⬤ ප්රහසනය එන්නෙ මගෙ ඇඟෙන්මයි…
⬤ කවදාවත් ප්රහසනයක් හෑල්ලු වෙලා නෑ…
⬤ අවුරුදු 30ක් මම ඉගැන්නුවා…
මහේෂ් රත්සර මද්දුමආරච්චි සහ තොන්ත සොයිසා යන සුසංයෝගය ටෙලි කලාව තුළ යම් ආකාරයක නමක් තැබුවේ ආරම්භයේ සිටමය. ඒ සිත්කලු සුසංයෝගය තුළ ජනප්රිය වූ තවත් එක් ටෙලියක් වන්නේ ‘පබළු’ය.
‘පබළු’ ටෙලිය කොයිතරම් ජනප්රිය වුණාද.., ඒ තරමටම ‘බෙනට්’ හෙවත් ‘බෙනා මාමා’ද ප්රේක්ෂකයන් අතර අසීමිතව ජනප්රිය විය.
‘බෙනා මාමා’ ලෙස රඟපෑවේ ප්රියන්ත සෙනෙවිරත්නය.
ප්රියන්ත වේදිකා රංගනය තුළ අති දක්ෂ චරිතාංග නළුවෙකි. වරෙක ‘බෙනා මාමා’ වැනි කවටයෙකි. තවත් විටෙක ‘කතන්දර පිටුව’ අලංකාර කරන ‘කතන්දර මාමා’ වැනි නිරූපණයන් රඟදක්වන ඔහු ළමා ළපටීන් අතර ජනප්රියම මිතුරෙකි.
සරලවම කියනවා නම් ‘ප්රියන්ත සෙනෙවිරත්න’ විවිධාකාර හැකියාවන් තුළ විස්කම් මවන්නෙකි.
මේ… ‘හාට්’ සමඟ ඔහු මොහොතකට දොඩමලු වූ විරාමයයි.
🔴 මේ දවස්වල ඔබ රූපවාහිනී සේවා කිහිපයක්ම හරහා ආලින්දයේ සැරිසරනවා?
ඔව්… ‘බස්එකේ ස්කෝලේ,’ ‘සොමිබර ජරමර,’ ‘ආර්ය වංශිකයෝ’ සහ ‘හිරු සුපර් ඩාන්සර්’ ඔස්සේ මම හවස් යාමයට ප්රේක්ෂකයන්ගේ නිවෙස්වලට ගොඩබහිනවා. ඒ අතර අලුත් ටෙලිනාට්ය දෙක තුනක රූප ගතකිරීම්වලටද සහභාගි වීමට නියමිතයි.
🔴 ඒ කියන්නේ ඔබ හැමදාමත් ටෙලි කලාව තුළ සුපිරි චරිතයක්?
අනේ මන්දා… ඔබ එහෙම අදහස් කරනවා නම්, ප්රේක්ෂකයා ඒ මතම හිතනවා නම් ඒක මට ලොකු සතුටක්.
🔴 කා අතරත් ඔබ කතාබහට ලක්වුණේ ‘පබළු’හී ‘බෙනා මාමා’ නිසා නේද?
බොහෝ දුරට එයට දිය යුතු උත්තරය වන්නේ ‘ඔව්’ කියන වචනයයි. ‘බෙනා මාමා’ කොයිතරමට ජනප්රිය වුණාද කියනවා නම් ‘මහේෂ් රත්සර මද්දුමආරච්චි’ ‘බෙනාව එයාගේ තිරනාටකය තුළ පස්සෙ පස්සේ නැතුවම බැරි චරිතයක් බවට පත්කරවන රූප රාමු පවා ඇතුළත් කළා.
‘පබළු’ අවසන් වී වසර ගණනක් ගෙවිලත් ‘බෙනා මාමා’ තවමත් මඟතොටදී ජනප්රියයි?
ඔව්… තවමත් ‘බෙනා මාමා’ යන නාමයෙන් ප්රේක්ෂකයන් මාව අමතනවා.., එයට ප්රතිචාර දක්වනවා. ‘පබළු’ දෙවැනි, තුන්වැනි වතාවට ගිය මොහොතේ පවා පළමු වතාවට වැඩි ප්රතිචාර ලැබුණු බවයි මට හැඟුණේ.
🔴 ඇතැමුන් ඔබේ ප්රහර්සනය උපහාසයට ලක්කරන අවස්ථා තියෙනවාද?
මෙහෙමයි.., ප්රේක්ෂකයන් යන විෂයටද විවිධාකාර මට්ටමේ අය එකතු වෙනවා. ඒ අතර ළඟට ඇවිදින් ඉතාම ගෞරවනීය ලෙස මගේ රංගන හැකියාව වර්ණනා කරන අයද විනෝදකාමී ආකාරයට ප්රතිචාර දක්වන අය වාගෙම උපහාසයට වාගේ හැංගිලා ඉඳලා කෑගහලා වාගේ ටිකක් අමුතු විදියට තම තමන්ගේ ප්රතිචාරය දක්වන්නන්ද සිටිනවා. එය උපහාසයක්, අපහාසයක්ද දන්නේ නැහැ. හැබැයි මම එය පිළිගෙන නිහඬ වෙනවා එච්චරයි.
