සංසාරාරණ්‍ය අසබඩින් ගමන වෙනස් වෙයි

ටෙලි නාට්‍ය කලාව වෙනස් මාවතකට යන බව අප මේ දවස්වල විවිධ නිර්මාණ හරහා දකිනවා. එවැනි සුවිශේෂී නිර්මාණයක් අපට මේ දවස්වල දැකබලා ගන්න පුළුවන්. ඒ ‘සංසාරාරණ්‍යය අසබඩ’ ටෙලි සිතුවමයි. එහි වෙනස ගැන එය අධ්‍යක්‍ෂ සංජය නිර්මාල් අප සමඟ දොඩමලු වුණේ මේ විදියට.
සංජය නවකතාවක් මූලාශ්‍රය කර රූපකාය නැඟීම බැරෑරුම් කර්තව්‍යයක් නේද?
එය බැරෑරුම් බව මමත් දන්නවා. නමුත් සයිමන් නවගත්තේගම ‘සංසාරාරණ්‍යය අසබඩ’ නවකතාව ලිවීමට කලින් තමයි එය තිර නාටකයක් විදියට නිර්මාණය කළේ. පසුකාලීනව එය නවකතාවක් විදියට පාඨකයාට තිළිණ කළා.
ඔබේ මේ රූපකාව්‍යයෙන් නවකතාවට හානියක් විය හැකිද?
මම එය කොහෙත්ම හිතන්නේ නැහැ. නවකතාව මූලික කරගෙන මම ටෙලි නාට්‍යයක කතාව ගොනු කළා නෙවේ. නවකතාවක් රසවිඳින විට එකිනෙකාගේ අදහස් වෙනස්. නමුත් නව කතාවට හානියක් නොවන විදියට කටයුතු කිරීමට මම වගබලා ගන්නවා.
‘සංසාරාරණ්‍යය අසබඩ’ කතාව පාදක වන්නේ මොන විදියටද?
ආගන්තුකයෙක් ගඟෙන් පාවෙලා ඇවිත් ඔහුගේ පැමිණීමත් සමඟ මුළු ශිෂ්ටාචාරයම වෙනස් වෙනවා. අවසානයේ ඔහු මුළු ගමම උඩුයටිකුරු කරනවා.
මෙහි අපි දැකපු වෙනසක් තමයි සිනමාවේ අපි දැකපු රූප කාව්‍ය ඔබ ටෙලි නාට්‍යයකට ගෙන ඒමට ගත් උත්සාහය?
එය තමයි මේ ටෙලි නාට්‍යයේ තිබෙන ලොකුම විශේෂත්වය. ගොඩ දෙනෙක් චිත්‍රපටයකින් දැකපු ඒ රූප කාව්‍ය ටෙලිනාට්‍යයකින් ගෙන ඒමට උත්සාහ කරන්නේ නැහැ. මෙහිදී එක රූපයක අදහස් ගොඩාක් තිබෙන බව අපි ප්‍රේක්‍ෂකයාට කීමට උත්සාහ කරනවා. දැනටම හොඳ ප්‍රතිචාර ලැබෙනවා.
අප සංජයගේ නිර්මාණවල විනිවිද භාවයක් දකිනව වගේම ඔබ මෙගා ටෙලිනාට්‍ය නිර්මාණකරුවෙක් විදියටත් අපට හමුවෙනවා?
වස්සාන ප්‍රේමය, සිල්ලර සමනල්ලු, ජනගත වුණු ජනප්‍රියම මෙගා ටෙලිනාට්‍ය මම නිර්මාණය කළා. ‘චක්‍ර’ ටෙලිනාට්‍යයට ලොකු ප්‍රතිචාරයක් ලැබුණේ නැහැ. මෙයට කලින් මම නිර්මාණය කළ ‘ප්‍රාණ’ ටෙලිනාට්‍යය වෙනස් අදහසකින් තමයි මම නිර්මාණය කළේ. මින් ඉදිරියට මගේ අතින් මෙගා ටෙලිනාට්‍ය නිර්මාණය බිහි නොවේවි. වෘත්තීයමය පැත්තෙන් පැවැත්මක් විදියට මමත් මෙගා නාට්‍ය හැදුවා. මේ මගේ වෙනසත් සමඟ මගෙන් හොඳ නිර්මාණ පමණක් ඉදිරියේදී ඔබට දැකබලා ගන්නට පුළුවන් වෙයි.
70 දශකයේ තිබුණු සිනමා රූපීයකරණය හා බැඳුණු සිනමා රූපීයකරණයක් ජූලි 7 ඔබේ චිත්‍රපටය හරහා අප දුටුවා. ඒත් පසුකාලීනව සිනමාකරණයෙන් ඔබ ගිලිහී ගිහින්?
පසුගිය කාලේ සිනමා කර්මාන්තයේ තිබුණු ප්‍රශ්නත් එක්ක අපි හිටියෙ ලොකු අර්බුදයක. නිර්මාණ කරලා තිරගත කරගන්න බැරි වුණා. ඒ නිසා මම චිත්‍රපට හැදුවේ නැහැ. මේ වසරේ බොහෝ දුරට මම චිත්‍රපටයක් නිර්මාණය කරාවි.
වසන්ත විතාරණගේ