හොඳම නිළිය ජනප්‍රියම නිළිය කිරුළු දෙකම දිනූ ශලනි

ආශා අපට හමුවුණේ ඉන්දික ධර්මතිලක අධ්‍යක්‍ෂණය කළ ‘ගිරිදේවි’ ටෙලිනාට්‍ය තුළින්. ඇයගේ රංග භූමිකාව ආශා චරිතය හරහා ආදරණීය ප්‍රේක්‍ෂකයින් වසඟයට පත්කළා. ඒ ලැබූ ජනප්‍රවාදයට ඇය පසුගියදා පැවැති ‘රයිගම්’ ටෙලි සම්මාන උළෙලේ ජනප්‍රියතම නිළියට හිමි සම්මානය හිමිවුණා. ඒ විතරක් නෙවේ, ‘සිරස’ නාළිකාවේ විකාශ වුණු සුපුන් රත්නායක අධ්‍යක්‍ෂණය කළ ‘අඩෝ’ ටෙලිනාට්‍යයේ කමණි චරිතය තුළින් දක්‍ෂතම නිළියටද සම්මාන හිමිකර ගැනීමට වාසනාවන්තියක් විය. වසර 24කට පසු එකම වේදිකාවක් තුළ ජනප්‍රියතම සහ දක්‍ෂතම සම්මාන හිමිකර ගත්ත ශලනි තාරකාගේ හදගැස්ම ගැහෙන අතරතුර කෙටි අදහසක් අපට පැවැසුවා.

මම බලාපොරොත්තු නොවුණු සම්මානයක් තමයි මට මේ හිමිවූයේ. මම හිතුවේ නැහැ මට ජනප්‍රිය නිළිය සම්මානය ලබා ගැනීමට හැකිවෙයි කියලා. ‘ගිරිදේවි’ ටෙලිනාට්‍ය ආශාට ගොඩදෙනෙක් ආදරය කළ බව මම දන්නවා. ඉතින් මගේ ආදරණීය ජනතාව මට මේ දුන්න සම්මානයට මම සියලුදෙනාට ස්තුතිය පුදකරනවා. මම බලාපොරොත්තු වුණේ දක්‍ෂතම නිළිය සම්මානය තමයි. ඒ සම්මානය මට නොලැබුණත් නිර්දේෂ වෙන්න ලැබීමත් සතුටක් කියලා හිතා ගත්තා මම. නමුත් ඒ සම්මානයත් මට හිමිවුණා.

ඉතින් මගේ රංගන දිවි මඬලට වසර දොළහක් විතර වෙනවා. මම රංගන පාසලකට ගිහින් නැහැ. මගේ රංග තක්‍ෂලාව මේ ගෙවුණු ජීවිතයේ අත්දැකීම්. කටුක දැකීම් රාශියක් එක්ක තමයි මම මේ ගමන ආවේ. දැන් තමයි මගේ රංග ජීවිතයට වසන්ත කාලය උදාවුණේ. මම රඟපාපු පළමු ටෙලිනාට්‍යයේ ඉඳලා මේ දක්වා මට උදවු කරපු සියලුම අධ්‍යක්‍ෂවරුන්ට වගේම, මම සමඟ රංගනයෙන් සම්බන්ධවෙලා මට උදවු කළ සියලුම කලා ශිල්පීන්ට මම හදවතින්ම ස්තුතිය පුදකරනවා. ඔවුන් තමයි මගේ රංග පාසලේ ගුරුවරු, විදියට තමයි ඇය කෙටි අදහස් දැක්වූයේ. මට මතකයි ඇය ‘ගිරිදේවි’ ටෙලිනාට්‍යයේ මුහුරත් උළෙලේ මෙවන් අදහසක් පැවැසුවා. ඇයගේ රංගන ජීවිතයේ ඇයට ලැබුණු සුවිශේෂී චරිතයක් තමයි ‘ආශා’ චරිතය. ආශා වෙනුවෙන් කළ යුතු උපරිම කැපකිරීමක් ඇය කරන බව. ඇය එදා පැවැසූ වචන සියල්ලටම සාධාරණයක් කළ බව අපි සියලුමදෙනා දනිති. ඉතින් ඇයගේ සියලුම වැඩකටයුතු සාර්ථක වේවා කියා ‘හාට්’ අපේ කණ්ඩායමෙන් සුබපැතුම්ද මේ අවස්ථාවේ එකතු කරනවා.
වසන්ත විතාරණගේ