ජනාධිපති ගෝඨාභය රාජපක්ෂ මහතා පෞද්ගලික සංචාරයක් සඳහා සිංගප්පූරුව බලා පිටත්ව ගියේ ඉකුත් 13 වැනිදා අලුයම් කාලයේදීය. දේශපාලන නායකයන් විදේශ සංචාරවල නිරත වීම සාමාන්ය දෙයක් වුවද, ගෝඨාභය රාජපක්ෂ මහතා එවැනි සංචාරවල නිරත වන්නේ ඉතාම අඩු වශයෙනි. එබැවින් ජනාධිපතිවරයාගේ හදිසි සංචාරය පිළිබඳ බොහෝ දෙනාගේ අවධානය යොමු විය.
පසුව වාර්තා වූ ආකාරයට ජනාධිපති ගෝඨාභය රාජපක්ෂ මහතා හදිසියේ සිංගප්පූරුව බලා පිටත්ව ගොස් ඇත්තේ මව්න්ට් එලිසබෙත් රෝහලේදී පරීක්ෂණ සහ වෛද්ය සායන කිහිපයකට සහභාගි වීම සඳහාය. ඒ 2019 වසරේදී එම රෝහලේදී ගෝඨාභය රාජපක්ෂ මහතාට සිදු කළ හෘද සැත්කමේ පසු පරීක්ෂණයන් සඳහාය. එම පරීක්ෂණ සහ සායනවලට සහභාගි වීමෙන් අනතුරුව ජනාධිපතිවරයා මේ වන විට නැවත ශ්රී ලංකාවටද පැමිණ ඇත.
මේ සිද්ධියෙන් අනතුරුව සිංගප්පූරුවේ මව්න්ට් එලිසබෙත් රෝහල පිළිබඳ කතාබහක් නැවතත් සමාජය තුළ මතුව ඇත. ඒ අපේ රටේ මෙතරම් දියුණු සෞඛ්ය සේවයක් තිබෙනවා යැයි කියන දේශපාලන නායකන්ම ප්රතිකාර ලබා ගැනීම සඳහා මව්න්ට් එලිසබෙත් රෝහල කරා ගමන් කිරීම නිසාය.
වර්තමාන ජනාධිපති ගෝඨාභය රාජපක්ෂ මහතා මව්න්ට් එලිසබෙත් රෝහලේදී හෘද රෝග සැත්කමකට භාජනය වූයේ ජනාධිපතිවරණයට දින නියම වීමට ඔන්න මෙන්න කියා තිබියදීය. සැත්කමෙන් අනතුරුව සති දෙකක පමණ කාලයක් ඒ මහතා එම රෝහලේ නැවතී සිටි බවද වාර්තා විය. එහිදී රාජපක්ෂ මහතාට එම සැත්කම සිදු කළ තිබුණේ ශ්රී ලංකාවේ උපත ලබා මේ වන විට සිංගප්පූරුවේ පදිංචි වී සිටින හෘද රෝග විශේෂඥයෙකු වන වෛද්ය කුමාරස්වාමි සිවදාසන් මහතා විසින් වීමද විශේෂත්වයකි.
මව්න්ට් එලිසබෙත් රෝහල අපේ රටේ ජනතාව අතර ප්රකටව ඇත්තේ දේශපාලනඥයන් ප්රතිකාර ලබා ගැනීම සඳහා නිරන්තරයෙන් යන එන තැනක් ලෙසිනි. වර්තමාන ජනාධිපති ගෝඨාභය රාජපක්ෂ මහතා පමණක් නොව අපේ රටේ දේශපාලනඥයන් බොහෝ දෙනකු එම රෝහලින් ප්රතිකාර ලබා ගෙන ඇත.
