උතුරු ඉන්දීය සිනමාවට මෙන්ම දකුණු ඉන්දියානු සිනමාවටද කවදාවත්ම තරු හිඟයක් ඇති වූයේ නැත. හිතුමතේට සළුපිළි උනාදමන කෙල්ලන් මෙන්ම විවිධ ආකාරයේ කඩවසම් බවින් සපිරුණු කොල්ලන්ද ඒ අතර ඕනෑ තරම් සිටියහ. විශේෂයෙන්ම ඛාන් පරපුර කෙමෙන් කෙමෙන් ඉරිතළා යන්නට තනන ආරම්භයේදී තරුණ නළු කාණ්ඩයක් සිනමාව තුළට කඩාවැදිණි. ඔවුන් කාර්යශූරය. පිරිමියකුට තිබිය යුතු කඩවසම් බවින් අනූන විය. සුපිරි තරු පොරයට වුවද ඇදදැමිය හැකි පමණට ස්ත්රී ආකර්ෂණයද දිනාගෙන අවසානය. වැදගත්ම කාරණය වන්නේ, එම කාණ්ඩය අතර සිටින නළුවන් චරිතාංග මට්ටමේ රංගන හැකියාවකින් යුතු අතිදක්ෂ රංගවේදීන්ය. ඒ සඳහා වන හොඳම නිදසුන වන්නේ ඔවුන් ජාතික සම්මානයෙන් පුද ලැබූවන් වන නිසාය. එලෙසම එයින් එක් අයකු ගෙන දක්ෂම අය මොහු යැයි කියන්නට බැරි තරමට ඔවුන් සියල්ලම තම තමාට ආවේණික රංග ශෛලීයන්ගෙන් යුක්තය.
පළමුව අප විකී කෞශාල් ගැන කතා කරමු.
විකීගේ කඩවසම් බව ස්ත්රී සිත් නළවා තබයි. ඇදේට වගේ ඔහු බලන බැල්ම ආනන්දනීයය. 31 හැවිරිදි වුවද විකීගේ පෙනුම බොහෝ විට අවුරුදු 25ක් වැනිය. පාසල් යන බාලිකාවන්ද විකීට ට්විටර් පණිවුඩ තබන්නේ ඒකය.
ඛාන් පරපුරට විකීගෙන් පැමිණි ප්රබලතම ප්රහාරය වන්නේ ඉතා අඩු වයසකදී වාගේම අඩු කාලයකදී ඔහු සම්මානවලටද පාත්ර වීමයි.
එය පමණක් නොව විකී සම්මාන කිහිපයකින් තම වීදුරු රාක්කය පිරවීමටද සමත් විය.
වාණිජ රැල්ල සේම සම්භාවනීය සිනමාවද විකී ජයගත්තේ ඉතාම පහසුවෙනි.“Gangs of Wasseypur සහ Treyler” යන චිත්රපට තුළින් ඉක්මන් ජනතා ආකර්ෂණයකට මැදිවූ විකී කෞශාල්, සාර්ථක චරිත නිරූපණයකට මැදිවීම සඳහා තමා මොන තරම් කැපවන්නේදැයි සාක්ෂි පිටම ඉදිරිපත් කළේ යම් චරිත නිරූපණයක් සඳහා තමා වෙහෙස වී සකසාගත් සමබර සිරුර කිලෝ 20කින් බැස්සවීමෙනි.
ආයුෂ්මන් කුරානාද මේ අලුත් නළු කැලෙහි තවත් එක් වීරයෙකි.
මනා කඩවසම් බවින් යුතු හෙතෙම ඇදවැටී යන ඛාන් පරපුර හරහා තම රාජධානිය ගොඩනැඟීමට තම හැඩකාර රූපකාය පමණක්ම නොව සහජ හැකියාවද ඉන්දීය සිනමාවට ලෝභකමක් නැතිව දායාද කළේය. නළුකමට පමණක් නොව දෙසවන පිනවන මිහිරි සංගීතයටද තමන් අතිදක්ෂ වග මොනවට කියාපෑවේය.
