විදේශ රැකියා සඳහා පිටත් කර යවන බව කියමින් හිටපු ඇමැති මනූෂ නානායක්කාර මහතාගේ සහෝදරයා කර ඇතැයි කියන මූල්ය වංචාවන්ට හසු වූ හතළිහකට අධික පිරිසක් අපරාධ පරීක්ෂණ දෙපාර්තමේන්තුවට හා පොලිස් මූලස්ථානයට පැමිණ ඊයේ (22) පැමිණිලි ඉදිරිපත් කළහ.Sri Lanka Latest News
රට පුරාම මේ පුද්ගලයාගේ මූල්ය වංචාවට හසු වූ වින්දිතයන් 371ක් සිටින බව මේ අවස්ථාවට එක් වූ මවුබිමට ඩොලර් රැගෙන ඒමට ගොස් අනාථ වූ අසරණයන්ගේ සංගමයේ සභාපති සරත් මුණසිංහ මහතා පැවසීය. ඒ මහතා මෙසේද කීවේය.
විදේශ රැකියා සඳහා යවන බවට පවසා කෝටි 26ක් මහරගම විදේශ රැකියා ආයතනයක් මඟින් වංචා කර තිබෙනවා. මනූෂ නානායක්කාර හා ගෝල බාලයන් සේරම එකතු වෙලා තමයි මේ වංචාව කරලා තිබෙන්නේ. ඩොලර් ගේන්න රට යන්න සල්ලි ගෙවලා අද අපි මහ පාරට වැටිලා. දැන් වසර දෙකක් අපි හැමතැනටම පැමිණිලි කළත් තාම මේකට රතු වරෙන්තුවක්වත් දාලා නැහැ.
මනූෂ නානායක්කාර හිටපු ඇමැතිවරයාට දිගින් දිගටම කිවුවා මේ අපරාධකරුවෝ පැනලා යන්න කලින් අල්ලන්න කියලා සහ මෙයාලට විදේශ ගමන් තහනමක් දාලා හිර කරන්න කියලා. නමුත් ඒ විදිහට කළේ නැහැ. මේකට පැහැදිලිවම මනූෂ නානායක්කාර, ලේකම්වරු, විදේශ සේවා නියුක්ති කාර්යාංශයේ නිලධාරීන් සම්බන්ධයි.
මොවුන් ඩුබායි රාජ්යයට පැනලා ගිහින් කියලා අපට කිවුවා. එක් කෙනෙකුට ලක්ෂ 4 ගාණේ මිලියන 400ක් විදේශ සේවා නියුක්ති කාර්යාංශයේ විමර්ශන නිලධාරින් දෙදෙනකුට දීලා ගිහින්.
උද්ඝෝෂණ පහක් පමණ කළා. එහෙත් කිසිම සාධාරණයක් මේ වෙනකම් සිදු වුණේ නෑ. මේ ඉන්න හැමෝම දුප්පත් අසරණ මිනිස්සු. අපි ජනාධිපතිතුමාට කියන්නේ හොරු අල්ලලා සාධාරණය ඉටු කර දෙන්න කියලයි. අපි මේ ආවේ රජය අපහසුතාවට පත් කරන්න නොවෙයි. අපට මේ සල්ලි අරගෙන දෙන්න කියලා කියන්නයි.