2019 වසරේ පාස්කු ප්රහාරය සිදුවන අවස්ථාවේ එවකට ජනාධිපතිවරයා වූ මෛත්රීපාල සිරිසේන මහතා සිටියේද සිංගප්පූරුවේ මවුන්ට් එලිසබෙත් රෝහලේ ප්රතිකාර ලබමිනි. එමෙන්ම යහපාලන රජයේ සෞඛ්ය ඇමැතිවරයා ලෙස කටයුතු කළ රාජිත සේනාරත්න මහතා දින කිහිපයක් මවුන්ට් එලිසබෙත් රෝහලේ නේවාසිකව ප්රතිකාර ගැනීම ඒ දිනවල දැඩි ආන්දෝලනයක් ඇති කළ සිදුවීමක් විය. සේනාරත්න මහතාගේ සුවදුක් විමසීම සඳහා ජනාධිපති මෛත්රීපාල සිරිසේන මහතාද සිංගප්පූරුව බලා පිටත්ව ගිය ආකාරය මාධ්ය වාර්තා කළේය.
මවුන්ට් එලිසබෙත් රෝහලෙන් ප්රතිකාර ලබා ගත් දේශපාලනඥයන් සම්බන්ධයෙන් විමසීමේදී එම ලැයිස්තුව ඉතා දිග එකකි. වර්තමාන කෘෂිකර්ම අමාත්ය මහින්දානන්ද අළුත්ගමගේ මහතා විපක්ෂයේ සිටියදී අධිකරණ අවසරයක් ලබා ගනිමින් සිංගප්පූරුව බලා පිටත් වූයේ මවුන්ට් එලිසබෙත් රෝහලෙන් ප්රතිකාර ලබා ගැනීම සඳහාය. එවකට අග්රාමාත්යවරයා වූ රනිල් වික්රමසිංහ මහතාද කිහිපවරක්ම මවුන්ට් එලිසබෙත් රෝහලෙන් ප්රතිකාර ලබා ගත් බව අපට මතකය.
මවුන්ට් එලිසබෙත් රෝහල ගැන කතා කිරීමේදී මතකයට නැඟෙන තවත් විශේෂිත පුද්ගලයෙකු වන්නේ නිවාස සංවර්ධන අධිකාරියේ වර්තමාන සභාපති දුමින්ද සිල්වා මහතාය. භාරත ලක්ෂ්මන් ප්රේමචන්ද්ර මහතාගේ ආධාරකරුවන් සමඟ ඇති වූ ගැටුමේදී තුවාල සිදු වූ දුමින්ද සිල්වා මහතාව ප්රතිකාර සඳහා පිටත් කළේද මවුන්ට් එලිසබෙත් රෝහල වෙතටය. ඒ සඳහා අවශ්ය කඩිනම් පහසුකම් සපයාදීමට එවකට ආරක්ෂක ලේකම්වරයා වූ ගෝඨාභය රාජපක්ෂ මහතා වහ වහා මැදිහත් වූ බවද ප්රසිද්ධ කාරණයකි.
මවුන්ට් එලිසබෙත් රෝහල ප්රසිද්ධව ඇත්තේ අපේ රටේ දේශපාලනඥයන් සම්බන්ධයෙන් පමණක් නොවේ. ප්රසිද්ධ ආගමික නායකයන් කිහිප දෙනකුද ඉන් ප්රතිකාර ලබා ගෙන ඇත. ගංගාරාමයේ පොඩි හාමුදුරුවෝ ලෙස හැඳින්වෙන ගලගොඩ ඥානිස්සර හිමියෝ දිගු කාලයක් මවුන්ට් එලිසබෙත් රෝහලේ නැවතී ප්රතිකාර ගත්හ. එමෙන්ම 2015 ආණ්ඩු මාරුවේ ප්රධාන මෙහෙයුම්කරු ලෙස හැඳින්වෙන පූජ්ය මාදුළුවාවේ සෝභිත හිමිපාණන් අපවත් වූයේද සිංගප්පූරුවේ මවුන්ට් එලිසබෙත් රෝහලේදීමය.
ශ්රී ලංකාවේ පමණක් නොව ඉන්දියාව, පාකිස්ථානය වැනි රටවල දේශපාලන නායකයන් සහ ජනප්රිය නළු නිළියන් ඇතුළු බලවතුන් නිතර ප්රතිකාර ලබා ගන්නා රෝහලක් ලෙස මවුන්ට් එලිසබත් ජනප්රියත්වයට පත් වී ඇත.
