කුමාරිකා සහ බේබි ශෙරමි නේපාලයට

ශ්‍රී ලාංකේය හදවත් දිනූ ළමා නිෂ්පාදන සහ හිසකෙස් සත්කාර සන්නාම වන බේබි ශෙරමි සහ කුමාරිකා සන්නාම නේපාල වෙළඳපොළට හඳුන්වා දීමට හේමාස් කන්සියුමර් බ්‍රෑන්ඞ්ස් සමාගම පසුගියදා කටයුතු කළේය. නේපාලයේ එවරස්ට් හෝටලයේදී පැවති එම අවස්ථාව සඳහා නේපාලයේ හිටපු අගමැති ජාලා නාත් ඛනල්, හේමාස් මැනුෆැක්චරින් සමාගමේ කළමනාකාර අධ්‍යක්ෂ රෝයි ජෝසප්, නේපාලයේ හේමාස් බ්‍රෑන්ඞ්ස් විධායක බෙදාහැරුම්කරු හජුර්ලායි නමස්තේ ටේ්‍රඞ් ලින්ක් සමාගමේ සභාපති ටාරා බහධුර් කුන්වාර් ඇතුළු සම්භාවනීය අමුත්තෝ රැසක් සහභාගි වූහ.

“නේපාලය දක්වා අපගේ නාමය ව්‍යාප්ත කිරීමට හැකි වීම පිළිබඳවත්, අපගේ සන්නාම නේපාල ජනතාව වෙත බෙදා හැරීම සඳහා නිවැරදිම හවුල්කරු සමඟ අත්වැල් බැඳ ගැනීමට හැකි වීම පිළිබඳවත් අප බෙහෙවින් සතුටු වනවා. ශ්‍රී ලංකාව, බංග්ලාදේශය, ඉන්දියාව, මාලදිවයින සහ තවත් රටවල් රැසක පාරිභෝගිකයන් අත්විඳින අපගේ නිෂ්පාදනවල යහගුණය නේපාල ජනතාවට අත්විඳීමට අවස්ථාව මෙමඟින් උදා වනවා. ශ්‍රී ලංකාවේ පාරිභෝගික ජනතාවගේ නොමඳ විශ්වාසය දිනාගත් සන්නාම ආසියානු කලාපය තුළ ව්‍යාප්ත කිරීමේ සහ වෙනත් විශාල වෙළෙඳපොළ තුළ ඇති අවස්ථා පුළුල් කිරීමේ අපගේ ක්‍රමෝපායික සැලසුමේ තවත් ඉදිරි පියවරක් ලෙස මෙම ව්‍යාප්ත කිරීම සිදු කිරීමට අප කටයුතු කළා. ඉහළ ඉල්ලුමක් ඇති සන්නාම මඟින් නව වෙළෙඳපොළ වෙත පිවිසීමට අමතරව, හේමාස් මැනුෆැක්චරින් සමාගම ඉන්දියාවේ බටහිර බෙංගාලය වෙත කුමාරිකා හෙයාර් ඔයිල් නිෂ්පාදන මෙහෙයුම් කටයුතු ව්‍යාප්ත කිරීමටද කටයුතු, කර තිබේ” යනුවෙන් හේමාස් මැනුෆැක්චරින් සමාගමේ කළමනාකරණ අධ්‍යක්ෂ රෝයි ජෝසප් මහතා සඳහන් කළේය.