මේ ආරම්භ වෙමින් තිබෙන්නේ 2021 වසරය. හාහා පුරා කියා වසරක් උදා වන මොහොතේ පසුගිය වසර දෙස හැරීම, බැලීම හොඳ යැයි සිතෙන්නේ 2020 වසරේ වෙනවා යැයි කියූ දේවල් ඒ විදියටම වුණාද යන ප්රශ්නය අප කා අතරත් අඩු – වැඩි වශයෙන් මතුවන නිසාය. වෙනවා යැයි කියූ දේවල් ගැන කතා කරද්දී 2020 වසර ආරම්භයට දින කිහිපයකට පෙර එනම් 2019 වසර අග භාගය අමතක කළ හැකි නොවේ. මතකයේ හැටියට 2019 දෙසැම්බර් 15 පසුවූයේ මැතිවරණ උණුසුමකුත් සිත් තුළ ඇති කරමිනි.
එහිදී 2020 වසර ගැන කාටත් වඩා සොයා බැලුවේ වෙන කිසිවකුටත් වඩා අනාවැකිකරුවන්ය. ඒ කාලයේ බලන බලන චැනල් එකේ නිතර නිතර ඇසුණේ 2020 ගැන විවිධ මාතෘකා යටතේ අනාවැකි කියන වැඩසටහන්ය. ඒ වැඩසටහන් අතර නිතර නිතර දකින මුහුණු කිහිපයක්ද තිබුණේය. ඒ අතරින් නම් කිහිපයක් අනාවැකි අතර තරගයක යෙදී සිටියද යන්නත් සිතෙන තරම්ය. එහි කිහිපදෙනකුගේ නම් ඒ කාලයේ විiුත් සහ මුද්රිත මාධ්යවල නිතර නිතර දක්නට ලැබුණේය. අසන්නටත් ලැබුණේය. ඔවුන් අතරින් චන්ද්රසිරි බණ්ඩාර, ඉන්දික තොටවත්ත, මංජුල පීරිස්, සුමනදාස අබේගුණවර්ධන යන නම් ශ්රාවකයන්ට, රසිකයන්ට, පාඨකයන්ට කටපාඩම්ව තිබුණේය.
2020 කිරියෙන්, පැණියෙන් ඉතිරෙනවා. අලුත් රජකු යටතේ සුඛිත, මුදිත දේශයක් බිහි වෙනවා. ජනතාව තුළ සැප, සතුට වර්ධනය වෙනවා. බලාගෙන ඉද්දි රටේ සෞභාග්යය උදාවෙනවා. මේ ආදී නානාප්රකාර කතා එදා ඇසුණේය. ඇසෙව්වේය. ඇතැම් රූපවාහිනී නාලිකා පැය දෙක තුනේ දීර්ඝ සාකච්ඡාද, ප්රදර්ශනය කරනු දක්නට ලැබුණේය. මේවාට අනුග්රහාක බවතුන්ද තරගයට මෙන් අනුග්රහය දක්වනු දක්නට ලැබුණේය.
බොහෝ ජ්යොතිෂවේදීන් සහ අනාවැකිකරුවන් අතරේ ජනප්රිය රැල්ල හඹා යමින් සිද්ධාන්තවලින් තොරව හේතු රහිතව ඇතැම් අය සිය දේශපාලන සහ වෙනත් අවශ්යතා සඳහා අනාවැකි කියනු දක්නට ලැබුණේය. සමහරු කැට තබා 2020 මහා සෞභාග්යයක් මවා පෙන්නුවේ කතාව තුළට අලුත් දේශපාලන සිහිනද යටින් යටින් කාවද්දමිනි.
මේ බොහෝමයක් අනාවැකි කිව්වේ 2020 රටේත්, ජනතාවගේත් වාසනාවේ වසර ලෙසය. සියල්ල උඩු යටිකුරු වෙන වසර ලෙසත් පෙන්වා දුන්නේ 2020 වසරය. ඔවුන් ග්රහයන් හා දේශපාලනයද හරිහරියට ගැලපුවේ නවග්රහයන් සියලුදෙනාම පාලනය කරනුයේ තමන් යැයි සිතාගෙන මෙනි. ඇතැම් අනාවැකිකරුවන් නොකියා පැවැසුවේ මෙරට ජනතාව බුද්ධිමත්ව සිතා බලා තීන්දු තීරණ ගැනීම තුළ අනාගතය ජයෙන් ජය ලැබිය හැකි වසර 2020 කියාය.