“Dream Girl” චිත්රපටය තුළින් නිෂ්පාදකවරයාව බොක්ස් ඔෆීස් අසුනක ඉන්දවා ෆිල්ම් ෆෙයාර් සම්මානය දිනාගත් ආයුෂ්මන් කුරානා සම්භාව්ය චිත්රපට කිහිපයක නියෝජනය මත ජාතික සම්මානයද දෝතට ගත්තේය. ආයුෂ්මන් රඟපෑ Andhadhun චිත්රපටය සම්භාව්ය මෙන්ම බොක්ස් ඔෆිස් වාර්තාද පිහිටුවූ චිත්රපටයක් විය.
එපමණක් නොව සිය මධුර හඬින්ද ප්රේක්ෂකයන් පිනවූ ආයුෂ්මන් හොඳම පසුබිම් ගායකයා ලෙසද ජාතික සම්මාන දිනා ගත්තේය.
ආයුෂ්මන් තම චිත්රපටයට සම්බන්ධකර ගන්නා සිනමාකරුවන්ට බොහෝ විට හිස් අතින් ගෙදර යන්නට වූයේ නැත. සම්භාව්ය සිනමාව තුළින් ආයුෂ්මන් ඔවුන්ට සම්මාන පොරයට එක්කළේය. වාණිජ සිනමාපට තුළින් මුදල් නෝට්ටු කන්ටේනර් ගණන් පුරවා දුන්නේය.
ඉතින්…’
ඛාන් පරපුරෙන් හිස්වූ සිනමාවේ සමහර තැන් පිරවීමට ඔහු කෙසේවත් සුදුස්සෙක් නොවන්නේ යැයි කිව හැක්කේ කාටද?
මේ පිවිසෙන්නේ තවත් අතිදක්ෂ චරිතාංග නළුවකු ගැන තොරතුරු කියන්නටය.
35 වැනි වියෙහි පසුවන ඔහු “රාජ් කුමාර් රාඕය.”
උතුරු ඉන්දීය සිනමාවට පය තබන විට රාජ් නම කියැවුණේ රාජ් යාදෙව් ලෙස වුවද පසු කලෙක ඔහු රාජ් කුමාර් රාඕ විය.
ඔහුටද තිබුණේ හොඳ අපූරු පිරිමි පෙනුමකි. යන්තමට වාගේ ඉස්මතු වන රාජ්ගේ හැඩි දැඩි දඩබ්බර පෙනුමටද ගැහැනු සේම පිරිමිද ප්රිය කළහ.
රූපවාහිනී සම්මුඛ සාකච්ඡාවකදී ප්රවීණ චිත්රපට අධ්යක්ෂ මහේෂ් බාට් කියා තිබුණේ “රාජ් කුමාර් රාඕ” මතක සිටින යමක් කළ හැකි දක්ෂ චරිතාංග නළුවකු කියාය.
මහේෂ් බාට් මෙන්ම රමේෂ් සිප්පිද රාජ් කුමාර්ව තම චිත්රපටවලට ගැන්මට බොහෝ විට දැඩි කැමැත්තක් පෑවේ ඔහු බිහිසුණු අවස්ථාවන් සඳහාද නොබියව ඉදිරිපත් වන නිසාය.
හොඳම නළු සම්මාන පොරයේදී ෆිල්ම් ෆෙයාර් වේදිකාවේ වාගේම ජාතික සම්මාන වේදිකාවේද රාජ් කුමාර් රාඕගේ නාමය බොහෝ විට රැව් දුන්නේය.
සහාය සහ හොඳම නළුවා ලෙස සම්මාන කිහිපයකටම හිමිකම් කීමට වාසනාවන්ත වූ රාජ් සම්මාන නාමයෝජනා සඳහාද නිතර නම සඳහන් වූ අයෙකි.
Thalash 2, Stree 3 Hamari Adhuri 4 සහ Raabta යන සිනමාපටවල සුවිශේෂී මතක සටහන් තැබූ රාජ් කුමාර්, රිෂි කපූර් සහ නිතූ සිංග්ගේ කුලුපගම මිත්රයෙකි.
දමයන්ති රේණුකා ප්රනාන්දු