⬤ ‘මෙයා නම් මාර කික් එක ෂා…’ කියලා තවම කොල්ලො කෙල්ලො කියනවා…
⬤ ඕඩියන්ස් එක දුන්නෙ හිතට වදින ඇංකෝර් එකක්…
වේදිකාවත්, පුංචි තිරයත් උඩුයටිකුරු කළ රංගනවේදියකු වූ ‘ආනන්ද වික්රමගේ’ මඳ අසනීප ගතියකින් පසුවෙතැයි යන ආරංචිය මත ඔහු ගැන තොරතුරු සොයා යන්නට අපට වූ ඕනෑකම ඉමහත් විය. ඒ ඉමහත් ඕනෑකම අමතක කර දමන්නට සිත් නොවූ කරුණු කාරණා අතර, ‘නෙයිනගේ සූදුවෙහි,’ ‘ජෝන් කොතලාවල’ චරිතයද, ‘වැනීසියේ වෙළෙන්දා’හී ‘බැසානියෝ’ද, ‘මවකගේ ගීතයෙහි,’ ‘කළුකඩ මුදලාලි’ද ප්රමුඛව සිටියහ. එලෙසම…, ආලින්දය රස සාගරයක් කළ යසපාලිත නානායක්කාරගේ ‘පටලැවිල්ල’ ටෙලිනාට්යයෙහි ආනන්ද වික්රමගේ කළ ‘ඩබල් ඇක්ටින්’ එක කොහොම අමතක කරන්නද? ඉතින්.., අප ඔහු සොයා ගිය සුහද හෝරාවක කදිම පෙළගැස්මයි මේ…
🔴 කොහොමද මේ දවස්වල ජීවිතේ… සුවදුක් සොයා බලන්නයි ආවේ…?
වරදක් නම් නැහැ. නිස්කලංක ජීවිතයකට හුරුව සිටිනවා. ටික දවසක ඉඳන් මම අසනීපෙන් ඉන්න බව තමයි කියන්නට අලුත් ආරංචියකට තියෙන්නේ. කොරෝනා උවදුර නිසා මානෙලුත්, මගේ ලොකු පුතා ජනිතත් මාව හරියට පරෙස්සම් කරනවා. රංගන කටයුතුවලටවත් මෑතකදි සහභාගි වුණේ නැහැ. අවසානයට 2020 මුල්කාලේ සඳුන් රාජකරුණාගේ ටෙලිනාට්යයක රඟපෑවා. ඒකේ නම නම් හරියටම නිච්චි නැහැ.
🔴 මොහොතකට මතකයට නඟමු… ඔබ කළ රංගන හරඹයේ පෙළගැස්ම
මොහොතකට නෙවෙයි, හැමදාමත්, හැම වේලාවෙම හිතේ හොල්මන් කරන්නේ ඒ අපූරු හරඹයන් තමයි. ඒ හරඹයෙහි පළමුව ඔබ අසල හිටගන්නේ ‘නෙයිනගේ සූදුව’යි?
මොනවා කියනවද? ඒ තේජවන්ත චරිතය මම කරන කොට ප්රේක්ෂකයෝ බලා හිටියේ තිගැස්සිලා වාගේ.., රස්තියාදුකාර මැරයෙක් විදියට ‘කොතලාවල මහත්තයා’ගේ චරිතය තම්බියෙක් විදියට වේදිකාවට එනකොට ඕඩියන්ස් එක දුන්නේ හිතට වදින ඇංකෝර් එකක්.
‘වැනීසියෝ වෙළෙන්දා’ නාට්යයට ඔබ ආවේ ඩග්ලස් රණසිංහගේ පුරප්පාඩුවට?
ඔව්… මාව එතැනට දමන්නැයි යෝජනාව ටෝනි රණසිංහට සහ බන්ධුල විතානගේට කළේ ‘පෝෂියාට’ රඟපෑ මානෙල් වානගුරුයි. ඒ දවස්වල ටෝනි සහ බන්ධුල ‘ෂේක්ෂ්පියර්’ නාට්ය කණ්ඩායම කියලා හරිම සංවිධානාත්මක ගෲප් එකක් හදාගෙන තිබුණා. මානෙල්ගේ යෝජනාවත් සමඟ මමද එහි ක්රියාකාරී සාමාජිකයකු වූවා.
🔴 ලස්සන පෝෂියා, ඔබේ බිරිය ලෙස වේදිකාවෙන් කුලගෙදරටත් ආවේ ඒ හැඳුනුම්කම නිසයි?
ඔව්… මිතුරුකමක් වූ අපේ බැඳීම පෙම් පලහිලව්වක් වී විවාහයෙන් කෙළවර වීමේ ආරම්භය දුන්නේ වැනීසියේ වෙළෙන්දා තමයි.
🔴 ටෙලි තිරයට ඔබේ පැමිණීම සිදුවූ ආකාරය?
එය සිදුවූයේ ‘තාරා දේවි’ ටෙලිනාට්යට ලූෂන් බුලත්සිංහල කළ ආරාධනය මතයි. ටෙලිනාට්යවල ආරම්භය ඇති වන කොට ඒ සඳහා ඉදිරිපත් වූ නිර්මාණකරුවන් රංගනය සඳහා නළු නිළියන් තෝරා ගත්තේ වේදිකාවෙන්… මමද ඒ අතර එක් අයකු වුණා.