🔴 ඔබ ගුරුවරයෙක්.., ‘බෙනා මාමා’ වැනි චරිත එම තනතුරට බාධාවක් වුණේ නැද්ද’
කවදාකවත් නැහැ.., විiා සහ තාක්ෂණය යන විෂය තුළ මම වසර තිහක් පමණ ගුරු සේවයෙහි නිරත වුණා. කිසිම දවසක ප්රින්සිපල් මහත්තයා හෝ මා සමඟ සිටි සිසුන් අතර මම අපහසුවට පත්වෙලා නැහැ. ‘වයිස් ප්රින්සිපල්’ තනතුර තුළද මම පසුකාලීනව පාසල් කිහිපයක සේවය කළා… එතැනදී පවා මම කවදාකවත් මගේ ප්රහර්සනාත්මක චරිත රංගනය නිසා හෑල්ලුවට ලක්වී නැහැ. ඒ වාගේම මගේ හොඳම විචාරකයන් සහ විවේචකයන් වූයේද මා සේවය කළ පාසල්වල ගුරු මඬුල්ල සහ සිසු සිසුවියොයි.
🔴 ප්රහර්සනයට ඔබ යොමු වූයේ කොහොමද?
ප්රහර්සනයට යොමු වුණේ නැහැ… එය මා වෙත පැමිණියේ මා තුළින්මයි. මගේ ඇඟේ සිටි ප්රහර්සන රංගනවේදියා මට කතා කළා. මම එයට ප්රතිචාර දැක්වූවා. හැඩ වැඩ වී ප්රේක්ෂකයා ඉදිරියට එය ගෙන එන්නේ ප්රියන්ත සෙනෙවිරත්න වන මමමයි. මොකද, කිසිවිටෙක එය හැදෑරීමකට ලක්වූයේ නැහැ. එය සහජ හැකියාවක්.
🔴 වේදිකාව තුළ ඔබ වඩා යොමු වූයේ චරිතාංග රංගනයට?
ඔව්… හාස්ය තුළ මම වේදිකාවේ රැඟූ වාර ගණන අවමයි. ‘මහාඝාත,’ ‘ත්රිත්ව,’ ‘බිසෝ,’ ‘වළලු,’ ‘සැණකෙලි,’ ‘ගුරු තරුව’ සහ ‘යක්ෂාගමනය’ යන සියලු නිර්මාණයන් තුළ මම ප්රවීණයන් හමුවේ කළු-සුදු චරිත මෙහෙවරක යෙදුණා. ඒ වාගෙම මෙතැනදී කිවයුතු තව යමක් තිබෙනවා. මගේ සමහර ප්රහර්සනයන් තුළද මම සංකීර්ණත්වය පිළිබිඹු කළ අවස්ථාද තිබුණා. ‘පිනි’ සහ ‘පොඩි මාමා’ ටෙලිනාට්යයන් එයට හොඳ නිදසුනක්. සම්භාව්ය චරිත රංගනයන්ට මම ප්රියයි. ඒ වාගේම ඇතැමුන්ට කරන්නට අපහසු අනුන් හිනස්සන චරිතයන් තුළින්ද මා ලබන ආශ්වාදය අපමණයි.
🔴 ඔබ දරුවන් අතරද අපූරු ප්රියතමයෙක්?
ඔව්… මම ළමා වැඩසටහන් ආරම්භ කළේ ජාතික රූපවාහිනියේ කතන්දර පිටුවෙන්. එයට පසු ‘ඩේන්ටි රස පැන’ හරහා විවිධ වැඩසටහන් කළා. වත්මනෙහි ‘හිරු සුපර් ඩාන්සර්’ යන නමින් මා නියුතුව සිටින්නේද පොඩිත්තන් පිරිවරාගත් රියැලිටි වැඩසටහන් මාලාවකටයි. ඇත්තෙන්ම දරුවන් සමඟ ගැවසීම හරිම සුන්දර දෙයක්.
🔴 නාට්ය සහ රංග කලාව පිළිබඳ පන්ති පාඨමාලාවක් පැවැත්වීමට ඔබ සූදානම් වෙනවා කියා ආරංචියි?
පාඨමාලාවක් කියන්නේ, මම කැමැතියි… මට සහජයෙන් ලැබුණු දේ ආධුනිකයනට බෙදා දෙන්න. අපේ ගෙදරම තියෙනවා ‘ස්වාර භූමි’ කියලා රංගන පාසලක්. අනුලා විද්යාලයේ හින්දි භාෂාව පිළිබඳ සංගීත විශාරදවරියක් වන මගේ නෝනා කාංචනා කාරියප්පෙරුම තමා එය මෙහෙයවන්නේ. පාසල් වේලාවෙන් පසුව ඈ එහි හින්දි භාෂාව සහ පෙරදිග සංගීතය ගැන පන්ති පවත්වනවා. ඉතින් මටත් හිතුණා, මා තුළ වන දැනුම බෙදාදෙන ආයතනයක් මෙහි පවත්වනවා නම් හොඳයි කියලා. කොරෝනාව හරිහැටි සමථයකට පත්වූ වහාම මම එය ආරම්භ කරන්නට බලාපොරොත්තු වෙනවා.
දමයන්ති රේණුකා ප්රනාන්දු
