‘එජාප – සජබ එකතුවට බාධාව තමා නම් එය බධාවක් කරගන්න එපා…’ රනිල් වික්රමසිංහ, පසුගිය 17 වැනිදා මෙවැන්නක් එජාප කෘත්යාධිකාරී මණ්ඩලයට දැනුම්දී ඇති බවට වූ ප්රවෘත්තිය අපට අසන්නට ලැබිණි. ඒත් ඒ ප්රවෘත්තියට අනුරූපීව තවත් ප්රචාරක වැඩසටහනක් දියත් වන අයුරුද අපට දකින්නට තිබිණි. ‘රනිල් ඉන්න’ ඒ ප්රචාරක වැඩසටහන පසුගිය සති අන්තය පුරා සමාජ මාධ්ය තුළ සංසරණය වූ අයුරු දකින්නට තිබිණි. ඒ, රනිල්ගේ ගේම් ප්ලෑන්වල හැටිය. විවෘතව එකක් කියන රනිල්, සංවෘතව තවත් ගේමක් ගැසීම 1994 සිට රනිල්ගේ ක්රීඩාවය.Sri Lanka Latest News
එක්සත් ජාතික පක්ෂය මෙරට හැඳින්වූයේ, ශ්රී ලංකාවේ බිහිවූ ප්රජාතන්ත්රවාදී තනි විශාලතම පක්ෂය ලෙසය. එහෙත් මේ තනි විශාලතම පක්ෂයේ ඡන්ද පදනමට 1994 සිට අත්වූ ඉරනම කුමක්ද යන්න මේ රටේ සබුද්ධික ජනතාවට මතක් කරදිය යුතුමය.
1994 – 44%
2000 – 40%
2001 – 46%
2004 – 38%
2010 – 29%
2018 – 32%
1994 වසරේ පොදුජන පෙරමුණ හමුවේ පරාජයට පත්වූ එක්සත් ජාතික පක්ෂය තුළ ප්රතිසංස්කරණ සිදුවිය යුතු බවට 2000 වසරේ පළමුවෙන්ම හඬ නැගුවේ ගාමිණි අතුකෝරළය. ඉන් පසු පක්ෂ නායක රනිල් වික්රමසිංහ අතුකෝරළට නියෝජ්ය නායක පදවියක් දී එම හඬ යටපත් කරගත්තේය. යළි 2004 වසරේ කරළියට ආ පක්ෂ ප්රතිසංස්කරණ, පණ්ඩිතරත්න කමිටු වාර්තාව හරහා සුළු, සුළු වෙනස්කම්වලට භාජනය කළ රනිල්, එස්.බී. දිසානායකට ජාතික සංවිධායක ධුරය සහ තිස්ස අත්තනායකට නියෝජ්ය මහලේකම් තනතුර පිරිනමමින් පැලැස්තර විසඳුමක් දැමුවේය.
පරාජයන් හමුවේ යළිත් 2009දී පක්ෂ ප්රතිසංවිධානය සඳහා විජේදාස රාජපක්ෂ – ජෝසප් මයිකල් පෙරේරාගෙන් සැදුම්ලත් කමිටුවක් පත්කළ රනිල්ට, ඔවුන් යෝජනා කළේ, වසරින් වසරට පක්ෂ නායකත්වය වෙනස් වියයුතු බවය. ඒත් එම යෝජනාව හමස් පෙට්ටියට දැමූ රනිල්, වසර 3 නිදහසේ සිටිද්දී යළිත් පක්ෂ ප්රතිසංවිධාන කරළියට ආවේ පාක්ෂිකයන්ගේ නැගිටීම් සමගය. ඒ අනුව, 2012 වසරේ එජාප ප්රතිසංවිධාන අරබයා නැගුණු හඬ යටපත් කරගැනුණේ කරු ජයසූරියගේ ප්රධානත්වයෙන් පත්කෙරුණු නායකත්ව මණ්ඩලයක් හරහාය.