🔴 වේදිකාවේ වටිනා තැන් ටෙලි කලාව නිසා ඔබට මඟහැරුණේ නැතිද?
‘තාරාදේවි’ වෙනුවෙන් ලූෂන් සමඟ ගිවිසුම් ගහනකොටත් මම වේදිකාව තුළ වටිනා මතකයන් තබා හමාරයි. රාජ්ය නාට්ය සම්මාන උළෙලේ පවා මම ඒ වනවිටත් සම්මානයට පාත්රව සිටියා. ‘තාරා දේවිය’ගෙන් පසු මට ටෙලිනාට්ය දිගින් දිගටම ලැබුණා. මම වේදිකාව අතහැරියේ නැහැ. කාලය මඳකම නිසා ඇතැම් නිර්මාණකරුවන් මා වෙනුවට විකල්ප සොයා ගත්තා. හැබැයි මම ඒ ගැන දුක් වෙන්නේ නැහැ. මොකද ටෙලි තිරය තුළ මා රඟපෑ චරිතයන් හැමදාමත් ප්රේක්ෂකයන් අතර කතාබහට ලක්වුණා. මඟතොටදී ඔවුන් මට ඒ වෙනුවෙන් දුන් අගය මිලකරන්න බැහැ.
🔴 ‘මවකගේ ගීතයෙහි,’ ‘කළුකඩ මුදලාලි’ ඒ අතර ප්රමුඛයි?
ඇයි… නාමල්ගොල්ලෙ කෛරාටික ඩබල් ගේම්කාරයා, යසපාලිත නානායක්කාරගේ ‘පටලැවිල්ල’ අමතක කරන්න පුළුවන්ද? අදටත් පෙට්රල් ෂෙඩ් එකකට ගියාම පෙට්රල් ගහන ළමයා වාහනයට ඇවිල්ලා අහනවා, ‘මුදලාලිද, හොරාද? අපට සල්ලි දෙයිද…?’ කියලා හෝටලයකට ගොඩවුණත්, අනේ ආනන්ද මහත්තයා… ‘පැටලැවිල්ල’ මතක් වෙලා තවම හිනා යනවා ඔයාව දැක්කම කියලා කියන්නේ හදවතින්ම තමයි.
🔴 ‘පබා’ එකේ තර්ඩ් ක්ලාස් මර්විනුත්, කොල්ලන්ට ‘කික්’ එකක් වුණා නේද?
ඒක අපූරු කතාව. ශාන්ත සොයිසා මුලින්ම මාව හොයාගෙන ආවේ ටයි-කෝට් අඳින කුලවත් චරිතයකටයි. ඉන්පස්සේ තිර පිටපත කියවන කොට මගේ හිත මුඩුක්කුවේ මර්වින්ට ඇදිලා ගියා. මම ශාන්තගෙන් ඇහුවා ‘මම මර්වින්ගේ රෝල් එක කරන්නද’ කියලා. ශාන්ත ගත්කටටම කිව්වා අපෝ ආනන්ද අයියා ඒ චරිතයේ පෙනුම ඔයාට හරි යන්නේ නැහැ කියලා. මම කිව්වා පෙනුම කියන්නේ වේෂ නිරූපණයනේ. අපි ඒක කරලා බලමු මුඩුක්කුවකට ගිහින්. හරි මම මර්වින්ට හැඩ ගැහෙන්නම් කියලා.
🔴 ඉතින් ඔබ මුඩුක්කු ආශ්රිත මිනිසුන් හමුවුණාද?
ආයෙත් අහලා.., මම ගිහින් ඒ මිනිසුන්ගේ හැසිරීම්, වචන, කරන කියන දේ සේරම ඉගෙන ගත්තා. ‘මර්වින්’ගේ චරිතයට හරි අපූරුවට මැදිවුණා. තවමත් තරුණ ළමයි මාව දැක්කම ‘ඔයා නම් මාර ‘කික්’ එක ෂා’ කියලා ‘මර්වින්’ගේ චරිත ස්වභාවය ගැන මතක් කරනවා.
🔴 සතුටුයි ඔබ ගැන.., හැමදාමත් කළේ කතාබහට ලක්වන චරිත?
සත්තකින්ම.., රඟපාන්න බැරි වුණු කාලෙක අපට තියෙන එකම සතුට ඒ මතකය තමයි.
🔴 ප්රවීණයකු ලෙස නවකයන්ට දෙන්න පණිවුඩයක්?
විවිධ රූපවාහිනී සේවාවන්ට තමන් සතු නිර්මාණ හැකියාව මෙහෙයවන්න අයිතිය දෙන්න එපා. නිර්මාණය ඔබේ නම්, එය විකාශනය වන කොටස් ගණන සහ එය නිමාවන තැන කොතැනදැයි කියන අයිතිය ඔබ සතුව තබාගන්න කියා ඔවුනට කියනවා මම.
දමයන්ති රේණුකා ප්රනාන්දු
