දේශීය ණය ප්රතිව්යූහගත කිරිම හරහා රටේ ජනතාවගේ තැන්පතුවලට සේවක අර්ථ සාධක අරමුදලට සිදු වෙන දෙයක් ගැන රජයෙන් කිසිම පැහැදිලි කිරිමක් මේ වන තුරු නැති බවත් ජනතාව මේ නිසා අන්දමන්ද වී ඇති බවත් ජනාධිපතිවරයාගේ වගකීම විය යුත්තේ ජනතාවට දේශීය ණය ප්රතිව්යුහගත කිරීම හරහා සිදුවන දේ ජාතිය අමතා පැහැදිලි කිරීම බවත් එසේ නොකර ජනතාවට තොරතුරු සගවා සිටීමෙන් ජනතාව පවා කලබල විය හැකි බවත් විපක්ෂ නායක සජිත් ප්රේමදාස මහතා අද (28) පොලොන්නරුවේදී පැවසීය. Sri Lanka Latest News
රජය යම් කිසි තීන්දුවක් ගන්නවා නම් ඒ සම්බන්ධයෙන් ජනතාව දැනුවත් කිරීම වගකීම වුවත් දේශීය ණය ප්රතිව්යූහගත කිරීම සම්බන්ධයෙන් මේ වන තෙක් රජයේ පාර්ශ්වයෙන් විධිමත් පැහැදිලි කිරීමක් සිදු නොකර සිටීම ගැටලු සහගත බවත් මේ රටේ සිටින්නේ බුද්ධිමත් ජනතාවක් හෙයින් ඔවුන්ට එය පැහැදිලි කර සිටීම රජයේ වගකීමක් බවත් විපක්ෂ නායක සජිත් ප්රේමදාස මහතා පැවසීය.
එසේම ජනාධිපතිවරයා බලයට පත් වූ විගස රටේ ගෘහයක ආදායම් වියදම් සමීක්ෂණයක් සිදු කළ යුතු වුවත් එය මේ වෙනතුරු සිදු කර නොමැති බවත් එවැනි විධිමත් සමික්ෂණයක් සිදු නොකර අස්වැසුම වැඩසටහන ක්රියාත්මක කිරීම තුළ රටේ ජනතාව විශාල පීඩාවකට ලක් වි ඇති බවත් පැවසූ විපක්ෂ නායකතුමා කියා සිටියේ මේ වන විට අස්වැසුම වැඩසටහන රටට හිසරදයක් වී ඇති බවත් ය.
සක්වල වැඩසටහනට සාපේක්ෂව බස් රථ ලබා දීමේ වැඩසටහනේ 72 වැනි බස් රථය පොලොන්නරුව මැදිරිගිරිය ජාතික පාසලට බස් රථයක් ලබා දීමේ අවස්ථාවට එක්වෙමින් විපක්ෂ නායක සජිත් ප්රේමදාස මහතා මේ බව පැවසිය.
සක්වල හරහා පාසල් සඳහා රුපියල් 354,200,000.00 වටිනා බස්රථ 72ක් පරිත්යාග කොට තිබේ. මීට අමතරව හුස්ම වැඩසටහන යටතේ රෝහල් 56ට රුපියල් 171,966,900.00ක අත්යවශ්ය ඖෂධ සහ උපකරණ පරිත්යාග කොට තිබේ. සක්වල හරහා පාසල් 32ක රු 27,986,150.00 ක් වටිනා සුහුරු පන්ති කාමර ඉදිකොට තිබේ.
තව ද ගොවි ජනතාවගේ වී මිල දි ගැනීමට නිශ්චිත ක්රමවේදයක් රජයට නොමැති වීමත් වී සඳහා සහතික මිලක් ලබා දීමට නොහැකි වීමත් නිසා ගොවි ජනතාවගේ වර්තමානයත් අනාගතයත් විනාශ මුඛයට ලක් වී ඇති බවත් පැවසූ විපක්ෂ නායකතුමා වැඩිදුරටත් කියා සිටියේ මේ අවස්ථාවේ රටට අවශ්ය වී ඇත්තේ වී ගොවියාත් පාරිභෝගිකයාත් සුරක්ෂිත වන විද්යාත්මක මිල සූත්රයක් බව යි. එවැනි මිල සූත්රයක් හරහා ගොවි ජනතාවත් පාරිභෝගියාත් රැකෙන බවත් හෙතෙම සඳහන් කර සිටියේය.
