ප්රවීණ රංගන ශිල්පී විජය නන්දසිරිගේ ආදරණීය පුතණුවන් රසාංජන නන්දසිරි පියා ගමන්ගත් මඟ තවත් ඉදිරියට යෑමට සිහින දකින කෙනෙක්. ඔහු නළුවකු බවට පත්වන්නේ ඔහුගේ පියාණන්ගේ ‘කුස පබාවතී’ වේදිකා නාට්ය හරහා. එතැනින් පටන්ගත් ඔහුගේ ගමන හිටි හැටියේම නතරවන බවක් අපට පෙනුණා. අප ඒ පිළිබඳ විමසීමක් කළා.
රසාංජන වේදිකාවට සමුදුන්නාද?
තාත්තාගේ වේදිකා නාට්යවල මම රඟපෑවා. ඒත් පසුගිය කාලේ රටේ ඇතිවුණ විපර්යාසය නිසා එය අපටත් බලපෑවා.
ඒ කියන්නේ ඔබ ඉදිරියේදී තාත්තාගේ අඩුව පුරවනවා?
තාත්තාගේ අඩුව මට හෝ වෙනත් කිසිම කලා ශිල්පියකුට පුරවන්න ලැබෙයි කියලා මම හිතන්නේ නැහැ. හැබැයි තාත්තාගේ වේදිකා නාට්ය තාත්තා රඟපෑ චරිත මම නිරූපණය කරනවා.
පසුගිය වසරේ ‘කුස පබාවතී’ නැවැත වේදිකාවට ගේනවා. කොහොමද ලැබුණ ප්රතිචාර?
අපි හිතුවාට වඩා හොඳ ප්රතිචාර ලැබුණා. මම ‘කුස පබාවතී’ වේදිකා නාට්යයේ ජයම්පතිගේ චරිතය නිරූපණය කළා. මම හිතුවේ නැහැ මට ඒ තරම් හොඳට ප්රතිචාර ලැබෙයි කියලා. අනෙක මම ප්රධාන චරිතයක් රඟපාපු පළමු අවස්ථාව. හැමෝම කිව්වා මම හොඳට රඟපෑවා කියලා. ඉතින් මට තාත්තා තරම් රඟපාන්න බැරිවෙයි. නමුත් මම උත්සාහ කරනවා සාර්ථකව ඒ චරිත රඟපාන්න.
ඔබට හාස්ය චරිත නිරූපණය කළ හැකිද?
ඔය අහන්නේ මගේ තාත්තා හාස්ය චරිත නිරූපණය කළ නිසා. නමුත් විජය නන්දසිරි මගේ තාත්තා හාස්ය නළුවෙක් නොවේ. ඔහු චරිතාංග රංගන ශිල්පියෙක්. තාත්තා අවසාන කාල වකවානුවේ හාස්ය චරිත නිරූපණය කළා. නමුත් ඔහු කොපි කිරීමක් කළේ නැහැ. කාලයක් පුහුණුවීම් කරලා ඔහු හදාගත්ත හාස්ය රසයක් තමයි නිර්මාණය කළේ.
ඉදිරියේදී ඔබ සිනමා තරුවක් වීමටත් සූදානම්ලු නේද?
ගිරිරාජ් කෞශල්ය අධ්යක්ෂණය කළ ‘හතුරු මිතුරු’ චිත්රපටයේ මම ප්රධාන චරිතය රඟපානවා. මගේ තාත්තා විදියට රඟපාන්නේ අභාවප්රාප්ත ප්රවීණ රංගන ශිල්පී ජයලත් මනෝරත්න තමයි. ප්රවීණ ශිල්පීන් රැසක් සමඟ මම වැඩ කරනවා. වෙලාවකට හිතෙනවා තව ටිකක් වේදිකාවේ ඉඳලාම සිනමාවට ආවා නම් හොඳයි කියලා. මොකද මට වේදිකාවෙන් ඉගෙනගන්න ගොඩක් දේවල් තිබෙන නිසා.
ඔබට රඟපෑම විතරක් නෙවේ තවත් සහජ කුසලතා තිබෙන බව අප දන්නවා?
ගායනය, නර්තනය, වාදනය මේ හැම දේම මට ලැබුණේ මගේ පවුලේ අභාසයෙන් තමයි. මම එය වැඩිදුරටත් හැදෑරීම් කරලා ප්රගුණ කරගත්තා.
මේ ගෙවෙන ජීවිතය ගැන මොකද හිතෙන්නේ?
ගෙවෙන ජීවිතය හරිම සුන්දරයි. නමුත් තාත්තා නැති අඩුව මටත්, මගේ අම්මටත් පවුලෙ අපටත් තදින්ම දැනෙනවා. ඒක අමතක වෙන්නෙ නෑ කවදාවත්.
ඉදිරි සැලැසුම?
තාත්තා නිර්මාණය කළ අලුත් වේදිකා නාට්ය පිටපත් කිහිපයක් තිබෙනවා. හිතාගෙන ඉන්නේ ඒ නිර්මාණ සහ නතර වුණ අනෙකුත් වේදිකා නාට්ය ටිකත් රට පුරා වේදිකාගත කරන්න තමයි. ඒත් දැන්ම නෙමේ. මේ දවස්වල මම අම්මා සමඟ ඒ ගැන කතා කරගෙන යනවා. මමයි, අම්මයි මූලික වෙලා නැවැත වේදිකාවට නිර්මාණ ගේනවා සුදුසු කාලය ආවාම.
වසන්ත විතාරණගේ
