වේදිකාවේ, පුංචි තිරයේ විතරක් නෙවෙයි සිනමාවෙත් සුවිශේෂ චරිත නිරූපණය කළ ජනප්රිය චරිතයක් වුණු මදුෂාන් නානායක්කාරට 2026 වසර ආරම්භයත් සමග හදිසි අනතුරකට මුහුණ දෙන්න සිදුවුණා. ඉතින් ඔහුගේ සුවදුක් විමසා බලන්න ‘හාට්’ අපි ඔහුව සම්බන්ධ කරගත්තේ මේ විදියට.Sri Lanka Latest News
දැන් කොහොමද මදුෂාන්?
දැන් නම් විවේකීව ගෙදරට වෙලා ඉන්නවා. මාස දෙකක්වත් ගෙදරට වෙලා ඉන්න වෙයි කියලා තමයි වෛද්යවරුන් උපදෙස් දුන්නේ.
ඇත්තටම මොකක්ද මේ සිදුවුණු අනතුර?
පසුගිය මාසේ අන්තිම එක දිගට ‘යතුරු හිල’ අලුත්ම වේදිකා නාට්යයේ පුහුණුවීම් කටයුතු යොදාගෙන තිබුණා. ‘යතුරු හිල’ වේදිකා නාට්යයේ සියලු දෙනාම ඒ වෙනුවෙන් උපරිම කාලය වෙන්කරලා තිබුණේ. ජනවාරි 01 වැනිදා දවසේ ‘යතුරු හිල’ නාට්යයේ පුහුණුවීම්වලට යන අතරතුර දවාලේ තමයි මේ අනතුර සිදුවුණේ. පාරේ තිබුණු ගලකට මම ගිය යතුරුපැදිය ලිස්සලා පෙරළුණා. ඒ වෙලාවෙ නම් මට දැනුණේ මාව කවුරු හරි ඇදලා ගත්තා වගේ. කොට්ටාව හරියෙදි තමයි මේ අනතුර සිදුවුණේ. ඒ වෙලාවෙම අවට සිටි සියලු දෙනා මට කළ හැකි උපරිම සත්කාර කරලා මාව කොළඹ ජාතික රෝහලට රැගෙන ගියා. වෛද්ය පරීක්ෂණවලින් දැනගන්න ලැබුණා දකුණු අතේ උරහිස කැඩිලා ඉල ඇට තුනක් විතර බිඳිලා කියලා.
මේ අනතුර නිසා ‘යතුරු හිල’ වේදිකා නාට්යයේ වැඩ කල් ගියාද?
මමත් ගොඩක් ආශාවෙන් තමයි පුහුණුවීම් සඳහා ගියේ. නාට්යය වේදිකාගත කරන්න තිබුණේ ජනවාරි 04 වැනිදා. මගේ වේදනාවට වඩා මට දැනුණු ලොකුම වේදනාව මේ නාට්යය ගැන. මොකද ඒ සඳහා දායක වුණු ශිල්පීන්ගේ කාලය, ධනය, කැපකිරීම මිල කරන්න බැහැ. අවසානයේ මගේ චරිතයට සසිත දියමන්ත තෝරාගෙන ඉතා අඩු කාලයක් තුළ ඔහු පුහුණුවීම් කරලා ඒ සියලු අභියෝග භාරගෙන සියලු දෙනා යතුරු හිල වේදිකාගත කරලා තියෙනවා. මට ඒ ගැන ගොඩක් සතුටුයි. කොහොම හරි අවසානයේ මට යතුරු හිලෙන් බලන්න බැරි වුණා.
භාරගත්ත අනෙකුත් නිර්මාණ කටයුතු?
මේ දවස්වල මම ඉන්න ඩ්රාමා එකක් විදියට බුද්ධික සේමසිංහගේ ‘හිතාගන්න බැරි කතාවක්’ ටෙලිනාට්යයේ රූගත කිරීම් සඳහා මම දින දීලා තිබුණේ. අවසානයේ බුද්ධික මට කිව්වේ උඹ මුලින් සනීප වෙලා වරෙන් පස්සේ ගේමක් ගහමු කියලා.
හිතවතුන් බොහෝ දෙනෙක් ඔබේ සුවදුක් බලන්න ආවා කියලා ආරංචියි?
අනේ ඔව්, වැල නොකැඩී ආවා. මට අනතුරක් වෙලා කියලා දැනගත්ත ගමන් මුලින්ම ආවේ සුදර්ශන බණ්ඩාර. දන්න කියන බොහෝ පිරිසක් ආවා. එන්න බැරි වුණත් හැමෝම දුරකතනයෙන් හරි කතා කරලා මගේ සුවදුක් සොයා බැලුවා. මම මුදල්වලට වඩා මිනිස්සු තමයි හම්බ කළේ. සම්මානවලට වඩා මේ විඳින ආදරණීය ජනතාවගේ සම්මානය මට බොහොම වටිනවා. අපි කරන රස්සාවේ වටිනාම දේ තමයි මේ ආදරය.
මුදල් තරම් වටිනා දෙයක් තවත් නැහැ නේද?
මට ජීවත් වෙන්න යම් මුදලක් තිබුණාම ඇති. මුදල් පසුපස හඹාගියා නම් මම අද කෝටිපතියෙක් වෙලා. මම රඟපාපු සමහර නිර්මාණවල මුදල් දෙන්නත් තියෙනවා මට. ඒ අය තේරුම් ගන්නේ නැහැ අපි ජීවත් වෙන්නේ මේ වෘත්තියෙන් කියලා. නිර්මාණ කළොත් විතරයි අපිට ජීවත් වෙන්න හරි කීයක් හරි හොයාගන්න පුළුවන්. ඒ දේවල් නැති වුණාම කලකිරීමක් නැතුවාම නෙවෙයි. කලකිරීමෙන් චරිතයක් කරනකොට කරන වැඩේවත් හරියට කරගන්න බැහැ.
බිරිඳගෙන් ඔබට ලැබෙන සහාය කොහොමද මේ දවස්වල?
මගේ බිරිඳ මට අම්මා කෙනෙක් වගේ. ඇය මේ වෙලාවේ මගේ හෙවණැල්ල වගේ මගේ ළඟ ඉඳගෙන මට නැගිටින්න දෙන ශක්තිය ගොඩක් වටිනවා. මගේ ජීවිතයේ වාසනාවකට ලැබුණු බිරිඳක්. මගේ කැත කුණු අතගාමින් මට මේ වෙලාවේ කරන උපකාරයට ඇය දේවතාවියක් කියලයි මට හිතෙන්නේ.
වසන්ත විතාරණගේ