ලෝකය පුරා මෙතරම් ජනප්රිය මවුන්ට් එලිසබෙත් රෝහල මුලින්ම ආරම්භ කර ඇත්තේ 1979 වසරේ දෙසැම්බර් 08 වැනිදාය. එහි ඉදිකිරීම් කටයුතු 1976 වසරේ ආරම්භ වී ඇති අතර වසර තුනකට පසුව නවීන පන්නයේ ජාත්යන්තර රෝහලක් ලෝකයට දායාද කිරීමට සිංගප්පූරුවට හැකි විය.
1995 වසරේදී මැලේසියාව මුල් කර ගත් සිංගප්පූරු සමාගමක් වන පාක්වේ හෝල්ඩින්ග්ස් නැමැති වෛද්ය සේවා සමාගමක් විසින් මෙහි හිමිකාරිත්වය පවරා ගත් අතර මේ වන විට මවුන්ට් එලිසබෙත් නාමය යටතේ ක්රියාත්මක වන රෝහල් දෙකක් එම සමාගම සතුය. ඒ අතරින් දෙවැනි රෝහල වන මවුන්ට් එලිසබෙත් නොවීනා රෝහල විවෘත කරනු ලැබූයේ 2012 වසරේදීය.
මවුන්ට් එලිසබෙත් රෝහල ලෝකය පුරා වඩාත් ජනප්රියව ඇත්තේ හෘද රෝග චිකිත්සාව, පිළිකා සහ ස්නායු වෛද්ය විද්යාව යන විෂයන් සඳහාය. නමුත් ඕනෑම ලෙඩ රෝගයකට අදාළව ප්රතිකාර සහ පරීක්ෂණ සිදු කිරීමේ හැකියාව මවුන්ට් එලිසබෙත් රෝහල සතුය. එමෙන්ම රෝගියා කැමැති ඕනෑම ආකාරයෙන් නේවාසික පහසුකම් සපයා ගැනීමේ හැකියාවද මේ රෝහල සතුය. ආසියා පැසිෆික් කලාපයේ ඇති පහසුකම් අතින් විශිෂ්ටතම රෝහල මෙය වන බවට ලොව පුරා බොහෝ දෙනකු අවිවාදයන් පිළිගන්නේ ඒ නිසාය.
කෙසේ නමුදු මවුන්ට් එලිසබෙත් රෝහලේ ඇති පහසුකම් හා සමානවම එහි මිල ගණන්ද ඉතා ඉහළය. ශ්රී ලංකාවේ මධ්යම පාන්තික ආදායම්ලාභියකුට පවා දරා ගත නොහැකි තරමට එහි මිල ගණන් ඉතා වැඩිය. රටේ ආර්ථිකයට දායක වන පුරවැසියන් ජාතික රෝහලේ ඇඳක් ලබා ගැනීම සඳහා සටන් කරද්දී, දේශපාලන නායකයන් මවුන්ට් එලිසබෙත් වැනි සුපිරි පන්නයේ රෝහල්වලින් ප්රතිකාර ලබා ගැනීම කෙතරම් සදාචාර සම්පන්නදැයි කතාබහක් සමාජය තුළ ඇති වී ඇත්තේද ඒ නිසාය.
“නිරෝගීකම හැර සැපයක් ලොවේ කුමන්දා” යනුවෙන් ජනප්රිය කියමනක් ඇත. එබැවින් ජනතාවට සේවය කිරීමට නම් පළමුව තමන් නිරෝගීව සිටිය යුතුයැයි අපේ රටේ දේශපාලකයන් සිතනවා වන්නටද පුළුවන. අපේ බදු මුදලින් පාලකයන් මවුන්ට් එලිසබෙත් යන්නේ අපේ යහපතටම යැයි සිතනවා හැරෙන්නට සාමාන්ය පුරවැසියන් ලෙස අපට කළ හැකි වෙන දෙයක්ද නැත.
චන්දන පොන්නම්පෙරුම
