අද මම මෙතන ඉන්නෙ දමිත් අසංක හින්දා

පැරැණි ගීත සංගීතය වෙනස් කරමින්, ගායන ශෛලිය වෙනස් කරමින් නව ආරයට ගායනා කිරීම අද අපට සුලබව දැකිය හැකි කාරණයක්. ප්‍රසංග වේදිකාවේදී නිතර දක්නට ලැබෙන මේ වෙනසට වෙනස්ම රසයක් ලබාදුන් ගායනයක් ගැන පසුගියදා බොහෝදෙනාගේ අවධානය යොමුවුණා. ඒ රසයේ හිමිකරුවා වූ බුද්ධික පියුමාල් තමන් පැමිණි ගමනේ පෙරළිකාර වෙනස ගැන කියන්නට අප හා එක්වූයේ මෙලෙසින්.
බුද්ධිකගෙ අලුත් නිර්මාණය ගැන බොහෝදෙනා පහුගිය දවස්වල කතාවුණා?
ඇත්තටම ඕක වුණේ දමිත් අසංකගෙ සින්දුවක් මම වෙනස් ශෛලයකට ගායනා කරපු එක. ඒ හරහා බොහෝදෙනා ඒ ගැන කතා කරන්න පටන්ගත්ත. ගොඩක් හොඳ ප්‍රතිචාරත් ඒ වෙනුවෙන් ලැබුණා.
ඔබ බොහෝදෙනා හඳුනගන්නෙ දමිත් අසංකගෙ ගීත හරහා?
ඔව්. ඇත්තටම කිව්වොත් දමිත් අසංක හින්ද තමයි මට ක්ෂේත්‍රයේ මේ තරම් දුරක් එන්න පුළුවන් වුණේ. මොකද මාව ගායකයෙක් විදිහට රසිකයන් හඳුනගන්නෙ ඔහුගෙ ගීත ගායනා කිරීම හරහා.
ඔබ සංගීත ක්ෂේත්‍රයට පැමිණි ආකාරය ගැන කතා කළොත්?
මම ඉස්කෝලෙ යන කාලෙ ඉඳලම සංගීත ක්ෂේත්‍රයට එන්න ආසාවක් තිබුණ. ඒ නිසාම ඉස්කොලෙ තිබුණ පොඩි පොඩි සංගීත වැඩවලට සම්බන්ධ වෙන්න ඒ කාලෙ මට අවස්ථාව ලැබුණ. ඒත් එක්කම ගාල්ල, බද්දේගම අපේ ගමේ යාළුවොත් එක්ක හදාගත්ත පොඩි බෑන්ඞ් එකක් අපිට තිබුණ. ඒ බෑන්ඞ් එකත් එක්ක ගමේ පොඩි ප්‍රසංගයක සින්දු කියනව දැකල තමයි මට මුලින්ම සංගීත කණ්ඩායමකට සහභාගි වෙන්න ආරාධනාව එන්නෙ.
ඔබේ සංගීත ගමනේ හැරවුම් ලක්ෂ්‍යය වෙන්නෙ ‘සකුරා රේන්ජ්’?
මම සකුරා රේන්ජ් සංගීත කණ්ඩායමත් එක්ක සම්බන්ධ වෙන්නෙ 2008 වසරෙදි විතර. ඒ වෙනකොට සකුරා රේන්ජ් ලංකාවේ ඉතාමත් ජනප්‍රිය සංගීත කණ්ඩායමක්. ඔවුන් මට මුලින්ම කතා කළේ කැසට් පටයකට ගීත ගායනා කරන්න. ඇත්තටම ඒක කෙනෙක්ට ලේසියෙන් ලැබෙන්නෙ නැති චාන්ස් එකක්. ඒ වෙනකොට ලංකාවෙ කැසට්පට රැල්ලක් ඇතිවෙලා තිබුණ වෙලාවක්. ඉතින් එක පයින්ම මම ඒකට කැමැති වුණා.
කැසට් පටය හරහා ඔබට ලොකු ජනප්‍රියත්වයක් ලැබෙනව?
ඇත්තටම අවුරුදු 18ක තරුණයකුට ඒ වෙලාවෙ කැසට් එකක් කරන්න ලැබෙන එකම ලොකු වාසනාවක්. මට තිබුණ හීනයක් සැබෑ වීමක් විදිහටයි මම ඒක දැක්කෙ. ඇත්තටම මම මුදල් බලාගෙන නෙමෙයි ඒ වැඬේට කැමැත්ත දුන්නෙ. ලංකාවේ ජනප්‍රියතම කැසට් පට නිෂ්පාදන සමාගමක් යටතේ පටිගත කරපු කැසට් එක මාසයක් ඇතුළත පිටපත් 50,000ක් විතර අලෙවි වුණා කියල මට දැනගන්න ලැබුණ. නමුත් මට සතයක්වත් ඒ වෙනුවෙන් ලැබුණෙ නෑ.
ඔබව ක්ෂේත්‍රයට හඳුන්වාදුන් ‘සකුරා රේන්ජ්’ බෑන්ඞ් එකෙන් හදිසියේම ඔබ ඉවත් වෙනව?
