ක්‍රිස්බ්‍රෝ ගොවිපොළ කටයුතු සදහා සූර්ය බලශක්තිය යොදාගනී

ශ්‍රී ලංකාවේ ප්‍රමුඛතම හා විශාලතම කුකුළු මස් නිෂ්පාදකයා වන ක්‍රිස්බ්‍රෝ සමාගම සිය හරිත පිළිවෙත් පවත්වාගෙන යෑම කෙරෙහි වන සිය කැපවීම යළිත් තහවුරු කරමින් සමාගමේ සංවෘත ගොවිපළ පද්ධතියේ ක්‍රියාකාරීත්වය සඳහා අවශ්‍ය විදුලි බලය සූර්ය බලශක්තියෙන් ලබා ගැනීමට මේ වන විට සමත් වී ඇත. ගොවිපළේ සමස්ත ක්‍රියාකාරීත්වය සඳහා අවශ්‍ය බලශක්ති ධාරිතාවෙන් කිලෝවොට් 400ක් පුනර්ජනනීය බලශක්ති ප්‍රභවයකින් ලබා ගැනීමට මේ අනුව ක්‍රිස්බ්‍රෝ සමාගමට හැකිව තිබේ.

ශ්‍රී ලංකාවේ විශාලතම කුකුළු ආහාර නිෂ්පාදනාගාරය සහ මෙරට පිහිටි තාක්ෂණය අතින් පෙරමුණ ගන්නා කුකුළු මස් නිෂ්පාදන සමාගම වන ක්‍රිස්බ්‍රෝ සිය නිෂ්පාදන ක්‍රියාවලියේ ආරම්භයේ සිට අවසාන නිෂ්පාදනය දක්වා පරිසර හිතකාමීත්වය සහ පුනර්ජනනීය බලශක්ති භාවිතය පිළිබඳව පුරෝගාමී ස්ථානයක පසුවෙයි. බ්‍රොයිලර් කුකුළු පැටවුන් ඇති දැඩි කෙරෙන මෙම සංවෘත ගොවිපළ පද්ධතියක කුකුළු පැටවුන් පනස්දාහක් පමණ ඇති දැඩි කළ හැකි අතර සූර්ය බලශක්තිය හඳුන්වාදුන් ගල්ගමුව ගොවිපළ තුළ කුකුළු පැටවුන් ලක්ෂ 3කට නිවහන සපයයි.