ඡන්දයට පෙර ජනාධිපති තෝරන රියැලටියක්

අපේ නිර්මාණකරුවන් මේ දවස්වල දේශපාලනය මූලික කරගෙන විවිධ නිර්මාණ කරන්න පෙලඹී සිටිනවා. නිර්මාණකරුවෙක් කලා නිර්මාණයකින් ඉදිරිපත් කිරීමට උත්සාහ ගන්නේ බොහෝ දුරට ජනතාවට අමතක වී යන දේවල්. ඉතින් එවැනි උත්සාහයක යෙදෙන සුවිශේෂ නිර්මාණකරුවෙක් තමයි උදයකාන්ත වරණසූරිය කියන්නේ. ඔහු කාලෙන් කාලෙට විවිධ නිර්මාණ කරන කෙනෙක්. ඔහුගේ එවැනි තවත් නිර්මාණයක් තමයි ‘ප්‍රසිඩන්ට් ස්ටාර්’ කියන්නේ. ඒ ගැන කියන්න යන්නේ මොකක්ද කියලා අපි ඔහුගෙන්ම දැනගනිමු.
ඔබත් ජනතාව වෙනුවෙන් සිනමාවට රජෙක් නිර්මාණය කරන්නද සූදානම?
රටේ ජනාධිපතිවරණය අත ළඟ. ඉතින් සිනමාවටත් ඒ වගේ රජෙක් නැති වුණොත් ලොකු අඩුපාඩුවක්. ඉතින් මම ‘ප්‍රසිඩන්ට් ස්ටාර්’ චිත්‍රපටය නිර්මාණය කළා. මේ මාසේ අන්තිමට එය දැකබලා ගන්න ලැබෙයි. රූපවාහිනී රියැලිටි වැඩසටහනක් හරහා රජෙක් තේරීමේ තරගයක් තමයි එයි සිදුවන්නේ.
එළඹෙන ජනාධිපතිවරණය අලළා තිරගත වීම නිසා ‘ප්‍රසිඩන්ට් ස්ටාර්’ වාරණයට හසුවෙයිද?
මම මැතිවරණ කොමසාරිස්තුමාගෙ අවසර ඇතිව තමයි මේ චිත්‍රපටය තිරගත කරන්නේ. මම නිර්මාණකරුවෙක්. නිදහසේ නිර්මාණ කිරීමේ අයිතියක් මට තියෙනවා. දේශපාලන කතාවක් නිර්මාණය කරන්න මම හිතුවෙ එළඹෙන ජනාධිපතිවරණය මූලික කරගෙන තමයි මිනිසුන්ටත් රට ගැන යම් පණිවුඩයක් දෙන්න උත්සාහ ගත්තේ. මේ තිබෙන දේශපාලන තරගකාරීත්වයත් එක්ක මිනිසුන්ට හරි දේ තේරුම්ගැනීමේ අවබෝධය අඩුවෙලා. මම හිතනවා ‘ප්‍රසිඩන්ට් ස්ටාර්’ චිත්‍රපටය ජනතාවට වැදගත් වෙයි කියලා. මොන ප්‍රශ්න ආවත් ඒවට මම මුහුණ දෙන්න සූදානම්.
ඔබේ සිනමා නිර්මාණවලට ශිල්පීන් තෝරාගැනීමේදී විශේෂත්වයක් දක්වනවා. මෙයටත් ඒ සැලකිල්ල දැක්වූවාද?
අනිවාර්යයෙන්ම මගේ චිත්‍රපටවලට නිර්මාණ ශිල්පීන් තෝරාගැනීමේදී මම විශේෂත්වයක් දක්වනවා. මම චිත්‍රපට කරන්නම් වාලේ කරන්නේ නැහැ. ඉතින් මේ චිත්‍රපටයේදි දේශපාලනය මත ශිල්පීන් තෝරාගත්තේ නැහැ. චරිතයට සුදුසුම දක්ෂ කෙනා තමයි මම තෝරාගත්තේ. ඒ සියලුම දෙනාගෙන් ලොකු සහායක් මට ලැබුණා.
දායක වන ශිල්පීන් සඳහන් කළොත්?
