ඇල්ල පොලිස් වසමේ, ඇල්ල වැල්ලවාය මාර්ගයේදී විනෝද චාරිකාවක් පැමිණි පිරිසක් ගමන් කරමින් සිටි බස් රථයක් සැප්. 4 දින රාත්රියේ අඩි 1,000ක පමණ ප්රපාතයකට පෙරළීමෙන් සිදු වූ අනතුරින් අවම වශයෙන් පුද්ගලයින් 15 දෙනෙකු ජීවිතක්ෂයට පත්වූ බව පොලිසිය පවසයි.Sri Lanka Latest News
පොලිස් මාධ්ය කොට්ඨාසය සඳහන් කළේ, රියැදුරු සමග බස් රථයේ මගීන් 30 දෙනෙකු ගමන් කර ඇති බව ය.
ඇල්ල වැල්ලවාය මාර්ගයේ කිලෝමීටර් 23 හා 24 කණු අතර ප්රදේශයේදී ඊයේ (සැප්. 4) රාත්රී 9:00ට පමණ මෙම අනතුර සිදුව ඇත.
අනතුර සිදුව ඇත්තේ කෙසේ ද?
බස් රථය ඉදිරියෙන් පැමිණි ජීප් රථයක සහ මාර්ගයේ ආරක්ෂිත යකඩ වැටෙහි ද ගැටී අඩි 1,000ක පමණ ප්රපාතයකට පෙරළී ඇතැයි පොලිසිය පැවසීය.
දැනට සිදු කරන ලද විමර්ශනවලදී අනාවරණය වී ඇත්තේ, අනතුරට ලක් වූ පිරිස තංගල්ල ප්රදේශයේ සිට විනෝද චාරිකාවක් පැමිණ නැවත ආපසු යමින් සිටියදී අනතුරට ලක්ව ඇති බව ය.
පුද්ගලයින් මුදාගැනීම සඳහා පොලිසිය, යුද්ධ හමුදාව, ගුවන් හමුදාව, ගිනි නිවීමේ සේවා දෙපාර්තමේන්තුව සහ ප්රදේශවාසින් එක්ව තිබේ.
අනතුරට ලක්ව ඇත්තේ කවුද?
මෙම අනතුරින් බස් රථයේ රියැදුරු ඇතුළු පිරිමි පුද්ගලයින් 6 දෙනෙකු කාන්තාවන් 9 දෙනෙකු මිය ගොස් ඇතැයි පොලිස් මාධ්ය කොට්ඨාසය පැවසීය.
තුවාල ලැබූ පිරිමි පුද්ගලයින් 6 දෙනෙකු, කාන්තාවන් 5 දෙනෙකු, පිරිමි ළමුන් 3 දෙනෙකු සහ ගැහැනු ළමුන් 2 දෙනෙකු ප්රතිකාර සඳහා බදුල්ල රෝහලට ඇතුළත් කර තිබේ.
එමෙන් ම, බස් රථයේ පිරිස මුදා ගැනීම සඳහා සහය වූ පුද්ගලයින් දෙදෙනෙකු ද තුවාල ලබා ප්රතිකාර සඳහා බදුල්ල රෝහලට ඇතුළත් කර ඇතැයි පොලිසිය පැවසීය.
මිය ගිය පිරිස අතර ළමුන් නොමැති බව පොලිස් මාධ්ය ප්රකාශක, සහකාර පොලිස් අධිකාරී එෆ්. යූ. වුට්ලර් බීබීසී සිංහල කළ විමසීමකදී පැවසීය.
“ළමුන් මිය ගිහින් නැහැ, ළමුන් 5 දෙනෙක් තුවාල ලබා තියෙනවා,” ඔහු සඳහන් කළේ ය.
මිය ගිය පිරිස අතර තංගල්ල නගර සභාවේ ලේකම්වරයා ඇතුළු සේවකයින් 12ක්
බස් රථයේ තංගල්ල නගර සභාවේ සේවකයින් පිරිසක් ගමන් කරමින් සිට ඇති බව ද පොලිස් මාධ්ය ප්රකාශකවරයා පැවසීය.
මිය ගිය පිරිස අතර තංගල්ල නගර සභාවේ ලේකම්වරයා ඇතුළු සේවකයින් 12 දෙනෙකු සිටින බව පළාත් සභා සහ පළාත් පාලන නියෝජ්ය අමාත්ය රුවන් සෙනරත් බීබීසී සිංහල කළ විමසීමකදී තහවුරු කළේ ය.
ඔහු සඳහන් කළේ, එක් සේවිකාවක අතුරුදන් බව ත් ඇය සොයා මෙහෙයුම් සිදු කෙරෙන බව ත් ය.
ජීප් රථයේ රියැදුරු අත්අඩංගුවට
අනතුරට සම්බන්ධ ජීප් රථයේ රියැදුරු අත්අඩංගුවට ගෙන ඇති බව පොලිසිය පැවසීය. මිය ගිය පුද්ගලයින්ගේ මෘත ශරීර දියතලාව, බදුල්ල සහ බණ්ඩාරවෙල රෝහල්වල මෘත ශරීරාගාර තුළ තැන්පත් කර ඇත.
අනතුර සම්බන්ධයෙන් ඇල්ල පොලිසිය වැඩිදුර විමර්ශන සිදු කරයි.
අනතුරට හේතුව කුමක් ද?
බස් රථයේ අධික වේගය සහ අධික වේගය හේතුවෙන් එය පාලනය කර ගැනීමට නොහැකි වීමෙන් මෙම අනතුර සිදුව ඇති බවට සැක කරන බව පොලිස් මාධ්ය ප්රකාශක, සහකාර පොලිස් අධිකාරී එෆ්. යූ. වුට්ලර් පැවසීය.
අනතුරට හේතුව සම්බන්ධයෙන් බීබීසී සිංහල කළ විමසීමකදී ඔහු මේ බව සඳහන් කළේ ය.
“[බස් රථයේ] අධික වේගය සහ අධික වේගය නිසා පාලනය කර ගැනීමට නොහැකි වීම.”