මම තරුණයෙක් විදිහට බෑන්ඞ් එකට සම්බන්ධ වෙද්දි ඒ ක්ෂේත්‍රයේ ගැන මට වැඩි දැනුමක් තිබුණෙ නෑ. මම හිටියෙ මගේ හීනෙ සැබෑ වීම ගැන සතුටකින්. ඉතින් මගේ අතිනුත් යම් යම් වැරැදි වෙන්න ඇති. ඔවුන් බලාපොරොත්තු වුණ දේ මගෙන් ලැබෙන්න නැතුව ඇති. ඒ හේතුව මත බෑන්ඞ් එකෙන් මට ලැබෙන සහයෝගය නැතිව ගියා. ඉතින් මම තවත් එතැන ඉන්න එකේ තේරුමක් නෑ කියල හිතල තමයි සකුරා රේන්ජ් එකෙන් අයින් වුණේ.
ගායකයෙක් විදිහට ඔබ ස්ථාවර වෙන්නෙ ඉන් පස්සෙ නේද?
ඇත්තටම මම කිසිම බලාපොරොත්තුවක් ඇතිව නෙමෙයි ඒ වෙලාවෙ බෑන්ඞ් එකෙන් අයින් වුණේ. මම හිතන්නෙ ඒ කාලෙ තමයි මගේ ජීවිතේ අමාරුම කාලය වුණේ. ඒත් ඊට පස්සෙ ටික ටික ගායකයෙක් විදිහට මට ප්‍රසංගවලට සහභාගි වෙන්න අවස්ථාව ලැබෙනව.
ඔය අතරෙ ඔබේ වීඩියෝ එකක් ෆේස්බුක් එකේ ජනප්‍රිය වෙනව?
මම හිතන්නෙ මට මේ තත්ත්වයට එන්න සෑහෙන උදව් වුණේ ඒ වීඩියෝ එක. ඒක වුණේ අපි යාළුවොත් එක්ක ටි්‍රප් එකක් ගිහින් එනකොට පාරෙ අයිනෙ ඉඳන් කියපු ‘ඔබෙ සැප මගෙ සතුටයි’ සින්දුව නිසා. ඒ වෙලාවෙ කියපු සින්දුව මගේ යාළුවෙක් වීඩියෝ කරල ෆේස්බුක් දාල ඒක සෑහෙන ෂෙයා වෙන්න ගන්නව. ඒක දැකල තමයි මට මගේ පළමුවැනි ෂෝ එක විදිහට කොරියා යන්න අවස්ථාව ලැබෙන්නෙ. ඊට පස්සෙ එක දිගට පිටරට ෂෝවලට මට ආරාධනා ලැබෙනව. විශේෂයෙන්ම කියන්න ඕනෙ දකුණු කොරියාවෙ මට ආදරය කරන විශාල රසික පිරිසක් මේ වෙනකොට ඉන්නව. ඔවුන්ගෙ ආශීර්වාදය, ආදරය හැම වෙලාවෙම මට ලැබෙනව.
බෑන්ඞ් ගැන කලකිරුණු ඔබ නැවැතත් ‘වොලාරේ’ බෑන්ඞ් එකත් එක්ක සම්බන්ධ වෙනව?
‘වොලාරේ’ බෑන්ඞ් එකත් එක්ක මට සම්බන්ධ වෙන්න අවස්ථාව ලැබෙන්නෙත් ඔවුන් එක්ක පිටරට ෂෝ එකකට සහභාගි වෙන්න ලැබුණු අවස්ථාවක් හරහා. ඊට පස්සෙ ඔවුන් මට කළ ආරාධනාවකට අනුව තමයි මම ‘වොලාරේ’ එක්ක සම්බන්ධ වෙන්නෙ. අපි හඳුන්වල දුන්න ‘සෙමි එකොස්ටික්’ සංගීත ශෛලියත් එක්ක මේ වෙනකොට සංගීත ක්ෂේත්‍රයේ විශාල පෙරළියක් ඇතිකරන්න අපිට පුළුවන් වෙලා තියෙනව.
මෙතෙක් ආපු ගමන ගැන ඔබට මොකද හිතෙන්නෙ?
ඇත්තටම මේ ආපු ගමනෙ මම විශාල අභියෝගවලට මුහුණ දුන්න. ඒ හැම අවස්ථාවකම මට විශාල පිරිසකගේ සහයෝගය ලැබුණ. ඒ හැම කෙනෙක්ටම මම මේ වෙලාවෙ ස්තුති කරනව. විශේෂයෙන් මතක් කරන්න ඕනෙ මගේ බිරිඳ. මම වැටිල ඉන්න වෙලාවෙ ඇය තමයි මට හරි මගපෙන්වීම කරල මේ තත්ත්වයට එන්න සෑහෙන කැපවීමක් කළේ.
දමිත් අසංකව අත්හැරල තනියෙන් ගමනක් යන්න අදහසක් නැද්ද?
මගේම අලුත් නිර්මාණ කීපයක් කරන්න ලොකු සූදානමක් මේ වෙලාවෙ තියෙනව. ඉතින් ඉක්මනින්ම ඒ නිර්මාණ මගේ රසිකයන් අතරට එන්න තමයි බලාපොරොත්තුව.
ඉන්දික වික්‍රමරත්න