ශ්රී ලංකාව තුළ දුම්කොළ පාලනය සඳහා ක්රියාත්මක වන ප්රධානතම නීතිමය රාමුව වන 2006 අංක 27 දරන දුම්කොළ හා මද්යසාර පිළිබඳ ජාතික අධිකාරී (NATA) පනත සහ 2016 අංක 1 දරන තහනම් කළ දුම්කොළ නිෂ්පාදන රෙගුලාසි උල්ලංඝනය කරමින් මෙරට වෙළඳපොළ තුළ විවිධ රසයන්ගෙන් යුත් සිගරට් නිෂ්පාදනය සහ අලෙවි කිරීම සම්බන්ධයෙන් ලංකා දුම්කොළ සමාගමට (CTC) එරෙහිව අභියාචනාධිකරණය විසින් දැඩි තහනම් නියෝගයක් පනවා තිබේ. පැණි රස, වර්ණ හෝ වෙනත් රස ගැන්වූ දුම්කොළ අඩංගු සිගරට් නිෂ්පාදනය, ආනයනය සහ විකිණීම නීතියෙන් සපුරා තහනම් කර තිබියදීත්, බ්රිතාන්ය ඇමරිකානු දුම්කොළ සමාගමේ (BAT) අනුබද්ධිත ආයතනයක් වන CTC සමාගම විසින් වසර ගණනාවක සිට මෙරට වෙළඳපොළට විවිධ රසැති සිගරට් වර්ග නිකුත් කර ඇති බව වාර්තා වෙයි.Sri Lanka Latest News
ඉතිහාස දත්තවලට අනුව, 1988 දී මැටර්හෝන් මෙන්තෝල්, 1998 දී වයස 30ට අඩු තරුණයන් ඉලක්ක කළ ජෝන් ප්ලේයර් ගෝල්ඩ් ලීෆ් (JPGL) මෙන්තෝල්, 2011 දී ඩන්හිල් ස්විච්, 2014 දී ඩන්හිල් අයිස් සහ කැප්සියුල තාක්ෂණය සහිත ජෝන් ප්ලේයර් ගෝල්ඩ් ලීෆ් ක්ලික් මෙන්ම 2018 වසරේදී කාන්තාවන් ආකර්ෂණය කරගැනීමේ අරමුණින් රතු බෙරි (Red Berries) රසැති සිගරට් ද CTC සමාගම විසින් මෙරට වෙළඳපොළට හඳුන්වා දී ඇත. ඉන් නොනැවතී 2020 වසරේදී ඩන්හිල් ද්විත්ව කැප්සියුල (කහ සහ කොළ) වර්ග ද නිකුත් කර තිබේ. මීට අමතරව, NATA පනතේ 35 වැනි වගන්තිය මඟින් පනවා ඇති සෘජු ප්රචාරණ තහනම ද මුළුමනින්ම උල්ලංඝනය කරමින්, යූ ටියුබ් (YouTube) සමාජ මාධ්ය ජාලය ඔස්සේ “මහත්මයා මේ තමයි රසය” (Gentleman at his BEST) යන තේමාවෙන් වක්ර වීඩියෝ දැන්වීම් ප්රචාරණය කරමින් රස ගැන්වූ සිගරට් ප්රවර්ධනය කිරීමට ද මෙම සමාගම කටයුතු කර ඇති බව TobaccUnmasked කණ්ඩායම විසින් හෙළිදරව් කරගෙන ඇත.
මෙම නීති විරෝධී ක්රියාවලියට එරෙහිව දුම්කොළ හා මද්යසාර පිළිබඳ ජාතික අධිකාරිය (NATA) විසින් මාතර, කොළඹ සහ අනුරාධපුර යන දිස්ත්රික්ක කේන්ද්ර කරගනිමින් අධිකරණමය පියවර ගත් අතර, එහි ප්රතිඵලයක් ලෙස 2023 නොවැම්බර් 17 වැනි දින සිට බලපැවැත්වෙන පරිදි ඩන්හිල් ස්විච්, ඩන්හිල් ඩබල් කැප්සියුල සහ ජෝන් ප්ලේයර් ගෝල්ඩ් ලීෆ් ප්රෝ කූල් යන රස ගැන්වූ සිගරට් වර්ග ලංකාව තුළ අලෙවි කිරීම අභියාචනාධිකරණය විසින් සම්පූර්ණයෙන්ම තහනම් කරනු ලැබීය. කෙසේ වුවද, මෙම ඓතිහාසික අධිකරණ තීන්දුව ප්රසිද්ධ කිරීමට සිදුවූ අසාමාන්ය ප්රමාදය පිළිබඳව විපක්ෂ නායක සජිත් ප්රේමදාස මහතා පාර්ලිමේන්තුවේදී ප්රශ්න කළ අතර, දුම්කොළ සමාගම්වල බලපෑම් හමුවේ මෙවැනි නීතිමය කටයුතුවල විනිවිදභාවය රැකගැනීමේ වැදගත්කම ඔහු අවධාරණය කළේය. මෙම නීතිමය තහනමෙන් පසු, අදාළ සිගරට් වර්ග අලෙවියෙන් ඉවත් කරගන්නා ලෙස ලංකා දුම්කොළ සමාගමට ද සිල්ලර වෙළෙන්දන් වෙත නිල දැන්වීම් නිකුත් කිරීමට සිදුව ඇත.
