වසර තිහකට අධික කාලයක් වසා දමා ඇති කන්කසන්තුරේ සිමෙන්ති කර්මාන්ත ශාලා භූමියෙන් ගත වූ මාස දෙකක කාලය තුළ රුපියල් කෝටි 12ක පමණ වටිනාකමකින් යුතු යකඩ සොරාගෙන ඇති බව වාර්තා වෙනවා. ඒ බව ශ්රී ලංකා සිමෙන්ති සංස්ථාවේ සභාපති ජගත් ධර්මප්රිය තහවුරු කරනවා.
පැවැති යුධමය වාතාවරණය තුළ වසර ගණනාවකට පෙර නිෂ්පාදනය අත්හිටවූ කර්මාන්ත ශාලාවට මෙතෙක් නිසි ආරක්ෂාවක් නොමැති බවයි සභාපතිවරයා කියන්නේ. අදාළ සොරකම සම්බන්ධව පොලිස් පැමිණිලි ගණනාවක් සිදු කර ඇතත් ප්රතිඵල රහිත බව ඔහු කියනවා. කර්මාන්තශාලාවේ ආරක්ෂාව යුද හමුදාව යටතේ පැවති වකවානුවේ දී එහි දේපල ආරක්ෂා වූ නමුත් උතුරු පළාතේ යුද හමුදා රාජකාරි සීමා වීමත් සමඟ මෙම සමස්ත භූමියම ආරක්ෂා කිරීමට පිරිස් බලය නොමැති වීම උක්ත තත්ත්වය උද්ගත වීමට බලපා තිබෙන බවයි පැවසෙන්නේ.
මෙම කර්මාන්ත ශාලවේ බොහෝ ගොඩනැගිලි යකඩින් නිර්මාණය කර ඇති අතර රුපියල් කෝටි ගණනක් වටිනා යකඩ මෙම කර්මාන්ත ශාලා භූමියේ තිබෙන බව අනාවරණය වෙනවා. සභාපතිවරයා කියා සිටින්නේ සොරකම් වළක්වා ගැනීම සඳහා තාවකාලික ආරක්ෂක වැඩපිළිවෙලක් ක්රියාත්මක කර ඇති බවයි. එම කටයුතුවල යොදවා සිටින පුද්ගලයන් හා ප්රදේශවාසින් අතර ගැටුම්කාරී තත්ත්වයන් ඇති වන බව ඔහු කියනවා.
ශ්රී ලංකා සිමෙන්ති සංස්ථාව සතු යකඩ වෙන්දේසි කිරීමට හෝ ඉවත් කිරීම අරමුණු කර ගනිමින් 2019 වසරේ දී අමාත්යාංශ තුනක ලේකම්වරුන් ගේ ප්රධානත්වයෙන් ටෙන්ඩර් මණ්ඩලයක් ස්ථාපිත කෙරුණා. මේ වන විට එහි කටයුතු අඩාලව පවතින බැවින් සුදුසු ක්රමවේදයකට අනුව මෙම යකඩ අදාළ කර්මාන්ත ශාලා භූමියෙන් ඉවත් කිරීමේ වගකීම බලධාරින් සතු කාර්යයක් බවයි ශ්රී ලංකා සිමෙන්ති සංස්ථාවේ සභාපති ජගත් ධර්මප්රිය කියන්නේ.
මීට පෙර මේ පිළිබඳව අදහස් දැක්වූ අය පවසා තිබුණේ ආරක්ෂාවට සිටින හමුදාව බලා සිටියදීම මෙම යකඩ ගලවා ඉවත් කරගෙන යන බවයි.
A5 News Sri Lanka
