රාත්රී කාලයේ මහ කැලෑවක් මැද තියෙන ගල් ගුහාවක් ඇතුළට වෙලා, ගින්දර ගොඩක් වටකරගෙන බයෙන් ගැහෙමින් ඉන්න මිනිස්සු රංචුවක් ගැන මොහොතකට හිතන්න. ඒ අය බයවෙලා හිටියේ කැලේ ඉන්න අලියෙකුටවත්, කොටියෙකුටවත්, වළහෙකුටවත් නෙවෙයි. ඒගොල්ලෝ බයවෙලා හිටියේ ඝන අඳුර අස්සේ ගස් අතු අතරින්, කුරුල්ලන්ගේ වගේ අමුතුම කෑගැහිලි ශබ්ද කරගෙන එන, මනුෂ්යයන්ට වඩා හාත්පසින්ම වෙනස්, අඩි තුනක් විතර උස අද්භූත ගෝත්රයකට.Sri Lanka Latest News
ලෝක ප්රසිද්ධ ‘ලෝඩ් ඔෆ් ද රිංග්ස්’ චිත්රපටයේ ඉන්න ‘හොබිට්ස්’ලා වගේ අමුතුම වාමන මානව කොට්ඨාසයක් ලංකාවේ ඝන කැලෑවල් අස්සෙත් ජීවත් වුණා කිව්වොත් ඔබ විශ්වාස කරනවාද? මේක නිකම්ම නිකන් ජනප්රවාදයක් නෙවෙයි. යුරෝපීය මානව විද්යාඥයන් පවා මවිතයට පත්කරපු අපේ ඉතිහාසයේ කවුරුත් නොකියන අඳුරු රහසක්.
ඒ තමයි කුමන, මහලේනම ඝන කැලෑවේ ආධිපත්යය පැතිරුවා යැයි කියන අද්භූත ‘නිත්තෑවෝ’ (Nittaewo).
කවුද මේ භයානක නිත්තෑවෝ?
බි්රතාන්ය පර්යේෂකයන්ගේ වාර්තාවලට සහ පැරණි වැදි ජනප්රවාදවලට අනුව, නිත්තෑවෝ කියන්නේ වඳුරන් විශේෂයක් නෙවෙයි. ඔවුන් මිනිසුන්ට සමාන, නමුත් අපිට වඩා ගොඩක් වෙනස් වාමන මානව විශේෂයක්.
පෙනුම: ඔවුන්ගේ උස උපරිම අඩි 3ක් පමණ වුණා. ඇඟ පුරාම ඝන රෝම තිබුණු අතර, කෙළින් හිටගෙන ගමන් කිරීමේ හැකියාව ඔවුන්ට තිබුණා.
භාෂාව: ඔවුන්ට කතාකිරීමට නිශ්චිත භාෂාවක් තිබුණේ නැහැ. ඒ වෙනුවට ඔවුන් එකිනෙකා අදහස් හුවමාරු කරගත්තේ පක්ෂීන්ගේ නාදයට සමාන අමුතුම ශබ්ද තරංග හරහායි.
ආයුධ නැති මාරාන්තික දඩයක්කාරයෝ
වැදි ජනතාව දුනු ඊතල පාවිච්චි කළත්, නිත්තෑවෝ කිසිම ආයුධයක් පාවිච්චි කළේ නැහැ. ඔවුන්ගේ ප්රධානම ආයුධය වුණේ ඔවුන්ගේ අත්වල පිහිටලා තිබුණු අතිශය තියුණු, වක්ර වුණු දිගු නියපොතුයි. සතුන්ව මරාගෙන, ඒ නියපොතුවලින් මස් ඉරාගෙන කන්න තරම් ඔවුන් රුදුරු වුණා.
මහලේනම කැලෑවේ සිදුවූ ලේ වැකි යුද්ධය
කාලයක් යද්දී මේ මහලේනම කැලෑවේ හිටපු වැදි ජනතාවට නිත්තෑවන්ගෙන් විශාල තර්ජනයක් එල්ල වෙන්න පටන් ගත්තා. වැද්දන් දඩයම් කරලා වේළෙන්න දාන මස්, මේ නිත්තෑවන් රංචු පිටින් ඇවිත් හොරකම් කළා. ඊටත් වඩා භයානකම දේ වුණේ, කැලෑවේ තනියම යන වැදි දරුවන්ව මේ නිත්තෑවන් විසින් පැහැරගෙන යාමයි.
