ශ්රී ලංකාවේ අනාගත නායකයින් තනන වේදිකාව Sirasa Debater අන්තර් පාඨශාලීය විවාද තරගාවලියේ 05 වන අදියරේ ජය තියුණු තරගයකින් අනතුරුව කොළඹ සිරිමාවෝ බණ්ඩාරනායක විදුහලට හිමි වුණා. තර්ක විතර්ක හැකියාව ඇති සංවාදශීලී දරුවන්, පාසල් මට්ටමේදීම හදුනාගෙන ඔවුන් මානව සම්පතක් ලෙස සමාජයට දායක කිරීමට අවශ්ය ප්රමිතිගත අඩිතාලමක් සැකසීම Sirasa Debater වැඩසටහනෙන් සිදුවෙනවා. Sri Lanka Latest News
05 වන අදියර සඳහා දිවයින පුරා පාසල් 600කට අධික සංඛ්යාවක දරු දැරියන් සහභාගී වූ අතර, මූලික වටයේ තේරීම් මහනුවර, අනුරාධපුර, අම්පාර, කුරුණෑගල සහ මාතර නගරවලදී පැවැත් වුණා. එම තේරීම්වලින් පාසල් 60ක් ප්රධාන තරගාවලියට තෝරාගත් අතර, පසුගිය මාස හයක කාලය තුළ පැවති තරග වට පහකින් අනතුරුව අවසන් මහා තරගයට පාසල් හතරක් සුදුසුකම් ලැබුවා.
අවසන් මහා තරගය පසුගිය සෙනසුරාදා සවස 5 සිට රත්මලාන ස්ටයින් ස්ටූඩියෝස් පරිශ්රයේදී අතිවිශාල ප්රේක්ශක පිරිසක් ඉදිරියේ පැවැත් වුණා. කොළඹ සිරිමාවෝ බණ්ඩාරනායක විද්යාලය, රාජකීය විද්යාලය, කාන්තා විද්යාලය මෙන්ම මහනුවර චන්ද්රානන්ද බෞද්ධ විද්යාලය මෙහිදී තර්ක විතර්ක ඉදිරිපත් කරමින් තරග කළ අතර පසුපෙළ ප්රතියෝජක පාර්ශවයෙන් තරග කළ කොළඹ සිරිමාවෝ බණ්ඩාරනායක විදුහල එහි ශූරතාව දිනාගත්තා. අවසන් මහා තරගයේදී ශූරයන්, අනුශූරයන් සහ තෙවන ස්ථානය බෙදාගන්නා පාසල් දෙකටද මුදල් ත්යාග සහ විශේෂ සම්මාන පිරිනැමුණා.
