තවත් එක් ජනාධිපතිවරණයක මත විමසීමේ සටන ආරම්භ වී ඇත. තමාට ආවේණික වූ පාට අනුව, පක්ෂ අනුව ජනාධිපති කිරුළ දැරීමේ ජයග්රාහී සිහිනය දකින නායකයන් සමඟ එක්වුණු විවිධ මට්ටමේ දරදිය අදින්නන්ද මෙවැනි ඡන්ද සටනකදී දැකිය හැකි සුලබ දසුනකි.
ජනප්රිය කලාකරුවන් මෙහිදී සුවිශේෂී වෙයි.
කොහොමත් තරමක් මෑත යුගයක සිට සුපිරි කලාකරුවන් දේශපාලන නායකයන් හට සහාය දීම විලාසිතාවක් තරමට ජනප්රියව ඇත. එහෙමත් නැතිනම් රැල්ලක්ව ඇත. තවත් ආකාරයට වැදගැම්මක් නැති වචන කිහිපයකින් කියනවා නම් එතැනදී සිදුවන්නේ “කඬේ යෑමකි.”කෙසේ වුවද අප ඔබෙන් මෙහෙම අහන්නම්.
සුපිරි තරු සටනට පැමිණි පමණින් දේශපාලන නායකයකුට තම ජයග්රාහී කිරුළ දිනාගත හැකිද? මෙහිදී ඔබේ උත්තරය කුමක් විය හැකි දැයි අප නොදනිමු. හැබැයි එයට සුදුසුම පිළිතුර වන්නේ,
“අපොයි ඔව්” යන සරල වචන දෙකය. ඇතැම් විට වචන දෙකකුත් අවැසි නැති තරම්ය.
මන්දයත්,
පසුගිය ඉන්දීය මැතිවරණය දෙස “තර්ඞ් අම්පයර්” විදියට බලනවා නම් ඉහත ප්රශ්නයට පිළිතුර වන්නේ,
“එකෙන්ම” යන්නය.
ඇත්තටම නරේන්ද්ර මෝදි දිනුවේ සුපිරි තරු ඔහු වටා එක්රොක් වූ නිසාමද?
නැවතිල්ලේ මඳක් සිතා බැලුවහොත් බොහෝ විට එය එහෙමය. ඕනෑ තරම් සාක්ෂිද ඒ සඳහා දෙන්නට පුළුවන.
දීපිකා පදුකෝන්ගේ ආදරය දිනූ රන්වීර් සිංග් මෝදිව කරේ තියාගෙන ඡන්ද සටන මෙහෙය වූ විලාසය අතිශයින්ම හැඟීම්බර විය. කැම්පේන් එකේදී නරේන්ද්ර මෝදි කොතැනද? රන්බීර් නැති තැනක් සොයා ගැනීම අපහසු විය. කොච්චර දරදිය ඇදීමක් මෝදි වෙනුවෙන් රන්බීර් කළාද කියනවා නම්, මිලියන 22ක් වූ ඔහුට ළැදි ඉන්ස්ටග්රෑම් අනුගාමිකයන්ගෙන් ඔහු ඉල්ලා සිටියේ මෝදි වෙනුවෙන් කතිරය ගසන ලෙසය. මෝදිත් තමාත් ඉතාම සමීපව වැළඳගෙන සිටින සේයාරුවක්ද සිය ඉන්ස්ටර්ග්රෑම් ගිණුමට දැමූ රන්බීර් එහි මෙසේද සටහන් කළේය.
“ඔබ මට මනාප වන්නේ නම්, මම මනාප අයකු කෙරෙහි ඔබ අමනාප නොවනු ඇත. ධනාත්මක වූ චින්තනයකින් හෙබි මේ කදිම මිනිසා වෙනුවෙන් ඔබෙ ඡන්දය දෙන්න.”
රන්වීර්ගේ ඉල්ලීම හමුවේ මිලියන 3කට වැඩි අනුගාමිකයන් සිය සතුට සමඟ එයට අනුමැතිය පළකොට තිබිණි.
2019 ජනවාරි 10 වැනිදා නරේන්ද්ර මෝදි වෙනුවෙන් පැවති මහා රැස්වීම සංවිධාන කළේ ප්රවීණ චිත්රපට නිෂ්පාදක මහාවීර් ජේන්ය. ඉතා අඩුවෙන් කතාකරන අයකු වූ මහාවිර් ජේන් වේදිකාවට පැමිණ මෝදි වෙනුවෙන් කතා කළේ වචන කිහිපයකි.
