මගේ ආදරේ ඉල්ලගෙන එයා ගෙදරටම ආවා

දැනට වසර කිහිපයකට පෙර මෙරට රූපවාහිනී නාළිකාවකින් පවත්වපු රියැලිටි වැඩසටහනකට ආපු හුරුබුහුටි කෙල්ලෙක් තමන්ගෙ ලයාන්විත කටහඬින් මුළු ලංකාවම වසඟකර ගන්නට සමත් වුණා. ඇය තමයි ශානිකා මධුමාලි. සුපිරි තරු රැසක් බිහි කළ ඇතුගල් පුරයෙන් ආපු මේ පුංචි කෙල්ල ඒ තරගයේ ජයග්‍රාහී කිරුළ දිනාගනිමින් ලංකාවෙ ජනප්‍රියම ගායිකාවක් වුණා. දවසින් දවස තමන් සොයා එන ජනප්‍රියත්වයත් සමඟින් බොහෝ කලාකරුවන් ගම අත හැර කොළඹට ආවත් තවමත් ගමට ආදරය කරමින්, තමන්ගේ මවත් සමඟින් උපන් ගමේ ගැමි සුවඳ විඳිමින් ජීවිතය ගෙවන ඇගේ අලුත්ම තොරතුරු හොයාගෙන අපි පොල්ගහවෙලට ගියා.
ඉතින් ශානිකා කොහොමද ජීවිතේ. මොනවද අලුත් තොරතුරු?
ප්‍රසංග කටයුතු කරගෙන සතුටින් ජීවත් වෙනවා. ඊට අමතරව ලබන වසරේ අලුත් නිර්මාණයක් රසික රසිකාවියන්ට තිළිණ කරන්නත් සැලසුම් කරගෙන යනවා.
මතකද පොඩි කාලේ කට්ටිය ආදරේට කියපු නම?
හැමෝම කිව්වේ සුදූ කියලා. අම්ම නම් තාමත් කියන්නේ සුදූ කියලම තමයි.
දැන් සුදූ කියන්න විශේෂ කෙනකුත් ඇති?
ඉන්නවා කියලා ලියන්නකො.
පාසල් යනකොට යාළුවො කිව්වෙත් සුදූ කියලද?
අනේ නැහැ. එයාලා කිව්වේ ශානිකා කියලා.
මුලින්ම කෙනෙක් ගැන ආදරයක් ඇති වුණ දවස මතකද?
එතකොට මං දහයෙ පන්තියේ හිටියෙ. ඒ කාලේ කෙනෙක් ගැන පුංචි ආදර සිතුවිල්ලක් පහළවෙලා තිබුණා.
පාසල් ජීවිතයේදී අමතක නොවන දවස?
ඒ කාලේ මම හරි සැරයි. ඉතින් දවසක් ඉස්කෝලේ පිරිමි ළමයකුට මම කන පැළෙන්න ගැහුවා. ඒ සිදුවීම මට කවදාවත් අමතක වෙන්නෙ නැහැ.
ගෙදරට බොරු කියලා යාළුවොත් එක්ක ඇවිදින්න ගිහින් තියෙනවලු නේද?
අනේ නැහැ. කොහොමටවත් නැහැ. ඇත්තම කිව්වොත් ඒ කාලේ එහෙම ගමන් ගියෙත් නැහැ. යන්න චාන්ස් එකක් සෙට් වුණෙත් නැහැ.
ඒ කියන්නේ චාන්ස් එකක් සෙට් වුණානම් යනවා?
ඔව්… ඔව්… සමහරවිට යන්න ඉඩ තිබුණා. කෙල්ලොනෙ ඉතින්.
ශානිකාට හරියට කේන්ති යනව කියන්නෙ ඇත්තද?
අනේ එහෙමම කේන්ති යන්නෙ නැහැ. බැරි වෙලාවත් චුට්ටක් හරි කේන්ති ගියොත්, පැත්තකට වෙලා නිහඬව ඉන්නවා.
දුක හිතුණාම මොකද කරන්නේ?
