මෙරට සීනි පරිභෝජනයෙන් 10%කට ආසන්න ප්රමාණයක් පැලවත්ත සහ සෙවනගල සීනි කර්මාන්තශාලා මගින් දේශීයව නිෂ්පාදනය කරනු ලබයි. එමෙන්ම, වත්මනයේ මෙම කර්මාන්තශාලා මගින් එම ප්රදේශයේ පවුල් ලක්ෂ 2කට අධික ප්රමාණයකට සෘජු සහ වක්ර රැකියාවන් සපයනු ලබයි. එයින් නොනැවතී, මෙම කර්මාන්තශාලාවන්හි ආදායම උපයෝගී කර ගනිමින්, රුපියල් මිලියන 1200ක් පමණ වැය කරමින්, නව ජෛව පොහොර කර්මාන්තශාලා දෙකක් ඉදි කිරීමට කටයුතු කර ඇත. එමඟින් තවදුරටත් ප්රදේශයේ ජනතාවට නව රැකියා අවස්ථා උදාකර දීමට හැකියාව ලැබෙනු ඇත. එපමණක් නොව, ප්රදේශයේ ආර්ථික, සමාජයීය සංවර්ධනයට ද මහඟු දායකත්වයක් මෙම ආයතන මගින් හිමි වේ.
පසුගිය වසරේ දී රුපියල් බිලියන 3ක වැඩිම ලාභයක් ඉපැයීමට සෙවනගල සීනි කර්මාන්තශාලාව සමත්විය. පැලවත්ත කර්මාන්ත ශාලාව ද සෑම වසරකම පාහේ ලාභදායී ලෙස පවත්වා ගෙන යාමට හැකි වී ඇත. මීට අමතරව, මෙම කර්මාන්තශාලා දෙක මගින් පසුගිය මාර්තු මාසයේ දී රුපියල් මිලියන 350ක් මහා භාණ්ඩාගාරය වෙත ලබා දීමට ද සමත්වී තිබේ.
එසේ තිබිය දී මෙම ආයතනයන්ගෙන් රජයට ලැබෙන ආදායම් අහිමි කර ගනිමින්, 2011 අංක 43 දරණ ඌන ක්රියාකාරී හෝ ඌන උපයෝජිත වත්කම් පුනරුදය කිරීමේ පනත යටතේ රජයට පවරා ගත් පැලවත්ත හා සෙවනගල සීනි කර්මාන්තශාලා නැවතත් පෙර ආයෝජකයින් වෙත ලබා දීම සඳහා රජය සැරසෙන බවට තොරතුරු වාර්තා වේ.
මේ පිළිබඳව අවධානය යොමු කරමින් විපක්ෂ නායක සජිත් ප්රේමදාස මහතා අද පාර්ලිමේන්තුවේදී, 27/2 හරහා ප්රශ්නයක් අසනු ලැබීය.
