ගාලුමුවදොර පිටියේ පැවති සංගීත සන්දර්ශන වේදිකාවක් මත පෙරේදා (28) අලුයම නැඟී සංගීත කණ්ඩායමට අවහිර වන ලෙස නටමින් අශෝබන ලෙස සහ කලහාකාරි ලෙස බීමතින් හැසිරුණු පොලිස් කොස්තාපල්වරයාගේ වැඩ තහනම් කිරීමට පොලිස් දෙපාර්තමේන්තුව ඊයේ (29) පියවර ගෙන තිබිණි.
බොරලන්ද පොලිස් අභ්යාස විද්යාලයට අනුයුක්තව සේවයේ නිරතව සිටින මේ පොලිස් කොස්තාපල්වරයා නත්තල් සහ අලුත් අවුරුද්ද වෙනුවෙන් කොළඹ පැවැත්වෙන උත්සවවල ආරක්ෂාව වෙනුවෙන් විශේෂ රාජකාරි පදනමින් වේල්ල වීදිය පොලිස් ස්ථානයට කැඳවා සිටි නිලධරයෙකි. පසුගිය 27 දා මේ නිලධරයා දිවා රාජකාරියේ නිරත වීමෙන් අනතුරුව රාත්රියේ සිවිල් ඇඳුමින් සැරසී ගාලුමුවදොර පැවැත්වෙන සංගීත සන්දර්ශනය නැරඹීමට තවත් නිලධරයන් කිහිප දෙනකු සමඟ ගොස් ඇති බව විමර්ශනවලදී පෙනී ගොස් ඇත. ඒ වන විට මෙම නිලධරයා සිට ඇත්තේ බීමත්වය. වේදිකාව ඉදිරිපිට රැඳී සිටිමින් නටමින් විනෝද වෙමින් සිටි ඔහු එක්වරම මැදියම් කාලයේදී සංගීත ප්රසංගය පැවති මණ්ඩපයට නැඟ ඇති බව පොලිසිය කියයි. එහිදී එම ස්ථානයේ ආරක්ෂක රාජකාරිවල නිරතව සිටි කොළඹ වංචා විමර්ශන කාර්යාංශයට අනුයුක්තව සිටි පොලිස් කොස්තාපල්වරුන් දෙදෙනකු එම නිලධරයා මණ්ඩපයෙන් බස්සාගැනීමට දැඩි ප්රයත්නයක නිරතව ඇත.
ඒ අනුව බීමත්ව කලහකාරි ලෙස හැසිරීම සම්බන්ධයෙන් මේ නිලධරයා අත්අඩංගුවට ගෙන කොටුව මහේස්ත්රාත් අධිකරණයට පෙරේදා (28) ඉදිරිපත් කර තිබේ. එහිදී ඔහු රු. 50,000ක ශරීර ඇප මත මුදා හැර ඇති අතර, ලබන වසරේ ජනවාරි 13 දා මේ සම්බන්ධ නඩුව අධිකරණයේ විභාගයට ගැනීමට නියමිත බව කොටුව පොලිසිය සඳහන් කළේය.
ගයාන් කුමාර වීරසිංහ
