චීන තානාපතිවරයා පසුගියදා ජවිපෙ උතුරේ ලද ජයග්රහණය ගැන දැඩි සතුටකින් කතා කර තිබිණී. චීන තානාපතිවරයා පවසා තිබුණේ චීනය උතුරේ ජනතාවට සහන ව්යාපෘති පටන්ගැනීමට සූදානම් වුණත් උතුරේ දේශපාලනඥයන් එයට ඉඩ නොදුන්න බවය. ඔහු උතුරේ දේශපාලනඥයන් ලෙස සඳහන් කළේ ටී.එන්.ඒ. දේශපාලනඥයන් ගැන විය යුතුය. ඔහු වක්රව චෝදනා කළේ පිටස්තර බලවේග මෙම උතුරේ දේශපාලනඥයන්ට බලපෑම් කොට චීන ව්යාපෘති නතර කරන බවය. චීන තානාපතිවරයා පිටස්තර බලවේග යැයි කීවේ ඉන්දියාවට විය හැකිය. ඔහු වෙනත් වචනවලින් කියන්නේ ඉන්දියාවේ උපදෙස් අනුව උතුරේ දේශපාලනය කරන දමිළ දේශපාලනඥයන් පරාජය වීම චීනයේ ජයග්රහණයක් කියාය. (Sri Lanka Latest News)
චීනය යුද්ධයේදී සහාය දුන්නේ හමුදාවටය. ලොව අනෙක් රටවල් මානව හිමිකම් චෝදනා නිසා යුද්ධය සඳහා ලංකාවේ හමුදාවට ආයුධ විකිණීම තහනම් කරද්දී චීනය ආයුධ වික්කේය. ඒ වගේම යුද්ධය අවසන් වූවාට පසු යුද්ධයේදී සිදුවූ මානව හිමිකම් උල්ලංඝනය වීම්වලට එරෙහිව බටහිර රටවල් ලංකා ආණ්ඩුවට එරෙහිව එක්සත් ජාතීන්ගේ මානව හිමිකම් කවුන්සිලයේ යෝජනා සම්මත කරද්දී චීනය එම යෝජනාවලට එරෙහිව ලංකාවේ ආණ්ඩුවට පක්ෂව ඡන්දය දුන්නේය. මේ නිසාම උතුරේ දමිළ ජනතාවත් දමිළ දේශපාලන පක්ෂත් චීනය දෙස බලන්නේ වපර ඇසිනි. යුද්ධය අවසන් වීමෙන් පසු මහින්දගේ ආණ්ඩු කාලයේ චීන තානාපති පළමු වරට ටී.එන්.ඒ. මන්ත්රීවරු හමුවී උතුරට ගොස් උතුරේ පටන්ගත හැකි ව්යාපෘති ගැන සොයා බලන්න විය. ගෝඨාභය ජනාධිපති වූ පසු චීන තානාපතිවරයා උතුරේ දමිළ ජාතික ඇඳුම ඇඳගෙන උතුරේ සංචාරය කළේය. උතුරේ කෝවිල්වලට ගොස් වන්දනා කළේය. චීන තානාපතිගේ මේ පී.ආර්. කැම්පේන් එකට පසු චීනය යාපන දූපත්වල බලශක්ති ව්යාපෘති පටන්ගන්න යෝජනා ඉදිරිපත් කළේය. චීනයේ මෙම ව්යාපෘති ඉන්දියාවේ ආරක්ෂාවට තර්ජනයක් යැයි කියා ඉන්දියාව ලංකා ආණ්ඩුවට සිය නොසතුට පළකරනු ලැබීමෙන් පසු ගෝඨාගේ ආණ්ඩුව උතුරේ චීන ව්යාපෘතිවලට අවසර දුන්නේ නැත.
ඒත් චීනය උතුර අතහැරියේ නැත. චීන තානාපති උතුරේ ධීවරයන්ට සහ උතුරේ ජනතාවට සහන බෙදන්න පටන්ගත්තේය. චීනයේ උපාය වන්නට ඇත්තේ ජනතා හිත දිනාගෙන ජනතාව ලවා උතුරේ දේශපාලනඥයන්ට චීනය සමග ගනුදෙනු කරන්න බලපෑම් කිරීමය. චීනය පසුගිය කාලයේ මේ සහන වැඩපිළිවෙළ දිගටම ක්රියාත්මක කළේය. 2024 මහ මැතිවරණයේදී උතුරේ ජනතාව උතුරේ දේශපාලන පක්ෂ ප්රතික්ෂේප කොට ජවිපෙ අපේක්ෂකයන්ට ඡන්දය පාවිච්චි කළහ. දැන් චීනය හිතන්නේ උතුරේ පක්ෂවලට තවදුරටත් උතුරේ ජනතාව මෙහෙයවන්න හැකියාවක් නැති බවත්, දැන් චීනයට උතුරේ ජනතාව සමග ඍජුව ගනුදෙනු කොට චීන ව්යාපෘති යළි පටන්ගන්න පුළුවන් වනු ඇතැයි කියාය.
දකුණේ සිංහල පක්ෂ සිය පක්ෂයේ අපේක්ෂකයන් උතුරේ ජයග්රහණය කළ ප්රථම අවස්ථාව මෙය නොවේ. යූ.ඇන්.පී.යෙන් මීට පෙර උතුරේ මන්ත්රීවරු තේරීපත් විය. ජවිපෙ යාපනය වැනි උතුරේ දිස්ත්රික්ක ජයගැනීම විශාල ජයග්රහණයකි. ජවිපෙ උතුරේ මෙවැනි ජයග්රහණක් ලබාගැනීමට හේතු වී ඇත්තේ උතුරේ ප්රධාන දේශපාලන පක්ෂවල තිබෙන බෙදීම්ය. උදාහරණයක් ලෙස ජවිපෙ යාපනය දිස්ත්රික්කයෙන් ගත්තේ ඡන්ද 80,830කි. අනෙකුත් දමිළ පක්ෂ යාපනයේ ඡන්ද 1,27,121ක් ලබාගත්හ. මෙයින් පේන්නේ දමිළ පක්ෂවල බෙදීම ජවිපෙ වාසියට හේතු වී ඇති බවය. මෙයින් උතුරේ සාම්ප්රදායික දමිළ පක්ෂ සහ දේශපාලනඥයන්ගේ දේශපාලනය අවසන් යැයි චීන තානාපතිවරයා සිතනවා නම් එය වැරැදිය. ඉන්දියාවත් සමග සමීප සබඳකම් පවත්වන උතුරේ දමිළ පක්ෂ පරාජය වීමෙන් උතුරේ ජනතාව ඉන්දියාවට විරෝධය පළකොට ඇතැයි චීන තානාපති හිතනවා නම් එයත් වැරැදිය.