ඔබේ නායකයා විය යුත්තේ මේ අපූරු මිනිසාමය, ඒ ඇයිද? නරේන්ද්ර මෝදි නම් ඔහු ඉන්දීය සංස්කෘතියටත්, සාරධර්මවලටත් ගරු කරන නිසාය.
මම එතුමාගෙන් ඇහුවා ඔබට මගෙන් ඕනෑ මොනවාදැයි කියා. එවිට මේ දේශප්රේමියා මා හා කීවේ “මා වෙනුවෙන් කිසිවක් අවශ්ය නැහැ… හැකිනම් ඉන්දියානු චිත්රපට තුළ හැකි පමණ සාරධර්ම, සංස්කෘතිය සහ දේශප්රේමය හුවා දක්වන නිර්මාණ කරන්නට” යැයි කියාය.
“ඉතින් නරේන්ද්ර මෝදි මහතා ගැන තව කයිවාරු කතා කුමට පවසන්නද?”
මහවීර් තම කතාවට එතැනින්ම නිමාව තැබුවේය. එයට ලැබුණු “හුරේ පාර” සහ ඔල්වරසන් හඬම මෝදි දිනන බව එදා සනාථ කළේය.
ඉන්දියාවේ සති අග පුවත්පතක පළවූ එක් ප්රවෘත්තියක් තුළ ලියැවුණේ මැතිවරණයට සති තුන හතරකට පළමුව මෝදි සුපිරි උතුරු ඉන්දීය කාන්තාවක් සමඟ පෞද්ගලික ජෙට් යානයක ගොස් ඔවුන්ගේ සමීපතම ප්රේක්ෂකයන් හමුවී කතාබහ කළ ආරංචියකි.
එලෙසම හැකි සෑම අවස්ථාවකම මෝදි, තමාව හමුවීමට නිතර පැමිණෙන සුපිරි තාරකාවන් වෙනුවෙන් කාලය වෙන්කර තැබුවේය. ඒ විතරක් නොවේ ගැටවර කොල්ලකු සේ ඔවුන් හා සෙල්ෆිවලටද සතුටින් පෙනී සිටියේය. සමාජ ජාල මාධ්ය ඔස්සේ ඒවා පළ වූයේ දසදහස් ගණන් “ඛසනැ” සමගය.
වැඩි වෙහෙසක් නැතිව එතැනින්ද මෝදිට විශාල ඡන්ද ගණනක අනුමැතිය ලැබිණි.
ජනප්රිය මෙන්ම ප්රවීණ චිත්රපට අධ්යක්ෂ කරන් ජොහාර් මෝදි හමුවේ ඉතා ප්රියජනක මෙහෙවරක් දියත් කර තිබිණි.
සිය ඉන්ස්ටර්ග්රෑම් ගිණුමෙහි කරන් සටහන් කළේ,
“නව ඉන්දියාවක් පරිවර්තනය කිරීමට තිබෙන කැමැත්ත හේතු කොටගෙන අප මහා වෘක්ෂයක් බඳු වූ මේ ධනාත්මක මිනිසා සමඟ පෙළගැසුණෙමු” යන්නයි.
ඒ සමගම සුපිරි තරුවලට මැදිව ජයග්රාහී ලෙස සිනාසෙන නරේන්ද්ර සිං මෝදිගේ සෙල්ෆියක්ද දැමුවේය.
මෝදිට ජය පතමින් මිලියනයකටත් වැඩි මනාප තොගයක් ඒ සුන්දර සෙල්ෆියට “ඛසනැ” කර තිබිණි.
කිසිදුම ප්රතිවාදියකු සමඟ තමාට ගේමක් නැති බව මෝදිට නොහිතුණා නම් පුදුමය.
සුපිරි තාරකාවන් වෙනුවෙන් මෝදි යම් වේතනයක් ගෙවූවද නොගෙව්වද සුපිරි තාරකාවන් ඡන්ද සටන නිමවන තුරු ඔහුව මුරුංගා අත්තෙන් බිමට කඩාවැටෙන්නට දුන්නේ නැත.
අවසානය සුබදායක විය. නරේන්ද්ර මෝදි සිය ප්රතිවාදීන්ට දවල් තරු පෙන්වන තරමේ ජයග්රහණයකට පියවර තබා තිබිණි.
ඒ සුපිරි තාරකාවල අනුහසින්ද?
ඒක නම් කියන්නට දන්නේ නැත. හැබැයි බොහෝ සමාජ ජාල වෙබ් අඩවිවල පළවූයේ වයස අවුරුදු 35ට අඩු ඡන්දවලින් කොටසක් මෝදිට ලැබුණේ සුපිරි තාරකාවල ආකර්ෂණය හෝ අනුමැතිය නිසාම බවය.
දමයන්ති රේණුකා ප්රනාන්දු