අත්අඩංගුවේ පසුවන පුද්ගලයින්ට වදහිංසා පමුණුවාලීම සඳහා පොලිසිය හදිසි නීතිය අවභාවිතා කරනා බවට පැමිණිලි ඉහළ ගිහින් ඇති බව සිරකරු අයිතිවාසිකම් සුරැකීමේ කමිටුවේ (CPRP) සභාපති නීතිඥ සේනක පෙරේරා පවසනවා. ඔහු කියන්නේ අත්අඩංගුවේ පසුවෙද්දී වධහිංසාවට ලක්වීම පිළිබඳව බොහෝ පැමිණිලි ලැබී ඇති බවයි.
“පසුගිය විරෝධතාවලින් පසුව අත්අඩංගුවට ගත් බොහෝ දෙනෙකුට පොලිස් අත්අඩංගුවේ දී හෝ රිමාන්ඩ් භාරයේදී පහර දුන් බව දැන් හැමෝම දන්නා කරුණක්. බොහෝ අවස්ථාවලදී වින්දිතයන් පළිගැනීම්වලට බියෙන් ඉදිරියට එන්නේ නෑ. සමහරුන්ට තම පැමිණිලි මානව හිමිකම් කොමිෂන් සභාව වගේ බලධාරීන් වෙත අරන් යන්න එපා කියලා බිය ගන්වලා තියෙනවා. ඔවුන් මානව හිමිකම් කොමිසම හමුවට යනකොට අපරාධකාර නිලධාරීන් නිවෙස්වලට ගිහින් පැමිණිලි ඉල්ලා අස්කර ගන්න නැතිනම් ප්රතිවිපාකවලට මුහුණ දෙන්න වෙයි කියලා තර්ජනය කරනවා. මේක කනගාටුදායක තත්ත්වයක්” යයි නීතිඥ සේනක පෙරේරා කියනවා.
“අධිකරණයට පරිබාහිර ඝාතන, වධහිංසා පැමිණවීම් සහ අත්තනෝමතික විදිහට රඳවා තබා ගැනීම ඇතුළු පොලිස් අපයෝජනයන් වාර්තා වෙලා තියෙනවා. රජයෙන් පොලිසියේ ස්වාධීන අධීක්ෂණය යථා තත්ත්වයට පත් කරලා, සිදු උනයි කියන පොලිස් අපයෝජනයන් අර්ථවත් ලෙස විමර්ශනය කරලා නඩු පවරන්න ඕනෙ. වරදකරුවන් වූ රැඳවියන්ට කුරිරු ලෙස සලකන බවත්, බොහෝ වින්දිතයින්ට නිහඬව දුක් විඳීමට සිදු වූ බවත් වාර්තා වෙනවා.
අපිට කුරුවිට බන්ධනාගාරයේ ජීවානන්ද රාජපක්ෂ කියන රැඳවියෙකුගෙන් පැමිණිල්ලක් ලැබුණා. නිලධාරියෙකුට එරෙහි පැමිණිල්ලක් ඉල්ලා අස්කර ගැනීමට ඔහුට බල කරලා තියෙනවා. රැඳවියා ඒක කිරීම ප්රමාද කළ නිසා ඔහුට දරුණු ලෙස පහර දීලා. දැන් එම නිලධාරියාට විරුද්ධව නඩුවක් විභාග වෙමින් පවතිනවා. ශ්රී ලංකා මානව හිමිකම් කොමිෂන් සභාවට පොලිසියට එරෙහිව අත්අඩංගුවේ පසුවන වධහිංසාවට එරෙහිව පැමිණිල්ලක් ඉදිරිපත් කරපු චාමර විලියම් නමැත්තා පස්සේ අතුරුදන් වෙලා තියෙනවා. අත්අඩංගුවේ ඉද්දී අමානුෂික ලෙස පහර දුන් බවට ඔහු සිය පැමිණිල්ලේ සඳහන් කරලා ටියෙනවා. මීගමුව රෝහලේ ප්රතිකාර ලබමින් ඉද්දී ඔහුව එතැනින් පොලිසිය විසින් අරන් ගිහින් තියෙනවා. ඊට පස්සේ ඔහු ඉන්නේ කොහෙද කියලා කවුරුවත් දන්නේ නෑ.
හියුමන් රයිට්ස් වොච් හි දකුණු ආසියාවේ අධ්යක්ෂ මීනක්ෂි ගංගුලි මෑතකදී ප්රකාශයක් කරමින් කියලා තියෙන්නේ; ‘ශ්රී ලංකාවේ පොලිසිය ඔවුන්ගේ ක්රියාව නිවැරදි කර ගන්නවා වෙනුවට ඔවුන්ගේ බරපතල අපයෝජන පිළිබඳ ඉතිහාසය සේම ක්රියාත්මකවනවා. එක්සත් ජාතීන්ගේ සංවිධානය, එක්සත් රාජධානිය සහ ශ්රී ලංකාවේ නීතිය ක්රියාත්මක කිරීම සමඟ වැඩ කරන අනෙකුත් අය ශ්රී ලංකාවේ පැත්තෙන් ප්රතිසංස්කරණය කිරීමට දේශපාලන කැමැත්ත නොමැතිව, ඔවුන්ගේ නියැලීම අපයෝජන ආයතන අනුමත කරන බවට පෙනී යා හැකි බව පිළිගත යුතුයි’ යනුවෙන්. මේක නරක තත්වයක්” යයි නීතිඥ සේනක පෙරේරා කියනවා.
