⬤ කලින් වගේ දැන් අමාරු නැහැ…
⬤ තනිකමට තියෙන්නෙ රේඩියෝ එක විතරයි…
වයස් බේදයකින් තොරව ඇයට දැන් හැමෝගෙම ආදරේ ලැබෙනවා. ඒ ඇය ‘බස්එකේ ස්කෝලේ’ ටෙලිනාට්යයෙන් ‘ප්රියානි’ ලෙසට ඔබට සමීප වීමෙන්. ඉතින් ප්රියානි මේ යන ගමන කොයි වගේද කියලා අපිට කිව්වේ මේ විදියට…
🔴 ඔබ මේ ක්ෂේත්රයට සම්බන්ධ වන්නේ ජනප්රියතම ටෙලිනාට්යයකින්. කොහොමද ඔබට රංගන භූමිකාව හිමිවන්නේ?
මගේ පළමු රංග භූමිකාව, හැකියාව මම දැන හඳුන ගත්තේ පාසල් අවධියේ. පාසලේ විවිධ ප්රසංග, කෙටි නාට්ය තරග සඳහා මූලික වෙලා වැඩ කළා. මම පාසලට කැපී පෙනෙන චරිතයක් වුණා. නිළියක් වීමේ සිහිනයක් තිබුණත්, හිතුවේ නැහැ මට මේ තැනට එන්න ලැබෙයි කියලා. ‘සිඳූ’ ටෙලිනාට්යයේ පිටපත් රචක ලක්ෂාන් වත්තුහේවා තමයි මාව ‘සිඳූ’ ටෙලිනාට්යයේ ‘අනෝමා’ චරිතයට සම්බන්ධ කරගත්තේ. මුල්ම ගෞරවය ඔහුට හිමිවිය යුතුයි.
🔴 ‘අනෝමා’ චරිතයට ගොඩදෙනෙක්ගේ ආදරය හිමිවුණා නේද?
කෙටියෙන්ම පැවැසුවොත් වයස් බේදයකින් තොරව ප්රේක්ෂකයන්ගේ ආදරය හිමිවුණා. විදේශීය රටවලින් පවා ගොඩදෙනෙක් මට කතා කළා. ඉතින් ඔවුන්ගෙන් ඒ ලැබෙන ආදරය මට මිල කරන්න බැහැ. පාරක බැහැලා ගියත් සෙල්ෆියක් ගහලා මම එක්ක කතාබහ කරලා මට සුබපතන පිරිස තවමත් ඉන්නවා.
🔴 මේ දවස්වල ඔබ එක පැත්තකින් ‘අනෝමා’ ලෙසට සංවේදී වෙනකොට තවත් පැත්තකින් ‘ප්රියානි’ තුළින් වෙනස් රංග භූමිකාවක් දකිනවා?
ප්රදීප් රසාංග අධ්යක්ෂණය කරන ‘බස් එකේ ස්කෝලේ’ ටෙලිනාට්යයේ ‘ප්රියානි’ චරිතය ‘අනෝමා’ චරිතයට වඩා හාත්පසින්ම වෙනස්. ‘අනෝමාගෙන්’ මිදිලා ‘ප්රියානි වෙන එක මට ගොඩාක් අපහසු වුණා. සියලුම දෙනාගේ උදවු ඇතිව මම ඒ අභියෝගය බාර ගත්තා. දැන්නම් මම චරිතයට බැහැලමයි ඉන්නේ. මුලදී දැනුණු අපහසුතාවය දැන්නම් නැහැ.
🔴 හොඳක් කරන්න ගිහින් දැන් ඉතින් නරක නාමත් අහනවා ඇති?
ඒ දේ ඉතින් කාටත් උරුම – දෙයක් නේ. හැබැයි ඉතින් ප්රියානි ඒ සම්බන්ධකම් ගොඩනැඟුවේ දරුවා ගැන හිතලයි. දරුවාට මවකගේ ආදරයක් තිබිය යුතු නිසයි. හසිත මල්ලි ගැන දැනගෙන හිටියට බියුලාගේ තත්ත්වය මොනවගේද කියන්න මම දැනන් හිටියේ නැහැනේ. මෙහෙම වුණේ ප්රියානි නිසා කියලත් කියනවා.
🔴 ප්රියානිගේ ජීවිතය ගෙවී යන්නේ වැඩිපුරම ගුවන්විදුලියත් එක්ක?
ඔව්… ඉතින් ප්රියානිට දරුවෙක්වත් නැහැ. සැමියා දේවාලයේ කපුවෙක්. ඔහු කරන්නේ බොරුවක් කියලා දන්නවා. ඉතින් මගේ පාළුව, තනිකම බෙදා ගන්නේ ගුවන්විදුලියත් එක්ක.
🔴 රංවල පදනමට පිවිසෙන්නේ රංගනය ගැන හැදෑරීමටද?
2015 තමයි සහන් රංවල පදනමට මම සම්බන්ධ වුණේ. රංවල පදනමෙන් රංගනය ගැන මූලික අඩිතාලම ලබාගන්නවා. අමිතා රබ්බිඩිගල ඇය තමයි රංගනය ගැන මට උනන්දුවක් ඇති කරවන්නේ. ඒ ගුරු දෙපළගේ ගුරුහරුකම් මැද මම රංවල පදනමෙන් දැනුමක් ලබාගෙන මම දැන් රංවල පදනමේ නවක ශිල්පීන්ටත් දැනුමක් ලබා දෙනවා.
🔴 ඉදිරි වැඩකටයුතු කොහොමද?
හෙමින් ගමනක් යනවා. කිසිම කලබලයක් නැහැ මට. චරිත තෝරා බේරාගෙන තමයි මම නිර්මාණවලට සම්බන්ධ වෙන්නේ.
🔴 ඔබ ජාත්යන්තර පාසලක ගුරුවරියක් ලෙස කටයුතු කරන අතරතුර තමයි කලා කටයුතු කරගෙන යන්නේ. කොහොමද මේ සියල්ලට මුහුණ දෙන්නේ?
මගේ ප්රධාන වෘත්තිය ගුරු වෘත්තියයි. වත්තල ජාත්යන්තර පාසලක නර්තන අංශයේ ප්රධානි විදියට කටයුතු කරනවා. පාසලේ විදුහල්පතිතුමිය ඇතුළු ගුරු මණ්ඩලයෙන් ලැබෙන සහාය කිසිදා අමතක වෙන්නේ නැහැ. මගේ රාජකාරියට බාධාවක් නොවන විදියට තමයි අනෙකුත් වැඩකටයුතු කරගන්නේ.
වසන්ත විතාරණගේ
