හැටන්, කොටගල ප්රදේශයේ පාසලක විදුහල්පතිවරයා විසින් කොසු මිටකින් පහර දෙනු ලැබීම හේතුවෙන් තුවාල ලැබූ එම පාසලේ 10 වන වසරේ ඉගෙනුම ලබන පාසල් දැරියක ප්රතිකාර සඳහා කොටගල ප්රාදේශීය රෝහලට ඇතුළත් කර තිබේ.
එම රෝහලේ දිස්ත්රික් වෛද්ය නිලධාරී ශාවිත්රි ශර්මා සඳහන් කර ඇත්තේ, තුවාල ලැබූ එම පාසල් දැරිය වැඩිදුර ප්රතිකාර සඳහා දික්ඔය මූලික රෝහල වෙත මාරු කර යැවූ බව ය.
අදාළ පාසලේ පැවැත් වීමට නියමිත ගුරු උපහාර උළෙල සඳහා රු. 300ක මුදලක් එම පාසලේ ම අධ්යපනය ලබන තම සහෝදරයා නොගෙවීම සම්බන්ධයෙන් විදුහල්පතිවරයා තම සහෝදරයාට පරුෂ වචනයෙන් බැන වැදුණු බව පැහැර කෑමට ලක්වූ පාසල් සිසුවිය ප්රකාශ කර තිබේ.
එම අවස්ථාවේදී ඇය, “සර් මල්ලිට බනින්න එපා. තාත්තා මේ ළඟ වැඩ කරන්නේ. මම තාත්තට කියලා සල්ලි ඉල්ලලා දෙන්නම්,” යැයි විදුහල්පතිවරයාට පවසා ඇති අතර එම අවස්ථාවේදී විදුහල්පතිවරයා තමන්ට කොසු මිටකින් පන්න පන්නා අමානුෂික ලෙස පහර දුන් බව ඇය සඳහන් කර ඇත.
තමන් කෑ ගසන ශබ්දය ඇසී තම පියා පාසල වෙත දිව ඇවිත් විදුහල්පතිවරයාගෙන් තමන්ව බේරා ගත් බව එම පාසල් සිසුවිය වැඩිදුරටත් අප වාර්තාකරු සමග පවසා තිබේ.
පහර කෑමට ලක් වූ පාසල් සිසුවියගේ පියා සඳහන් කර ඇත්තේ, තමන්ට දරුවන් සිවු දෙනෙකු සිටින බව ත් තම පවුලේ ආර්ථික අපහසුකම් නිසා බිරිඳ ගෘහ සේවය සඳහා විදේශගත වී ඇති බවත් ය.
ඒ අනුව, මිත්තනියගේ රැකවරණය යටතේ තම දරුවන් සිවු දෙනා සිටින බව ඔහු පවසා ඇත.
තම දියණිය බේරා ගැනීමට පාසල වෙත ගිය අවස්ථාවේ එම පාසලේ විදුහල්පතිවරයා සහ ආචාර්ය මණඩලය ද තමන්ට බැන වැදී පහර දීමට තැත් කළ බව පවසමින් ඔහු දිඹුල පතන පොලිසියට පැමිණිල්ලක් ද කර තිබේ.
අප වාර්තාකරු මේ සම්බන්ධයෙන් පහර දුන් බව කියන විදුහල්පතිවරයාගෙන් කළ විමසුමකදී ඔහු සඳහන් කර ඇත්තේ, විනය හේතුවක් මත එම පාසල් දැරියට කුඩා කෝටුවකින් පහර කිහිපයක් ගැසූ බව ය.
පාසල් සංවර්ධන කමිටුවේ යෝජනාවක් අනුව ගුරු උපහාර උළෙල සඳහා මුදල් එකතු කරනු ලබන්නේ පාසලේ ශිෂ්ය නායිකාවක් බව ත් තමන් මුදල් ඉල්ලා එම සිසුවියට පහර නොදුන් බව ත් විදුහල්පතිවරයා එහිදී ප්රකාශ කර ඇත.
පාසල වෙත පැමිණි එම පාසල් සිසුවියගේ පියා තමන්ට පහර දීමට තැත් කිරීම සම්බන්ධයෙන් තමන් ද දිඹුල පතන පොලිසියට පැමිණිලි කළ බව ඔහු වැඩිදුරට ත් සඳහන් කර තිබේ.
