පෙරළියක් කරලා හොඳම නළුවා වුණු විල්සන්

පසුගියදා පැවැති ‘රයිගම්’ ටෙලි සම්මාන රාත්‍රියේදී කලාකරුවන් රැසක් සම්මාන හිමිකර ගත්තා. ඒ සම්මාන අතර සුවිශේෂී සම්මානයක් තමයි වසරේ හොඳම නළුවාට හිමි සම්මානය කියන්නේ. ඉතින් 2019 වසරේ ජාතික රූපවාහිනියේ විකාශය වුණු සුනිල් කොස්තා අධ්‍යක්‍ෂණය කළ ‘සුදු ඇඳගෙන කළු ඇවිදින්’ ටෙලිනාට්‍යයේ ‘විල්සන්’ චරිතය නිරූපනය කළ රංගන ශිල්පියාට තමයි ඒ සුවිශේෂී වරම ලැබුණේ. ඔහු ගැන අටුවාටීකා කීමට අවශ්‍ය නැහැ. ඉතින් ඔහුට කතා කළ එය ගැන ඔබට කියන්නට.
ඉතින් ආනන්ද හොඳම නළුවා සම්මානය හිමිවීම ගැන අපි මුලින් කතා කරමු නේද?
ඇත්තටම වසර ගණනාවක ඉඳලා මේ ක්‍ෂේත්‍රයට මම වැඩ කළා. ඉතින් ඒ සියලුම අත්දැකීම් එකතු කරලා ලැබුණු වටිනාකමක් තමයි මේ. අද මම මෙතැන ඉඳීවි, හෙට තව කෙනෙක් මේ තැනට හිමිකම් කියයි. හැබැයි සුදුස්සාට සුදුසු දේ හිමි වීම සතුටක්. සුනිල් කොස්තා අධ්‍යක්‍ෂණය කළ ‘සුදු ඇඳගෙන කළු ඇවිදින්’ ටෙලිනාට්‍යයේ මම නිරූපණය කළ ‘විල්සන්’ චරිතය වෙනුවෙන් තමයි හොඳම නළුවාට මෙවර ‘රයිගම්’ සම්මානය මට හිමිවුණේ.
‘විල්සන්’ පුංචි තිරයේ ලොකු පෙරළියක් කළා නේද?
ඒ තරම් පෙරළියක් කරපු නිසානේ මෙවැනි සම්මාන උළෙලෙක ප්‍රධාන සම්මානයක් ගන්න තැනට පත්වුණේ. එය මට විතරක් නෙවේ රූපවාහිනී මාධ්‍ය නාළිකාවලටම ආදර්ශයක් කියලා මම හිතනවා.
රූපවාහිනී මාධ්‍ය තුළට පැමිණි අතීතය ගැන කතාකළොත්?
1986දී තමයි මම පළමු වරට ටෙලිනාට්‍යයකට සම්බන්ධ වුණේ. ඒ සුදත් සේනාරත්න අධ්‍යක්‍ෂණය කළ ‘මවකගේ ගීතය’ ටෙලිනාට්‍යයේ ‘පියදාස’ගේ චරිතය තුළින් තමයි. ඉන්පසු මට සුවිශේෂී ටෙලිනාට්‍යවලට සම්බන්ධ වීමට අවස්ථාව උදාවුණා. ඔය අතර මට ආනන්ද අබේනායක හමුවුණා. ඔහුගේ හමුවීමත් එක්ක මගේ රංගන ජීවිතය සුන්දර ගමනක යෑමට දොර අවකාශය වගේම සුවිශාල අත්දැකීම් රාශියක් ලබාගැනීමට හැකිවුණා. ඔය අතර තමයි අප්පච්චි, තක්‍ෂලාව, බැද්දේ කුලැටිය, වීරයා ගෙදර ඇවිත් වැනි සුවිශේෂී ටෙලිනාට්‍ය රැසකටම දායක වීමට අවස්ථාව ලැබුණේ. බැද්දේ කුලැටිය ටෙලිනාට්‍යයේත් හොඳම සහාය නළුවාටත් සම්මාන මට ලැබුණා.
‘විල්සන්’ චරිතයට ඔබට සම්මාන හිමිවෙයි කියලා හිතුවද?
සුනිල් කොස්තා කියන්නේ වර්තමාන ටෙලිනාට්‍ය කලාවේ සිටින නිර්මාණවේදීන්ගෙන් සුවිශේෂී පුද්ගලයෙක්. එවැනි නිර්මාණකරුවන් අතළොස්සයි සිටින්නේ. ඔහු නිර්මාණය කළ පියස, සුදුසුයි උසයි ඇතුළු ටෙලිනාට්‍ය කිහිපයක්ම සුවිශේෂී කඩඉම් නාට්‍ය බවට පත්වුණා. ඉතින් එවැනි නිර්මාණකරුවකුගේ නිර්මාණයක අපි රංගනයෙන් දායක වන චරිත සුවිශේෂී චරිත බවට පත්වෙනවා.
ගුණාත්මක නිර්මාණ කලාවක් බිහිකිරීමට මෙගා ටෙලිනාට්‍ය නතර කළයුතුමද?
මෙගා ටෙලිනාට්‍යවලින් කාටද ප්‍රයෝජනයක් තිබෙන්නේ. නිෂ්පාදකවරුන් මුදල් හම්බකරයි. එතැනින් එහාට කිසිම පලක් නැහැ. අවුරුදු ගාණක් එකම තැටිය කැරැකෙන එකයි වෙන්නේ. එයින් ජනතාවත් මොට්ට වෙනවා විතරයි. මෙගා ටෙලිනාට්‍ය නතර කළොත් තවත් නිර්මාණකරුවන් රැසකට නිර්මාණ බිහිකිරීමට අවස්ථාව ලැබෙයි. ඒ වගේම අපටත් නිරූපණය කිරීමට සුවිශේෂී චරිත ඉඩකඩ වැඩියි.
ඔබ නිරූපණය කරන චරිතවල ඒකාකාරී බවක් තියෙනවා කියලා චෝදනා එල්ල වෙනවා?
චරිතය තුළ එකිනෙකට වෙනස්. නමුත් අපි චරිතයක් හොඳට කළාම එවැනි චරිතයක් නිර්මාණ පිටතකින් බිහිවුණාම අහවල් කෙනා අර නාට්‍යයේ හොඳට රඟපානවා කියලා තෝරලා තීරණය කරනවා. එවැනි චරිතවලට අපි දැනගන්න ඕනෑ එයින් මිදීමට.
මේ දවස්වල අපි ආනන්දව දකින්නේ කනත්තත් එක්ක ගනුදෙනු කරන බව?
කනත්ත එක්ක දැම්ම තියාම ගනුදෙනු තියාගන්න එක හොඳයි. කවදා හරි අපි එතැනට ගිහින්නේ අපි කරපු පින් – පව් තීරණ ගනුදෙනු කරන්නේ. ඉතින් මේ දවස්වල සත්‍යා ටෙලිනාට්‍යයෙත් කනත්තත් තුළ තමයි මගේ රංග භූමිකාව දැක ගැනීමට අවස්ථාව ලැබිලා තියෙන්නේ.
ඔය අතර ආනන්ද මහව පැත්තේ මොකද කරන්නේ?
සුමිත් රත්නායකගේ සුවිශේෂී නිර්මාණයක රූපගත කිරිම් මහව අවට සිදුවෙනවා. ඉතින් මේ දවස්වල ඒ ටෙලිනාට්‍යයෙත් වැඩ කරගෙන යනවා.
වසන්ත විතාරණගේ