⬤ දිල්ශාන් වගේම මමත් පරිසරයට ආදරෙයි…
ගායන ක්ෂේත්රයට එකතු වුණු නවක තරුවක් තමයි රන්දික විජේනායක කියන්නේ. ඔහුව ගොඩ දෙනෙක් දැනහඳුන ගත්තේ ‘දෙරණ ඩී්රම්ස්ටාර්’ හරහා. ඔහුට ගායනයට සුමිහිරි හඬක් තිබුණා සේම නළුකමටද කඩවසම් පෙනුමක් තිබීමද විශේෂත්වයක්. මේ දිනවල විකාශය වන ‘මිහි’ ටෙලිනාට්යයේ ‘දිල්ශාන් රාජපක්ෂගේ’ චරිතය රඟපාන්නේ ඔහුය. ඉතින් ඔහුගේ ඉදිරි ගමන් මඟ කොයි වගේද කියා දැනගැනීමට අප රන්දිකට කතා කළා.
🔴 රන්දික දැන් වෙනදාට වඩා ජනප්රියයි?
ගොඩදෙනෙක් මාව දැනහඳුන ගත්තේ ‘දෙරණ ඩී්රම්ස්ටාර්’ හරහා. හැබැයි දැන් ඉතින් ඊටත් වඩා ප්රේක්ෂක පිරිසක් මම වටා බැඳිලා ඉන්නවා, මම දැන් නළුවෙක් නිසා.
🔴 ඔබ අපට දැන් හමුවන්නේ ‘දිල්ශාන්’ ලෙසට. එය ගැන යමක් කතා කළොත්?
‘දිල්ශාන් රාජපක්ෂ’ චරිතය තමයි මම ‘මිහි’ ටෙලිනාට්යයේ රඟපාන්නේ. ‘දිල්ශාන්’ චරිතය සඳහා මට ආරාධනා කරද්දිත් මම ගැන හොයලා බලලා තමයි මාව සම්බන්ධ කරගත්තේ. මොකද දිල්ශාන් පරිසරයට ආදරය කරන චරිතයක්. හරියටම කිවුවොත් මගේ ජීවිතයට සමාන චරිතයක්. මමත් ගොඩාක් පරිසරය සමඟ ජීවත් වෙන කෙනෙක්. මම උත්සාහ කරන්නේ ‘දිල්ශාන්’ චරිතයට උපරිම සාධාරණයක් කරන්න. මේ චරිතය වෙනුවෙන් මාව තෝරාගත්ත ටෙලිනාට්යයේ අධ්යක්ෂ තුෂාර තෙන්නකෝන්ට වගේම ‘දෙරණ’ රූපවාහිනී නාළිකාවේ අධ්යක්ෂ මණ්ඩලයට ස්තුතිය පුද කරනවා.
🔴 සංගීත ගමන නතර කරලා නළුවෙක් වෙන්න හිතුවේ?
පොඩි කාලේ ඉඳලම මම සංගීතයට ලොකු ළැදියාවක් තිබුණා. ඉතින් ඒ තිබුණු ආශාව වගේම, හැකියාවත් එක්ක 2019 ‘දෙරණ ඩී්රම්ස්ටාර්’ තරගයට මමත් තරග කළා. ඒ තිබුණු තරගකාරිත්වයත් සමඟ අවසන් හතර දෙනා අතරට මාව තේරුණා. ඒ කාලවලදීත් මට විවිධ නිර්මාණකරුවන් නිර්මාණවලට ආරාධනා කළා. තවත් සමහරු මට යෝජනා ගෙනාවා රඟපාන්න කියලා. ඉතින් මට ඒ තිබුණු ඉල්ලීමත් එක්ක වෙනසකටත් එක්ක රඟපාන්න හිතුවා. නළුවෙක් වෙන්න ආශාවක් තිබුණා නම් මම මීට කලින් රඟපානවා. ‘දෙරණ’ත් එක්ක ආපු ගමනක් නිසා රඟපෑමට සම්බන්ධ වෙලා මගේ තවත් පැත්තක් අඳුරගන්න පුළුවන් වෙයි.
🔴 ගොඩදෙනෙක් චෝදනා නඟනවා නවක ගායක, ගායිකාවන් රඟපාන්න ඇවිත් නාගන්නවා කියලා?
මෙහෙමයි, අපේ යම් දක්ෂතාවක් දැකපු නිසා තමයි අපිව නිර්මාණවලට සම්බන්ධ කරගත්තේ. අපිත් දැනගන්න ඕනෑ මියුසික් පැත්තෙනුත් යමක් කරන්න. කිසිම කෙනෙක්ට චෝදනා නඟන්න බැහැ අපි රඟපාන එකට. ප්රේක්ෂකයන් අපි රඟපානවා නරඹන්නෙ නැතුව ඉන්නේ නැහැනේ. අපි කරන දේ හරියට කළොත් කිසිම ප්රශ්නයක් නැතිවෙයි.
🔴 ‘ඩී්රම්ස්ටාර්’ කිරුළ හිමිවෙයි කියලද ඔබ බලාපොරොත්තු වුණේ?
හැමෝගෙම එකම අරමුණ කිරුළ ලබාගැනීම තමයි. කෙටි පණිවුඩ, මනාප අඩුවක් නැහැ. කිරුළ නොලැබුණා කියලා හිතේ කලකිරීමක් නැහැ. සතුටින් එළියට ආවා. මගේ ගම් පළාත කළුතර. අපි සමඟ තරග කරපු අපේම සහෝදරයෙක් තමයි ඒ කිරුළ කළුතරටම ගෙනාවේ. ‘ඩී්රම්ස්ටාර්’ තරගය මට අභියෝගයක්. ඒ හරහා ප්රවීණ ශිල්පීන්ගෙන් ගොඩාක් දේවල් ඉගෙනගැනීමට ලැබුණා. ඒ ලබපු අත්දැකීම් එක්ක රංගනය කියන දේත් අපට හැදෑරීමට අවස්ථාව ලැබුණා.
🔴 වර්තමානයේ අසන්නට ලැබෙන ගීත රැල්ල ගැන මොකද හිතෙන්නේ?
එය ගැන මට ලොකු තර්කයක් කියන්න බැහැ. මම මේ ක්ෂේත්ර දෙකටම අලුත්. හැබැයි අලුත් පිරිස තුළ විවිධ දක්ෂතා තිබෙන අය සිටින බව මම දකිනවා. ඔවුන්ගේ විවිධ ගීත රටාවලට ප්රිය කරන ප්රේක්ෂක පිරිසක් ඉන්නවා. කොළඹට වගේම, ග්රාමීය ප්රදේශවලට සීමා වුණු ගීත තිබෙනවා. කාලයත් එක්ක වෙනසක් වෙමින් හොඳ නිර්මාණ එළියට එනවා.
වසන්ත විතාරණගේ
