අකිල තුන්කොන් ආදරයක පැටලෙයි

කලා ක්‍ෂේත්‍රයේ අපි දකින සුවිශේෂී රාජ කුමාරයෙක් ලෙස ඔහුට දායාද හිමිවී ඇත. ඉතින් අකිල ධනුද්දර මේ දවස්වල විවිද නිර්මාණ කිහිපයකින් අපට හමුවෙනවා. හැබැයි ඉතින් ඔන්න නුදුරු දිනයකදී අකිලත් නැවැත පැවිදි දිවියට යන බව ආරංචියත් එක්ක ඒ කරුණු සියල්ලේ ඇත්ත නැත්ත සොයා දැනගැනීමට අපි ඔහුට කතා කළා. හැමදාමත් ‘මව්රට’ට ළෙන්ගතු අකිල අපේ ඇරැයුමට කතා කළේ මේ විදියට.
මේ දවස්වල අකිල පුංචි තිරයේ රජ පෙම්වතෙක් වෙලා නේද?
මම ඉතින් හැමදාමත් රාජ කුමාරයෙක් තමයි. ‘මහා විරු පාණ්ඩු’ ටෙලිනාට්‍යයේ මම හබරා ලෙසින් බුම්බක ගුතාට ආදරය කරනවා. කියන්න සතුටුයි ‘මහා විරු පාණ්ඩු’ ටෙලිනාට්‍ය දැන් ඉතාමත් ජනප්‍රිය තැනට ඇවිත්.
ඔබ එක පැත්තකින් රාජ කුමාරයෙක් තවත් පැත්තකින් සරණ ලෙසින් අප වෙතට ළංවුණා?
ඔබ ඔය අසන්නේ අද සිට ස්වාධීන රූපවාහිනියේ විකාශය වන ‘ගරුඬ මුහුර්තය’ ටෙලිනාට්‍ය ගැන වෙන්න ඇති. ඇත්තටම ‘ගරුඬ මුහුර්තය’ ටෙලිනාටයට මම රංගනයෙන් දායක වුණා. ‘සක්කාරං’ ටෙලිනාට්‍ය වගේ සුපිරි වැඩක්. ඒ වගේම ඉතාමත් බලවත්. වැඩ කරන්න ලැබුණු ශිල්පීන්ගෙන් පවා සරණට ලොකු ශක්තියක් වුණා. අහිංසක චරිතයක්. කතාවේ සුන්දරත්වය අද සිටම විඳගන්න එතකොට දැනේවි.
ඔබව අප මෙතෙක් දැක්කේ ‘දෙහදක් බැඳුණු ආදරයක්’ තුළින්. නමුත් ප්‍රථම වතාවට තුන්කොන් ආදරයක පැටළුණු බව ආරංචියි?
දිගු දෑස, යකඩ දෝලි, දස්කොන්, ශ්‍රී රජ නිර්මාණ තුළ මම පෙම්වතියන් දෙන්නෙක්ට ආදරය කළා. නමුත් ‘ගරුඬ මුහුර්තය’ ටෙලිනාට්‍යයේ තුන්කොන් ආදරයක පැටළුණා. එක්කෙනෙක්ට හදවතින්ම ආදරය කරනවා. තවත් කෙනෙක් බලෙන් වගේ ආදරය ගන්නවා. සහා්දරියක් විදියට ආදරයෙන් බලාගන්න තවත් කෙනකුට ගමේ උදවිය මට කටකතාවක් හදනවා. ඔය විදියට තමයි සරණගේ තුන්කොන් ආදරය ගලාගෙන යන්නේ සුන්දර විදියට.
‘මහා විරු පාණ්ඩු’ අබරා චරිතය ඔබේ මේ ගෙවීයන ජීවිතයට හා සමානයි නේද?
ඇත්තටම ඔව්. මම දැන් තාත්තා කෙනෙක්. මගේ දුවට දෙන රැකවරණ, ආරක්‍ෂාව, ආදරය වගේම තමයි පාණ්ඩු කුමරුට මම දෙන ආරක්‍ෂාව ආදරය. මට ඒ වෙලාවට දැනෙන්නේ මගේ දරුවා රකිනවා වගේ සිතුවිල්ලක් තමයි.