දුක හිතුණාම නම් මම මගේ සුරතල් සත්තු එක්ක දුක කිය කියා ඉන්නවා. එතකොට දුක නැතිවෙලා යනවා.
ජීවිතයේ වැඩියෙන්ම කැමැති කෙනා?
මගේ ජීවිතයේ මට වටිනාම සහ වැඩියෙන්ම මම කැමැතිකෙනා මගේ අම්මා.
ඔයාට වඩා ඔයාගේ යාළුවා ලස්සනයි කියලා කවුරු හරි කිව්වොත් අප්සට් යනවද නැද්ද?
අයියො නැහැ. මම එහෙම හිතන්නෙ නැහැ. මම ඒ ගැන හරිම සතුටු වෙනවා. පුළුවන්නම් ඒ ලස්සන යාළුවාට තවත් ලස්සනට ඉන්න උදව් කරනවා.
ඡන්දෙ ඉල්ලන්න කැමැත්තෙන්ලු නේද ඉන්නෙ?
අපෝ අයියේ… කොහොමටවත් නැහැ. මට දේශපාලනය ගැන කිසිම හැඟීමක් නැහැ.
ගොඩාක් අය කියනවා ශානිකා දවසින් දවස ලස්සන වෙනවා කියලා, මොකද්ද රහස?
එහෙම විශේෂ රහසක් නම් නැහැ. හැබැයි මම මස්, මාළු කන්නේ නැහැ. එළවළු, පලතුරු විතරයි කන්නේ. ඊට අමතරව මම ඉතින් හොඳට නිදාගන්න එකනම් කරනවා.
කොහොමද ඒ කාලෙයි, මේ කාලෙයි?
හොඳයි… ඇත්තම කිව්වොත් ඒ කාලයට වඩා මේ කාලයේ මට වැඩිපුර ෂෝ ලැබෙනවා. එහෙම බැලුවාම ඉස්සරට වඩා දැන් හොඳයි කියලත් කියන්න පුළුවන්.
රසික රසිකාවියන්ගෙ ආදර ඇරැයුම් ගැන අමතක නොවන සිද්ධි ඇතිනේ?
අම්මෝ, ඕන තරම් ඇරයුම් ආවා. එක්කෙනෙක්ගෙන් බේරෙන්නම බැරි වුණා. එයා මාව හොයාගෙන ගෙදරටත් ආවා. අන්තිමට බොරු ගොඩාක් කියලයි ඒකෙන් නිදහස් වුණේ. ඒක නම් අමතකම නොවන සිද්ධියක් තමයි.
ටෙලිනාට්‍යයක රඟපෑමට සම්බන්ධ වෙන්න ආශාවෙන් ඉන්නවා කියන්නෙ ඇත්තද?
නැහැ නැහැ. ඒක බොරු. මට එහෙම ආසාවක් නැහැ.
නළුවෙක්ගෙන් විවාහ යෝජනාවක් ආවොත්?
අපෝ එපා… එපා… මම ආස නැහැ.
ගොඩාක් තරු ජනප්‍රිය වුණාම ගම අත ඇරලා කොළඹට එනවා. ශානිකා තාමත් ගමේ ඉන්නෙ. මොකද්ද වෙනස?
මම ගමට ආදරෙයි අයියෙ. කොළඹ කලබල පරිසරයට වඩා ගමේ ගැමි සුවඳට මම හරි කැමැතියි. ගහේ, කොළේ සිසිල විඳගෙන, අම්මා එක්ක, මගේ ගමේ අය එක්ක, මගේ නෑදෑයන් එක්ක මේ ගෙවන ජීවිතේට මම හරිම ආදරෙයි.
අවසාන වශයෙන් රසික රසිකාවියන්ට මොනවද කියන්න තියෙන්නෙ?
එයාලගේ කැමැත්ත, මනාපය, ආදරය සමඟ එවපු එස්.එම්.එස්.වලින් තමයි මාව මේ තත්ත්වයට ගෙනාවේ. ඒ නිසා මම මගේ රසික රසිකාවියන්ට ආදරෙයි. ගොඩාක් ආදරෙයි.
කුමාර රත්නායක