බ්රැන්ඩික්ස් සමාගම විසින් ඉකුත් දින ඉන්දියාවේ සිට දිවයිනට ගෙන්වා ගත්තේ යැයි සඳහන් වන කිසිදු සේවකයකු මහජන සෞඛ්ය පරීක්ෂකවරුන්ගේ අධීක්ෂණය යටතේ නිරෝධායනය වී නොමැති වාර්තා වේ.
මේ බව මහජන සෞඛ්ය පරීක්ෂකවරුන්ගේ සංගමය අවධාරණය කර ඇත.
පසුගිය කාලවකවානුව තුළ බ්රැන්ඩික්ස් සමාගම විසින් ඉන්දියාවේ විසාකාපත්නම් සිට ගුවන්යානයක් හරහා මඟීන් පිරිසක් ලංකාවට ගෙන්වා ගැනීම සම්බන්ධයෙන් නැඟී ඇති චෝදනාවලට පිළිතුරු සපයමින් එම සමාගම නිවේදනයක් නිකුත් කරමින් අවධාරණය කර සිටියේ එම සියළු මඟීන් දින 28 ක නිරෝධායන කාලයකට යටත් කළ බවයි.
කෙසේවෙතත්, මහජන සෞඛ්ය පරීක්ෂකවරුන්ගේ සංගමයේ ලේකම් එම්.බාලසූරිය මහතා අවධාරණය කරන්නේ එම නිවේදනයේ සඳහන් පරිදි කිසිදු අධීක්ෂණයක් තම සංගමයේ පරීක්ෂකවරුන් යටතේ සිදුව නොමැති බවයි.
ඒ අනුව බ්රැන්ඩික්ස් සමාගම සහ කොවිඩ් මර්දන ජාතික ක්රියාන්විත මධ්යස්ථානය විසින් ඉහත සිදුවීම සම්බන්ධයෙන් නිකුත් කළ නිවේදන ප්රතික්ෂේප කරමින් එසේ ගෙන්වා ගන්නා ලද කිසිදු මඟියකු රජයේ නියාමනයෙන් පවත්වාගෙන යන නිරෝධායන මධ්යස්ථානයක දින 14 ක නිරෝධායන කාලයකට යටත් නොකළ බවද හෙතෙම අවධාරණය කරයි.
එම නිවේදනවල පෙන්වා දෙන පරිදි අදාළ මඟීන් දින 14ක නිරෝධායන කාලයකට යටත් කර තිබුණේ නම්, ඉතිරි දින 14 ක ස්වයං නිරෝධායන කාලයක් සඳහා තම නිලධාරීන්ගේ අධීක්ෂණයට යොමු කළ යුතු බවද ඔහු පෙන්වා දෙයි.
අදාළ පාර්ශවයන් පවසන පරිදි එකී නිරෝධායන කාලයකට යොමු කර තිබෙන්නේ නම් ඔවුන් අධීක්ෂණය කළ මහජන සෞඛ්ය පරීක්ෂකවරුන් කවුරුන්දැයි හෙලිදරව් කරන ලෙස ද බාලසූරිය මහතා අභියෝග කළේය.