උතුරා යන පිය සෙනෙහස ගලාගෙන යන අතරතුර තමයි ඔබ විවිධ චරිත මවන්නේ. කොහොමද ඔබ හිත එක්තැන් කරගන්නේ?
දුවව මට නිතරම මතක් වෙනවා. රූපගත කිරීම්වලට එළියට බහින කොට දුව මට වැඩියෙන් ආදරය කරන බව දැනෙනවා. දුවගේ ඉරියව්වලින් වචනවලින් විස්තර කරන්න බැරි අමාරු ලස්සන කාලයක තමයි මම මේ කාලය ගෙවන්නේ.
ඔබව අපට හමුවන්නේ ‘සිරි පැරකුම්’ චිත්‍රපටය හරහා. ඔබ දැන් ටෙලිනාට්‍යවලට මුල්තැන දී ඇති බව අපට දැනෙනවා?
එහෙම වර්ගීකරණයක් නැහැ. ඉදිරියේදී මම සම්බන්ධ වුණු චිත්‍රපට කිහිපයක් තිබෙනවා තිරගත වීමට. එකගෙයි සොකරි, දඩ ඉම, ශ්‍රී වික්‍රම රාජසිංහ, ගුත්තිල.
ජැක්සන් ඇන්තනී සුවිශේෂී රංගන ශිල්පියෙක් බව අප කවුරුත් දන්නවා. ඔහුගේ නිර්මාණවලට ඔබේ දායකත්වය ලබාදෙද්දී පිය-පුතු ගනුදෙනුව කොයිවගේද?
අපේ නිවෙසම කලාගාරයක්. තාත්තාගේ නිර්මාණවලට සම්බන්ධ වෙලා අපි වැඩ කරනකොට අනෙකුත් ශිල්පීන්ට වගේම ඔහුත් අපට ගුරුවරයෙක් විදියට කියලා දෙනවා කරන්න ඕනෑ දේවල්. හැබැයි විශේෂත්වයක් වන්නේ අනෙකුත් ශිල්පීන්ට වඩා අප්පච්චි කියන දේ අපට වටහා ගැනීමේ පහසුවක් දැනෙනවා අප්පච්චි එක්ක නිරන්තරයෙන් බැඳී සිටින නිසා.
අකිල ඉදිරියේදී පැවිදිවීමට යන බව ආරංචියි. ඇත්තද මේ කතාව?
බොහෝ දුරට ඇත්ත තමයි ඒ කතාව. හැබැයි මම පැවිදි වෙන පළමු අවස්ථාව නෙවේ මේ ‘ශ්‍රී රජ’ ටෙලිනාට්‍යයේ ධාතුසේන සාමණේර පොඩි හාමුදුරුවන්ගේ චරිතය නිරූපණය කළේ මම. හැබැයි ගොඩදෙනෙක් දන්නේ නැහැ ඒ මම කියලා. සංජීව පුෂ්පකුමාර අධ්‍යක්‍ෂණය කරන සුවිශේෂී සිනමා නිර්මාණයක පැවිදි චරිතයකට මට ආරාධනා කළා. දැනට සිදුකරන වැඩකටයුතු හමාර කර එයට සූදානම් වීම තමයි මගේ සැලසුම.
ඇත්තට අකිල මොකක්ද මේ ඩබල් චිකන් කතාව?
ආ ඒ ඉතින් අපේ කෑම වට්ටෝරුව තමයි සෙට් එකේදි. මේ දවස්වල ‘මහා විරු පාණ්ඩු’ ටෙලිනාට්‍යයේ සෙට් එකේ පැතුරුණු කතාවක්. මමයි රිතු ආකර්ෂයි කන්න ගියාම මොනවාහරි දෙයක් දෙක ගානේ ගන්නවා. ඉතින් චිකන් කෑලිත් දෙක ගානේ බෙදා ගන්නවා. අපි ෂූටිං නැති දාටත් අපිට කියලා සුනෙත් අයියා, රුචිර චිකන් කෑලි දෙක ගානේ ගන්නවා. හරිම රසවත් කතා තියනෙවා සෙට් එකේදි ඉතින්.
වසන්ත විතාරණගේ