අත්තටු ලැබෙයිද කියලා මම සිහින දකිනවා. ඒ තරමට මට තවත් ජීවත් වෙන්නට ආදරය අවශ්ය නිසා.
රංජිත් අපි කැමැති ඔබ මේ ක්ෂේත්රයට ආපු ගමන්මග ගැන කෙටියෙන් දැනගන්නට?
මම පාසල් යන කාලේ ඉඳලම නළුවෙක් වෙන්න ගොඩාක් සිහින දැක්කා. ඉතින් පාසලේදීත් නළුවා මම තමයි. ඉතින් මම ඔහොම පාසලේ වේදිකාවේ රඟපාමින් සෞන්දර්ය විශ්වවිiාලයට තේරුණා. එතැනින් තමයි මම මේ රඟපෑම කියන විෂය ගැන තවත් හොයන්නට පටන්ගත්තේ.
ඔබව ගොඩදෙනෙක් දැන හඳුනගත්තේ ‘සිද්ධාර්ථ ගෞතම’ චිත්රපටය හරහා නේද?
මම ඒ චිත්රපටයේ ‘කොණ්ඩඤ්ඤ බමුණා’ගේ චරිතය තමයි නිරූපණය කළේ. ඉන්පසු ‘ප්රේමය’ නම් චිත්රපටයේ ‘ප්රියන්ත’ චරිතයට නිරුපණය කළා. මේ චිත්රපටවල මම නිරූපණය කරපු චරිත මගේ රංගන දිවියට අත්වැලක් වුණා කියලා මම මුලින්ම කියන්න කැමැතියි.
-වසන්ත විතාරණගේ
