කොණ්ඩෙත් දිගයි – බැල්මත් හැඩයි කුමාරියක්ම තමයි

⬤ පවුලෙන් ලැබෙන ආදරය දැනට ඇති…

⬤ පුංචි කාලේ ඉඳන්ම තිබ්බ හීනයක්…

අපි ඔබට පොරොන්දු වූ පරිදි තවත් අවුරුදු කුමරියක් කැන්දාගෙන ආවා. ඇය තමයි සෙව්වන්දි ලියනගේ. මෙවර ‘දෙරණ අවුරුදු කුමරිය’ ලෙසට ඇය අභිෂේක ලැබුවා. ඒ විතරක් නෙවේ සුන්දරම සිනහාව සහ දිගම කොණ්ඩය ලෙසටත් ඇයට ජයග්‍රහණය හිමි වුණා. දෙරණටම වාසනාවන්තියක් වුණු ඒ සුන්දර රුවැත්තියව ‘හාට්’ පිටු අතරටත් එකතුකර ගත්තා.
🔴 2021 දෙරණ අවුරුදු කුමරිය ලෙසට ඔබ මෙවර අභිෂේක ලැබුවා. ඔබට දැනෙන සතුට කොයි වගේද?
ඒ අවස්ථාවේදී මට ලොකු සතුටක් දැනුණා. මම මෙයට පෙර කිසිම තරගාවලියකට අයැදුම් කරලා නැහැ. ඉතින් මගේ හිතවතුන් තමයි කිව්වේ අයැදුම් කරන්න කියලා. ඒ නිසාම මම දෙරණ අවුරුදු කුමරියට අයැදුම් කළා. මම හිතාගෙන හිටියා කොහොමත් අවසන් තුන්දෙනා අතරට හරි මාව තේරෙයි කියලා. ගොඩදෙනෙක් මාව දැනහඳුන ගත්තේ මේ ලැබුණු කිරුළත් එක්ක තමයි.
🔴 ඔබට මෙම තරගාවලියේදී තවත් ජයග්‍රහණයන් කිහිපයක් හිමිවුණා නේද?
ඔව්… සුන්දරම හිනාවට සහ දිගම කොණ්ඩය වෙනුවෙන් මට ජයග්‍රහණය කිරීමට හැකි වුණා.
🔴 ඉතින් කියමුකො බලන්න ඔබගේ ගම්පළාත?
මම ගම්පහ දිස්ත්‍රික්කයේ උඩුපිල ප්‍රදේශයේ.
🔴 ඔබ අධ්‍යාපනය හැදෑරුවේ?
හේනගම මහා විiාලයේ සහ රත්නාවලි බාලිකා විiාලයේ තමයි අධ්‍යාපන කටයුතු හැදෑරුවේ.
🔴 සෙව්වන්දි මේ ලබාගත්ත ජයග්‍රහණත් එක්ක ඉදිරි සැලසුම කොයි වගේද?
එහෙම ලොකු සැලැසුමක් මගේ හිතේ නැහැ. හැබැයි මම නිවේදන කටයුතු කරන්න වගේම රංගනය පැත්තෙන් ගමනක් යෑමට හිතේ පොඩි ආශාවක් තියෙනවා.
🔴 ඔබේ තිබෙන සුන්දරත්වය එක්ක වැඩිපුර කැමැත්ත සිනමාවට වෙන්නට ඇති?
තවම මම කිසිම නිර්මාණයකට සම්බන්ධ වෙලා නැති නිසා මට එය තීරණය කිරීමට අපහසුයි. හැබැයි හොඳ ආදරණීය කතාවක් එක්ක සිනමාවට පළමුවෙන්ම සම්බන්ධ වෙලා අත්දැකීමක් ලබා ගන්නට අවස්ථාවක් ලැබෙනවා නම් එය මට වටිනවා. දෙරණ රූපවාහිනිය හරහා මාව ගොඩදෙනෙක් දැනහඳුන ගත්ත නිසා දෙරණ ආයතනයෙන් නිෂ්පාදනය කරන ටෙලිනාට්‍යයකට සම්බන්ධ වීමට කැමැතියි.
🔴 ඔබ ගුවන් සේවිකාවක් ලෙස කටයුතු කරන නිසා කලා කටයුතු සඳහා යොමුවීමට පහසුවක් වෙයි?
පුංචිම කාලේ ඉඳලා මගේ තිබුණු එකම සිහිනය තමයි ගුවන් සේවිකාවක් වීම. ඉතින් මගේ ඒ සිහිනය දැන් සැබෑවෙලා. මගේ රාජකාරි කටයුතුවලට බාධා නොවන ලෙස තෝරා බේරාගෙන වැඩකටයුතු කරගෙන යනවා.
🔴 සාමාන්‍ය ජීවිතයේදී ඔබ කොයි වගේද?
මම නිතරම උත්සාහ කරන්නේ සතුටින් ඉන්න තමයි. ජීවත් වෙන කොට විවිධ ප්‍රශ්න එනවා. හැබැයි මට එහෙම කිසිම ප්‍රශ්නයක් නැහැ. මම ඉතින් හිනාවෙන්ම තමයි කාලය ගෙවන්නේ.
🔴 ඔබ දැන් පෙම්වතියක්ද?
අපෝ නැහැ… මම තවම එය ගැන හිතලා නැහැ. මට පවුලේ අයගෙන් ලැබෙන ආදරය හොඳටම ඇති.
වසන්ත විතාරණගේ