හඬ පෞරුෂයෙන් රසික හදවත් අමන්දානන්දයට පත්කරමින්, තමන්ටම අනන්ය වූ ගායන ශෛලියකින් යුග ගණනාවක් රසිකයන් පිනවූ මේ අපූරු කලාකරුවා, කිසිදා නොමියෙන ගීත එකතුවක් සිංහල සංගීත කලාවට තිළිණ කළ ප්රවීණ ගායන ශිල්පී චන්ද්රසේන හෙට්ටිආරච්චියි. මේ ඔහුගේ සංගීත චාරිකාවේ අතීත මතක සහ වර්තමානය පිළිබඳ ‘හාට්’ අපි කළ කතාබහකි.Sri Lanka Latest News
මුලින්ම කියමු මේ දවස්වල ඔබේ ජීවිතය ගෙවෙන්නේ කොහොමද කියලා?
ඇත්තටම මේ දවස්වල හරිම කාර්යබහුලයි. සංගීත සංදර්ශනවලට සහභාගි වෙනවා වගේම අලුත් නිර්මාණ කටයුතුවලත් නිරත වෙනවා. විශේෂයෙන්ම අලුත් පරම්පරාවේ දක්ෂ ශිල්පීන් කිහිප දෙනකුගෙන්ම ඉල්ලීම් ලැබුණා ඔවුන්ට ගීත නිර්මාණය කරලා දෙන්න කියලා. ඒ කටයුතුත් එක්ක මගේම අලුත් නිර්මාණ ගොන්නකුත් ඉදිරියේදී රසිකයන්ට තිළිණ කරන්න සූදානමින් ඉන්නවා.
අතිශය ජනප්රිය සහ දක්ෂ ගායන ශිල්පියෙක් විදියට ආපසු හැරිලා බලද්දී මේ ආපු ගමන ගැන මොකද හිතෙන්නේ?
ඇත්තටම මගේ හදවත පිරිලා තියෙන්නේ ලොකු සතුටකින්. මම ආපු ගමන ලෙහෙසි එකක් නෙවෙයි. පුංචි කාලේ අපේ ගෙදර රේඩියෝ එකක්වත් තිබුණේ නැහැ. සින්දුවක් අහන්න මම යන්නේ හන්දියේ තියෙන කඩපෙළට. හැබැයි දවසක් මගේ තාත්තා මැඩ්ලීන් එකක් අරගෙන ආවා. තාත්තා ඒක වයමින් සින්දු කියනවා බලන් ඉද්දි තමයි මටත් සංගීතයට ආසාවක් ඇතිවුණේ. මගේ සංගීත ජීවිතයේ හැරවුම් ලක්ෂ්යය වුණේ ජාතික තරුණ සේවා සභාවයි. පත්තරේ දැන්වීමක් දැකලා මම ජාතික යොවුන් සම්මාන උළෙලට ඉදිරිපත් වුණා. එහිදී මම ලැබූ ජයග්රහණය නිසා යොවුන් ගීත කණ්ඩායමට ඇතුළත් වෙන්න අවස්ථාව ලැබුණා. ‘ස රි ග ම ප ධ නි ස’ කියන සප්ත ස්වරය හරියටම ඉගෙන ගත්තේ එතැනින්. චන්ද්රසේන හෙට්ටිආරච්චි කියන ගායකයා හැදුණේ ඒ තැනින්.
ඔබේ ආරම්භය ගැන වගේම ඒ මුලින් හැදුණු ගීත ගැනත් මතක් කරමු?
මගේ පළමු පටිගත කළ ගීතය ‘තවලම් අපි යනවා’. ඒකෙන් තමයි රටම මාව අඳුනා ගත්තේ. දෙවැනි ගීතය ‘අම්මා ජීවන උයන්තෙරේ’. අම්මා විඳපු දුක් ගැහැට ගැන ලියවුණු උපහාරයක්. ඉන්පසු ‘සීත කඳු යායේ’ ‘යෙහෙළියක සේ’, ‘කෙලෙසක කීවත්’, ‘මල් මල් විලේ’ වැනි ගීත රාශියක් රසිකයන් ආදරයෙන් වැලඳගත්තා.
ඔබේම පදමාලාවකින් ඔබම සංගීතවත් කරපු ‘මුතු කඳුළින් මා දෙනෙතේ’ ගීතය අදටත් ජනප්රියයි?
‘මුතු කඳුළින් මා දෙනෙතේ’ ගීතය ගැන කිව්වොත්, එහි පද මාලාව සහ සංගීතය දෙකම මගේ. 1989 දී මම මේ නිර්මාණය කළේ තරුණ තරුණියන්ගේ හදවතට දැනෙන වචන එක්කරලා. සැබෑ අත්දැකීමක් පාදක කරගෙන නිර්මාණය වූ ඒ මිහිරි ගීතය අදටත් ජනප්රිය වෙලා තියෙන්නේ ඒ අව්යාජත්වය නිසයි.
මේ ආපු ගමනේ විවිධ හැලහැප්පීම්වලට ඇතිවෙන්න මුහුණදීලා ඇති?
ඕනෑම කෙනෙකුට ඉදිරියට එද්දී හැලහැපීම් බාධක එනවා. මටත් එහෙමයි. ඇතැම් නාලිකා මගේ ගීත ප්රචාරය කළේ නැති කාලවල් තිබුණා. ඒත් මම වැටුණේ නැහැ. හැමදේම ඉවසගෙන ගමන නතර නොකර ආපු නිසයි මම අද මෙතැන ඉන්නේ.
අලුත් පරම්පරාව ගැන මොකද හිතෙන්නේ?
අලුත් පරම්පරාව අනාගතය හදාගන්න අතරතුර තමන් ආපු ගමන සහ අතීතය කවදාවත් අමතක නොකර, නිහතමානීව, හැමෝටම සාධාරණය ඉටුකරමින් ශාස්ත්රානුකූලව ඉගෙනගෙන ඉදිරියට යන්න ඕනේ.
ඉදිරි ගමන ගැනත් කතා කරමු?
මම මෑතකදී චන්ද්රලේඛා පෙරේරා මහත්මිය සමග යුග ගීතයක් ගායනා කළේ නැහැ. ඒ නිසා මේ දිනවල ‘සීතල හිම කඳු නිල්ලේ’ නමින් ඇය සමග අලුත් ගීතයක් නිර්මාණය කරමින් ඉන්නවා. එය නුදුරේදීම එළිදක්වනවා. ඒ වගේම 2028 සැප්තැම්බර් මාසයට මගේ කලා ජීවිතයට වසර 50ක් සපිරෙනවා. ඒ නිමිත්තෙන් මගේ රසිකයන් වෙනුවෙන් දැවැන්ත ප්රසංගයක් පවත්වන්නත් බලාපොරොත්තු වෙනවා.
හිමාෂා නෙත්මිණි