නිත්තෑවන්ට අත්වූ ඛේදනීය ඉරණම
තමන්ගේ දරුවන්ව පවා අහිමි වෙන තැනට ආවම, වැදි ජනතාවට වෙනත් විකල්පයක් තිබුණේ නැහැ. ඔවුන් කැලේ හිටපු සියලු වැද්දන්ව එකතු කරගෙන අතිශය භයානක තීරණයක් ගත්තා.
එක්තරා දවසක ඔවුන් කැලෑවේ හිටපු සියලු නිත්තෑවන්ව වටකරලා, එක දැවැන්ත ගල් ගුහාවකට පන්නා ගත්තා. ඉන්පසු ඒ ගුහාවේ කටට දර සහ කොළ අතු ගොඩගහලා, සම්පූර්ණයෙන්ම පිටවෙන්න බැරිවෙන්න වහලා ගිනි තිබ්බා. එක දිගට දින 3ක් පුරාවට ඒ ගින්න ඇවිළුණා. ඇතුළෙන් ආපු ඒ අද්භූත කෑගැහිලි ක්රමයෙන් නිහඬ වුණා. එදායින් පස්සේ ඒ අද්භූත වාමන ගෝත්රය මේ ලෝකයෙන් සදහටම සමුගත්තා.
මේක විද්යාත්මකව ඔප්පු වෙලා තියෙනවාද?
මෙය හුදෙක් කතන්දරයක් පමණක් නොවේ. 1887 දී බි්රතාන්ය ජාතික පර්යේෂකයකු වූ හියු නෙවිල් මේ පිළිබඳ ලෝකයට මුලින්ම වාර්තා කළා. ඒ වගේම අපේ ප්රවීණ විද්යාඥයකු වූ මහාචාර්ය පී.ඊ.පී. දැරණියගල මහතාත් මේ පිළිබඳ පුළුල් පර්යේෂණ සිදුකළා.
ඊටත් වඩා පුදුමසහගත කරුණ වන්නේ, මෑතකදී ඉන්දුනීසියාවේ ෆ්ලෝරස් දූපතෙන් සොයාගත්, Homo floresiensis හෙවත් අඩි තුනක් පමණ උසැති වාමන මානවයාගේ ෆොසිලයි. මෙම සොයාගැනීමත් සමග අද ලෝකයේ මානව විද්යාඥයන් පවා විශ්වාස කරන්නේ, ලංකාවේ වැදි ජනප්රවාදවල එන මේ නිත්තෑවෝ යනු අතීතයේ ජීවත්වී වඳවී ගිය එවැනිම සැබෑ මානව විශේෂයක් විය හැකි බවයි.
‘නිට්ටාවටම සුව වුණා’ කියන කතාව හැදුණේ මුන් නිසාද?
සමාජයේ පැතිරිලා තියෙන ලොකුම මිථ්යාවක් තමයි ‘නිට්ටාවටම සුව වුණා’ (ලෙඩක් සම්පූර්ණයෙන්ම සුව වුණා) කියන වචනය හැදුණේ මේ නිත්තෑවන්ගෙන් බේරුණු නිසා කියන කතාව. හැබැයි භාෂා විද්යාත්මකව බැලුවම ඒක සම්පූර්ණයෙන්ම වැරදියි. ‘නිට්ටාවටම’ කියන වචනය හැදෙන්නේ පාලි/සංස්කෘත භාෂාවේ එන ‘නිෂ්ඨා’ (අවසානය/සම්පූර්ණ වීම) කියන මූලයෙන්. හැබැයි ‘නිත්තෑවෝ’ කියන නම හැදිලා තියෙන්නේ උන්ගේ අර අතිශය දිග නියපොතු තිබුණු නිසා ‘නිය-ඇවෝ’ (නියපොතු ඇත්තෝ) එකතු වෙලයි.
විස්මිත ලෝකය