ශ්‍රීයන්ත මෙන්ඩිස්, මහේන්ද්‍ර පෙරේරා, ප්‍රියන්ත සෙනෙවිරත්න, ඉසුරු ලොකුහෙට්ටිආරච්චි, සනත් ගුණතිලක, ලකී ඩයස්, ගිහාන් ප්‍රනාන්දු, නිල්මිණී තෙන්නකෝන්, ඩබ්ලිව්. ජයසිරි, කුමාර තිරිමාදුර, පුබුදු චතුරංග, රොෂාන් රණවන, බිමල් ජයකොඩි, වීණා ජයකොඩි ඇතුළු ප්‍රවීණයන් සමඟ නව පරපුරේ ශිල්පීන් 60 දෙනකුට ආසන්න ප්‍රමාණයක් රංගනයෙන් දායක වෙනවා.
තවත් විශේෂත්වයක් තමයි ඔබ එක චිත්‍රපටයක් කළ සැණින් තව චිත්‍රපටයක් හදන්න සූදානම් කරනවා. ඒ තරමටම ඔබ වටා නිෂ්පාදකවරුන් පිරිසක් ඉන්නවද?
මම චිත්‍රපටයක් කරන්නේ ඉතා හොඳට සැලසුම් කරලා තමයි. ‘ප්‍රසිඩන්ට් ස්ටාර්’ චිත්‍රපටය මාස හතරක් ඇතුළත සම්පූර්ණයෙන් වැඩ ඉවර කරලා තිරගත කරන තත්ත්වයට ගන්න පුළුවන් වුණා. නිෂ්පාදකවරුන් ඉන්නව මා සමඟ නිර්මාණ කරන්න. ඒත් දැන් මගේ චිත්‍රපට නිෂ්පාදනය කරන්නේ මමමයි.
ලේ කිරි කඳුළු, රන්දිය දහර, මධුර චාරිකා සිනමා නිර්මාණවලින් ඔබ බලාපොරොත්තු වුණු ප්‍රතිචාරයන් ලැබුණෙ නැහැ නේද?
ඕනෑම දෙයක් කරද්දී ලාභ අලාභ සිදුවෙනවා. ඒ හැම දෙයකටම මුහුණ දෙන්න බලාගෙනයි නිර්මාණ කරන්න සිදුවෙන්නේ. ඒ චිත්‍රපට ඒ තරම් ප්‍රතිචාර නොලැබූ බව ඇත්ත. හැබැයි මම ඒ චිත්‍රපට තුනෙන් සමාජයට ලස්සන කතා තුනක් නිර්මාණය කළා. ඒ ගැන මට සතුටුයි.
මෑත කාලයේ සිට ඔබත් ඔබේ නිර්මාණ අදියර වශයෙන් නිර්මාණය කිරීමට පෙලඹී සිටිනවා. ඒ ගැන කතා කළොත්?
මෙහෙමයි, ගොඩ දෙනෙක් මගෙන් ඉල්ලීමක් කළා ගිනි අවි සහ ගිනි කෙළි චිත්‍රපටයෙ දෙවැනි කොටසත් නිර්මාණය කරන්න කියලා. ඉතින් එහෙම මගෙන් ඉල්ලන්නේ ප්‍රතිචාර වැඩි නිසා. කොස්තාපල් පුඤ්ඤසෝම 02 සහ ගින්දරී 03 මම ඉදිරියේදී නිර්මාණය කරනවා. ඒ චිත්‍රපටවලට හොඳ ප්‍රතිචාර ලැබුණු නිසා ප්‍රේක්ෂකයන් එය වැලඳගනීවි කියලා මම විශ්වාස කරනවා.
ඔබ ආයෙත් රතු රෝස, හිරිපොද වැස්ස සහ ආදරණීය කතාවක් වැනි නිර්මාණයන් කරයි කියලා ප්‍රේක්ෂකයන් බලාගෙන ඉන්නවා ඇති?
ඔවුන්ගේ ඒ සිහිනය මම සැබෑ කරනවා. ආදරණීය ප්‍රේම කතාවක් ඉදිරියෙදි මම නිර්මාණය කරනවා.
වසන්ත විතාරණගේ