ගල්අඟුරු ආනයනයේදී අක්රමිකතා රැසක් සිදුව ඇති බවටත්, ගල්අඟුරු බාල බවටත් විගණකාධිපති දෙපාර්තමේන්තුව නිකුත් කළ වාර්තාව මගින් අනාවරණ කර තිබුණද, එම ගනුදෙනුවට ඍජුවම චෝදනා එල්ල වී ඇති බලශක්ති අමාත්ය කුමාර ජයකොඩි මහතා එම තනතුරෙන් ඉවත් නොකිරීමට ජනාධිපතිවරයාගේ පාර්ශ්වය තීරණය කොට ඇති බව වාර්තා වේ.Sri Lanka Latest News
විගණකාධිපති දෙපාර්තමේන්තුව මගින් පසුගිය අඟහරුවාදා දිනයේදී ගල්අඟුරු ආනයනය කිරීම සම්බන්ධයෙන් වූ සිය වාර්තාව ප්රසිද්ධ කිරීමත් සමග ප්රධාන විපක්ෂය වූ සමගි ජන බලවේගය ඇතුළු විපක්ෂයේ අනෙකුත් පක්ෂද, සිවිල් සංවිධානද, වෘත්තිකයන්ද ආණ්ඩුවට ප්රබල බලපෑමක් එල්ල කරමින් කියා සිටියේ වහාම කුමාර ජයකොඩි මහතා අමාත්ය තනතුරෙන් ඉවත් කිරීමට පියවර ගත යුතු බවකි.
විශේෂයෙන්ම ගල්අඟුරු වංචාවක් සිදුව ඇති බවට පළමු වරට රටට අනාවරණ කළ විපක්ෂ නායක සජිත් ප්රේමදාස මහතා ඇතුළු සජබ මන්ත්රීවරුන් පාර්ලිමේන්තුවේදීත්, ඉන් පිටතදීත් ජනාධිපතිවරයාට පෙන්වා දී තිබුණේ වංචා දූෂණ සිදු නොකරන බවට පොරොන්දු දෙමින් බලයට පත්වූ ආණ්ඩුව සිය සුජාතභාවය තවදුරටත් ආරක්ෂා කරගැනීමට නම් අනිවාර්යයෙන්ම කුමාර ජයකොඩි මහතා අමාත්ය තනතුරෙන් ඉවත් කළ යුතු යැයි කියාය.
විපක්ෂයට අමතරව පැලවත්ත නියෝජනය කරමින් ජවිපෙ පාර්ශ්වයන්ද ජනාධිපතිවරයාට දැනුම්දී තිබුණේ තවදුරටත් කුමාර ජයකොඩි මහතා ආරක්ෂා කිරීමට කටයුතු කරන්නේ නම් ආණ්ඩුව ජනතාව අතර අප්රසාදයට පත්වීම වැළැක්විය නොහැකි බවකි.
එවැනි පසුබිමක් යටතේ වුවද ‘මව්රට’ පුවත්පතට ඇති තොරතුරුවලින් කියැවෙන්නේ ජනාධිපතිවරයා සහ ඔහුට සමීප පාර්ශ්ව විසින් අමාත්ය කුමාර ජයකොඩි මහතා තවදුරටත් ආරක්ෂා කිරීමට තීරණය කොට ඇති බවකි.
කෙසේ වෙතත් මෙවැනි පසුබිමක් යටතේ මේ වනවිට විපක්ෂ කණ්ඩායම් තීරණය කොට ඇත්තේ විගණන වාර්තාව පාදක කොට ගෙන අමාත්ය කුමාර ජයකොඩි මහතාට එරෙහිව අධිකරණය හමුවේ නඩු පැවරීමටය.
සමගි ජන බලවේගය ප්රමුඛ පාර්ලිමේන්තුව නියෝජනය කරන අනෙකුත් පක්ෂත්, පාර්ලිමේන්තුව නියෝජනය නොකරන තවත් පක්ෂ කිහිපයකුත් මේ වනවිට ඊට අදාළ කටයුතු සිදුකිරීම සඳහා නීතිඥ කණ්ඩායම්වලට භාරදී ඇති බවක්ද දැනගන්නට ඇත.
2015 වසරේ සිදුවූ සිදුවීමක් මුල්කරගෙන අමාත්ය කුමාර ජයකොඩි මහතාට එරෙහිව අල්ලස් කොමිසම මගින් මහාධිකරණය හමුවේ අධිචෝදනා ගොනුකිරීමටද මේ වනවිට කටයුතු කොට ඇත.
