මේක ඇත්ත කතාවක්… ගොඩක් දේවල් මඟහැරුණා… !
රත්නපුරේ ගොඩකවෙලින් පාසල් ගිහින් ටවර්හෝල් එකෙන් රංගනය උගත් ඇය, අද තමන්ගේම සිනමා නිර්මාණයකින් එංගලන්තය දක්වා පාර කපාගෙන ඉවරයි. කෙටි කාලයක් ක්ෂේත්රයෙන් ඈත්වෙලා හිටියත් ඇය ‘බිඳුණු අහිංසකත්වය’ අරන් ආයෙත් ඇවිත්. මේ හර්ෂිගේ රංගන දිවියේ අලුත්ම පිටුවයි.
හර්ෂි ගැන මුලින්ම සඳහන් කළොත්?
මම හර්ෂි වික්රමසිංහ. මගේ ගම් පළාත රත්නපුර ගොඩකවෙල. මම අධ්යාපනය හැදෑරුවේ ගොඩකවෙල රාහුල ජාතික පාසලෙන්.
එතකොට හර්ෂි කලාවට යොමුවෙන්නේ කොහොමද?
මම මුලින්ම හිතුවා කලාවට යොමුවෙන්න කලින් ඒ සම්බන්ධව පිළිගත් ආයතනයක හැදෑරීමක් කරන්න. ඒ අනුව මම ටවර්හෝල් පදනමේ අවුරුදු දෙකක පාඨමාලාවක් හැදෑරුවා. එහි නාට්ය හා රංග කලාව හැදෑරීමෙන් පසු මම මුලින්ම වේදිකා නාට්ය රංගනයට එකතු වුණා. ඊට අමතරව රංග වස්ත්රාභරණ පැත්තෙනුත් මම සම්බන්ධ වුණා.
හර්ෂිගේ මුල්ම වේදිකා ගමන මතක් කළොත්?
දමයන්ති ෆොන්සේකා අධ්යක්ෂණය කළ ‘අපේ ඇත්තෝ’ වේදිකා නාට්යයේ ප්රධාන චරිතයක් රඟපෑමට අවස්ථාව ලැබුණා. මම එහි රඟපෑවේ මීමැසි රැජිනගේ චරිතය. ‘බෝංචි ගෙදර’ වේදිකා නාට්යයේ ඩැනීගේ චරිතයත් මම රඟපෑවා. චාමික හත්ලාවත්තගේ ‘හරි අපූරු දවසක්’ වේදිකා නාට්යයෙත් මම රඟපෑවා.
‘හරි අපූරු දවසක්’ ඔබට විශේෂ දවසක් වුණා කියලා මම සඳහන් කළොත්?
මගේ රංගන ජීවිතයේ සුවිශේෂතම දවස තමයි ‘හරි අපූරු දවසක්’ වේදිකා නාට්යය. ඒ වෙනුවෙන් විදේශගත වීමට පවා මට අවස්ථාව ලැබුණා. රාජ්ය නාට්ය උළෙලේදී ‘හරි අපූරු දවසක්’ නාට්යයට සම්මාන රැසක් හිමිවුණා. පසුකාලීනව තමයි අපේ කණ්ඩායම ඊජිප්තුවට ගියේ. ඒ ගියෙත් සම්මාන උළෙලකට. ඒ තරගය වෙනුවෙන් ඉදිරිපත් කරපු රටවල් ගණනාවක නාට්ය අපිට දැකබලා ගන්න පුළුවන් වුණා. ඒ නාට්යවල භාෂාව අපිට තේරුම් ගන්න බැරි වුණත් නාට්ය බලාගෙන යනකොට ඒවායේ අදහස තේරුම් ගන්න පුළුවන් වුණා.
තවම ටෙලිනාට්ය රංගනයට අවස්ථාවක් ලැබුණේ නැද්ද?
තවම පුංචි තිරයට ආරාධනාවක් ආවේ නැහැ. හැබැයි මට ‘මචං’ චිත්රපටයේ සහාය කලා ශිල්පිනියක් විදියට වැඩකරන්න අවස්ථාව ලැබුණා. තිරයෙන් පිටුපස ඉඳගෙන මම ගොඩක් දේවල් ඒ සම්බන්ධව ඉගෙන ගත්තා. ඒ අවස්ථාව ලැබුණෙත් දමයන්ති ෆොන්සේකා හරහා. රංගනය පැත්තෙන් මට ගොඩක් දේවල් මගහැරුණා.
එහෙම වීමට හේතුව කියන්න පුළුවන්ද?
මම අවුරුදු පහක් විතර ක්ෂේත්රයෙන් ඈත්වෙලා හිටියා. ඒක තමයි ප්රධානම හේතුව. පසුකාලීනව මම රත්නපුර ජාත්යන්තර පාසලක ගුරුවරියක් ලෙස කටයුතු කළා. ඒ ඉන්න ගමන් මම පිටපත් කිහිපයක් රචනා කළා දවසක මගේම කියලා නිර්මාණයක් කරනවා කියන අදහසින්.
‘බිඳුණු අහිංසකත්වය’ නිර්මාණය ගැන කතා කරමු?
මගේ කුලුඳුල් කෙටි චිත්රපටය තමයි මේක. මෙය පාදක වෙන්නේ සත්ය කතාවක් ඇසුරෙන්. අනුරංග වික්රමසිංහ මගේ දක්ෂතාව හඳුනාගෙන අපි එකතු වෙලා නිර්මාණයක් කරමු කියලා කතාබහ කළා. ඔහුගේ මගපෙන්වීම යටතේ තමයි මේ නිර්මාණය බිහිවුණේ. මම ඊට රංගනයෙන් දායක වෙනවා. අනුරංග වික්රමසිංහ, හේමන්ත කෝරාළගේ ප්රධාන චරිත රඟපානවා. හිතුව තරම් ලේසි වුණේ නැහැ. හැබැයි මගේ පිටුපස ඉඳගෙන මාව ගොඩ දෙනෙක් දිරිමත් කළා. දමයන්ති ෆොන්සේකා පවා මට කිව්වේ හරියන්න හරි වරදින්න හරි කරපන් කියලා.
කොයි කාලවකවානුවේද මේ නිර්මාණය දැකබලා ගන්න පුළුවන්?
මගේ යාළුවෙක් කතා කරලා කිව්වා එංගලන්තේ ෆිල්ම් ෆෙස්ටිවල් එකකට දාන්න හර්ෂි නිර්මාණයක් තියෙනවා නම් එවන්න කියලා. ඒ අදහසට තමයි මම මේ කෙටි චිත්රපටය නිර්මාණය කළේ. පුවත්පත් කලාවේදීන්ගේ මණ්ඩලයේ ජූලි 30 දින සවස 4.00ට මෙය ප්රදර්ශනය කරනවා. මම රංගන පාසලක් කරගෙන යනවා කුරු දරුවන්ට. ඔවුන්ගේ නිර්මාණ කිහිපයකුත් එදාට පෙන්වනවා.
වසන්ත විතාරණගේ