මෙකි නොකී අනාවැකි සමඟින් ආරම්භ වූ 2020 වසර ගෙවී ගොස් අහවරය. දැන් ඉතින් ඇත්තේ හෙමිහිට හැරිලා බලන්ටය. මහා ප්රබල යැයි ඔවුන්ම කියා ගන්නා අනාවැකිකරුවන් පැවැසූ ඒ අපූරු සෞභාග්යය 2020 ජනතාව අත්වින්දාද ප්රශ්නයකි. සෞභාග්යයක් තබා පුංචි සහනයක් හෝ අත්වින්දාද? මේ ප්රශ්නය සිය දෙනකුගෙන් ඇසුවොත් ඖෂධ ව්යාපාරයේ යෙදෙන පිරිස් හැර අන් සියල්ලන්ම නැතැයි කියා කියනු ඇත. මන්ද කොරෝනා වසංගතයත් සමඟින් සියල්ලන්ටම අත්විඳින්නට වූයේ කටුක අත්දැකීම්ය. එහිදී අනාවැකිකරුවන්ද කොරෝනා පිට තබා සිය අනාවැකිවල තිබූ බර නිදහස් කරගන්නට සිතනු ඇත. එහෙත් අනාවැකි යනු කනාවැකි නොවේ නම් ඔවුන්ට මේ අවදානම පෙනිය යුතුව තිබුණේය. මෙවැනි වසංගතයක් ළඟ ළඟම එන බව 2019 වසරේ අග අනාවැකිකරුවන්ට පෙනිය යුතුය. එසේ එවැන්නක් ඔවුන් දුටු බවක් නම් කිසිදු තැනකදී අසන්නට හෝ දකින්නට ලැබුණු බව මතකයට නොනැගේ. එසේ නම් ඔවුන් අනාගතය ගැන ශාස්ත්රානුකූලව බලා නැත. බැලුවා නම් මෙවැන්නක් නොදැන සිටීමට ඉඩක් නැත.
මේ අතර පසුගිය වසර පුරාම රූපවාහිනී නාළිකා අරක්ගෙන තිබුණේද මේ කනාවැකි ජ්යොතිෂකරුවන්ය. මොවුන් දවස ආරම්භ කරන්නේම සියලුම චැනල්වලට උදේට ඇවිත් දවසේ පලාපල විස්තර ප්රකාශ කරමින් එක නාලිකාවක චන්ද්රසිරි බණ්ඩාරය. තවත් නාළිකාවක මංජුලා පීරිස්ය. තවත් නාළිකාවක ඉන්දික තොටවත්තය. රේඩියෝ නාළිකාවක සුමනදාස අබේගුණවර්ධනය. නමුත් කොරෝනා මේ නැඹුරුවටත් තිත තිබ්බේය.
මේ සියල්ල සමඟ එකක් නම් පැහැදිලිව කිව හැකිය. ඒ සියලු අනාවැකිකරුවන් අනාගතය දෙස බලා ඇත්තේ තම දේශපාලන කෝණයෙන් මිස ජ්යොතිෂ ශාස්ත්රානුකූලව නොවන බවයි. එනිසාම 2021 වසර උදාවන මොහොතේ පෙර කී සියලු අනාවැකිකරුවන් සැඟවී ඇති ආකාරයක් පෙනෙන්නේය. වැඬේ කෙරෙන තුරු මොන මොනවා හරි කියැවීම විනා මේ බහුතරයක් අනාවැකිකරුවන් කනාවැකිකරුවන්ම මිස සැබෑ අනාවැකිකරුවන් නොවන බව ජනතාව තේරුම් ගෙන හමාරය. ඇතැම් විට මැතිවරණයක් ළංවෙද්දි මේ අය හැංගුණු තැන්වලින් මතුවී වසර මැද මහා පෙරළි ගැන අනාවැකි කියනු ඇත. ජනතාව බුද්ධිමත් විය යුතුය. මන්ද ඔවුන් මේ ගොනාට අන්දන්නේ ඔබය.
කුමාර රත්නායක