සිරිකොත පක්ෂ මූලස්ථානය ඉදිරිපිටට එන ජනතා විරෝධය නතර කරන්නට, මාර්ග සංවර්ධනය කරන බව කියමින්, කෝට්ටේ මාර්ගය වසා ගන්නට රාජපක්ෂවරුන්ගේ පිහිටින් රනිල් කටයුතු කළ ඉතිහාසයක්ද අපට මතකය.
පක්ෂ ප්රතිසංවිධාන නොවූ පසුබිමක ඡන්ද පදනම බිඳවැටෙමින් පසුබෑමට ලක්වූ එක්සත් ජාතික පක්ෂය හැරදා 1994 සිට 2014 දක්වා වෙනත් දේශපාලන පක්ෂ වෙත ගිය එජාපය නියෝජනය කළ පාර්ලිමේන්තු මන්ත්රීවරුන් ගණන 40කට අධිකය.
1994 සිට 2025 දක්වා වසර 31ක් එජාප ප්රතිසංවිධාන කටයුත්ත හරියට, කැක්කුම් දෙන දතක සිදුර පුරවමින් තාවකාලික සුවයක් ලබාගැනීම වැනිය.
2024 ජනාධිපතිවරණය ජයගත් අනුර කුමාර 42.31%ක් ලබාගනිද්දී දෙවැන්නා වූ සජිත් ප්රේමදාස 32.76%ක් ලබාගෙන තිබුණේය. දක්ෂිණාංෂික කඳවුර සතුව තිබූ තවත් 17.27%ක් ලබාගෙන තුන්වැනි තැනට පත්ව සිටියේ රනිල්ය. සජිත් සහ රනිල් ලබාගත් ඡන්ද ප්රමාණය ප්රතිශතාත්මකව 50.03%ක්ය.
සැබවින්ම රනිල් ඉවත්ව සජිත්ට නායකත්වයට ඉඩ සලසනවා නම්, නිසැකවම එජාප – සජබ එකතුවක් සමගින් දැනට වෙන් වෙන්ව සිටින ඡන්ද පදනම් එක් තැනකට එක්කිරීමට හැකිවනු ඇත. ඒ තුළින් දක්ෂිණාංශික ඡන්ද පදනම හරහා ප්රබලම ආණ්ඩු විරෝධී බලවේගයක් ගොඩනැගෙනු ඇත. එහෙත් රනිල් එජාප නායකත්වය සජිත්ට හෝ වෙනත් අනුප්රාප්තිකයකුට ලබාදීම මේ කප තියෙන තුරා සිදුවන්නක් නොවනු ඇත. ඊට හේතුව එජාපයේ නායකත්ව වෙනසකට එරෙහිව බහිරවයන් පිරිසක් සිරිකොත පක්ෂ මූලස්ථානය තුළ අරක්ගෙන සිටීමය.
එක්සත් ජාතික පක්ෂයට ආදරය කළ අපවත්වී වදාළ පූජ්ය ගිරාඹේ ආනන්ද අනුනාහිමියන් වරෙක ලියා තිබූ ලිපියක සඳහන් කර තිබූ අදහසකින් මේ සටහන අවසන් කරමි. උන්වහන්සේ පවසා තිබුණේ, 27 වතාවක් තමන් පක්ෂ නායකයා අමතන්නට උත්සාහ කළත් ඊට අවස්ථාවක් නොලැබුණු නිසා එම ලිපිය ලිවීමට අදහස් කළ බවය.
ජනතාව අතරට ගොස්, ජනතා ගැටලු හඳුනාගත්, ජනතාවාදී නායකත්වයක් එක්සත් ජාතික පක්ෂයට අවශ්ය බවත්, ඒ සඳහා කඩිනමින් කටයුතු කරනු ඇති බවට තමන් වහන්සේ බලාපොරොත්තු වන බවත් එහි සඳහන් කර තිබිණි.
1994 සිට මහජන ඡන්දයෙන් නායකයකු බිහිකරන්නට එක්සත් ජාතික පක්ෂයට නොහැකි වුණේ ඇයි? මේ ඔබටම සිතන්නට කාලයයි.
අසේල දාබරේ
