⬤ රඟපාන්න ගොඩක් කැමතියි…
⬤ ගගනගාමියෙක් වෙන්නයි මට ඕනෙ…
‘හොඳටම පැහිලා’ රූපවාහිනී වැඩසටහන හරහා ප්රේක්ෂක ආදරය දිනාගත්ත පුංචි තරුවක් තමයි දිනුජ ආර්යය ආකේෂ්වර කියන්නේ. හරිම දඟයෙක්. ඉතින් ඔහුව මේ දවස්වල අපට හමුවන්නේ ‘ඉස්කෝලේ’ ටෙලිනාට්යයේ ‘තමීර’ ලෙසටයි. ඒ පුංචි පුතාගේ දඟකාරම් ගැන
දැනගන්න අපි දිනුජ පුතාට කතා කළා.
🔴 දිනුජ පුතා ඉතින් කොහොමද?
හොඳින් ඉන්නවා.
🔴 අවුරුදු කාලේ මොකද කළේ?
සෙල්ලම් කළා අම්මලා එක්ක. අවුරුදු චාරිත්ර කළා. එයට අමතරව ඉස්කෝලේ වැඩකටයුතු කළා.
🔴 මේ දවස්වල පුතාව ගොඩදෙනෙක් දැනහඳුන ගත්තේ ‘තමීර’ ලෙසට නේද?
‘ඉස්කෝලේ’ ටෙලිනාට්යයේ ‘තමීර’ ලෙසට තමයි මම රඟපාන්නේ. නැන්දලා, මාමලා ගොඩදෙනෙක් මාව දැන් අඳුරනවා. හැමෝම කතා කරන්නේ තමීර පුතා කියලා. එයාල ඉතින් ටෙලිනාට්යයේ හොඳට මම රඟපානවා කියනවා. එතකොට මට ගොඩාක් සතුටුයි.
🔴 පුතා කොහොමද ඔය පුංචි වයසෙම හොඳට රඟපාන්නේ?
පිටපත හොඳට කියවලා බලනවා. මට සතුටින් රඟපාන්න තියෙන අවස්ථාවක සතුටින් රඟපානවා. දුකින් රඟපාන්න තියෙන අවස්ථාවක දුකින් රඟපානවා. මට හැමෝම උදවු කරනවා රඟපාන්න ගියාම.
🔴 හොඳටම පැහිලා කියලත් කියනවා නේද?
එහෙම කියන්නේ ඉතින් මම ‘හොඳටම පැහිලා’ වැඩසටහනෙන් ආපු නිසා. මම ඒ වැඩසටහනට සම්බන්ධ වෙන කොට පෙර පාසල් යනවා. දැන් ඉතින් මම ලොකු ළමයෙක් නිසා මම රඟපාන්න ගියත් විවේකීව වෙලාවට නැන්දා, මාමලා එක්ක විහිළු කරගෙන ඉන්නවා. එයාලා ඉතින් මට කියනවා හොඳටම පැහිලා කියලා.
🔴 ඔයා වැඩිපුරම කැමැති හඬකැවීම් කරන්නද, එහෙමත් නැතිනම් රඟපාන්නද?
මේ දවස්වල ‘තිසා’ ටෙලිනාට්යයේ ‘දොරු’ගේ චරිතයට තමයි මම හඬකැවීම් කරන්නේ. හඬකැවීමට මම ලොකු කැමැත්තක් නැහැ. ඒ මොකද එක තැනකට වෙලා ඉඳගෙන ඉන්න තියෙන නිසා. රඟපාන්න තමයි ගොඩක් කැමැති.
🔴 ඉස්කෝලෙදිත් දඟකාර පැංචෙක් කියන්නේ ඇත්තද?
‘තමීර’ වගේම තමයි මම දඟවැඩ කරනවා. පාසලේදී විවේකය ලැබෙන වෙලාවට යාළුවොත් එක්ක ගස් උඩ නැඟලා සෙල්ලම් කරනවා.
🔴 පුතා පාසල් යන්නේ කොහාටද?
ජනාධිපති විiාලයට කෝට්ටේ.
🔴 රඟපාන්න ගියාම අධ්යාපන කටයුතු කරගන්නේ කොහොමද?
මගේ දක්ෂතාවයට හැමෝම උදව් කරනවා. පාසලේ ගුරුවරුන් අතපසු වෙන පාඩම් වැඩ මට නැවැත කියලා දෙනවා. ඒ වගේම මගේ යහළුවන්ගේ පොත්පත් අරගෙන මම පාඩම් වැඩකටයුතු කරගන්නවා.
🔴 පුතාගේ අනාගත බලාපොරොත්තුව මොකක්ද?
ගගනගාමියෙක් වෙන්න තමයි මම ගොඩක් කැමැති. ඒ අතරතුර රඟපාන්න කැමැතියි.
වසන්ත විතාරණගේ
