සෙනාලි ගොඩක් දුකෙන්

ජීවිතයේ සතුට වගේම දුක කියන දේටත් අපි හැමෝටම මුහුණ දෙන්නට සිදුවෙනවා. දෙස් – විදෙස් ප්‍රේක්‍ෂක රැසකගේ ජීවිතයට සතුට, ආදරය හිමිකර දුන්න ජනප්‍රිය රංගන ශිල්පිනියකගේ ජීවිතයටත් පසුගියදා දුක කියන දේ තදින්ම දැනුණා. ඉතින් මෙවන් මොහොතක ඇයට අප ශක්තියක් විය යුතුයි. ඇයගේ දුක, වේදනාව අපි බෙදාගමු. ඒ නිසාම ඇයට කතා කළේ අපි මේ විදියට ඇයගේ දුක ඔබට කියන්නට.
පසුගිය මාස කිහිපය තුළ ඔබගේ ජීවිතය නොහිතපු විදියට කඩාවැටුණා නේද සෙනාලි?
එය ගැන මතක් වෙනකොටත් මට දුකයි. ඒ ජීවිතයට මනුෂ්‍යයෙක් වශයෙන් අපි කවුරුත් මුහුණ දෙන්න වෙනවා. ඉතින් මම මගේ හිතත් ටික ටික හදාගන්නවා. අපේ ජීවිතයට සතුට වගේම දුකත් එන නිසා. මගේ තාත්තා අපේ ජීවිතයෙන් සමුගත්තේ ජනතාව වෙනුවෙන් සේවය කරපු නිසා. ඔහු ඔහුගේ ජීවිතය ගැනවත් නොහිතා කොරෝනා නිසා රෝගී වුණු අය ගැන නිරන්තරයෙන්ම සොයා බලා කටයුතු කළා. ඒත් අවසානයේ ඔහුටත් කොරෝනා රෝගය වැලඳී අපේ ජීවිතයෙන් සමුගත්තා.
ඒ විතරක් නෙවේ ලංකාවට ආපු සැණින් ඔබටත් නිරෝධායනය වීමට සිදුවුණා නේද?
මම එංගලන්තයේ ඉඳලා තමයි ආවේ. ඉතින් ආපු සැණින් මාවත් මගේ අම්මාවත් නිරෝධායනය සඳහා නුවර ගන්නෝරුවට එක්කගෙන ගියා. එහෙත් දවස් 21ක් විතර අපට නිරෝධානය වීමට සිදුවුණා. ඉතින් දැන් ගෙදර නිරෝධානය වෙනවා. මේ යන්නේ අවසාන දවස් කිහිපය.
මේ කොරෝනා වසංගතය ගැන එංගලන්තයේ මොනවගේ සැලකිල්ලක්ද තියෙන්නේ?
ලංකාවේ මේ ප්‍රශ්නය වුණාට පස්සේ තමයි මම එංගලන්තෙට ගියේ. ඉතින් එහෙ ගිහින් බලන කොට ලංකාව ඉතාමත් සුරක්‍ෂිත විදියට තමයි ජනාධිපතිතුමන් ඇතුළු සියලුම කාර්යමණ්ඩල කටයුතු කළේ ජනතාව වෙනුවෙන්. නමුත් එංගලන්තයේ ජනතාව එය ගැන කිසිම සැලකිල්ලක් නැහැ. වෛiවරුන් උපදෙස් දුන්නත් සාමාන්‍ය ජනතාවට අවශ්‍ය විනෝදය පමණයි. ඉතින් රටවල් දෙකේ වෙනස මට හොඳින් දැනුණා.
ඔබව අපි සිනමාවේ දැක්කේ ඓතිහාසික නිර්මාණ හරහා තමයි. ඔබ ‘කබඩි’ චිත්‍රපටය හරහා ප්‍රේක්‍ෂකයන්ට වෙනසක් එකතු කිරීමට සූදානම්?
ඔබ කියන කතාව හරි. ‘සිරි පැරකුම්’ චිත්‍රපටය හරහා තමයි මම සිනමාවට සම්බන්ධ වුණේ. නමුත් හර්ෂ උඩකන්ද අධ්‍යක්‍ෂණය කරන ‘කබඩි’ චිත්‍රපටයේ මම ලොකු වෙනසක් දැක්කා. මගේ චරිතය වෙනසක් නොවුණත් එහි තිබෙන කතා තේමාව, සටන් ජවනිකා සියල්ලත් එක්ක මගේ චරිතය ගැන ලොකු වෙනසක් දැනේවි චිත්‍රපටය තිරගත වූ පසු. එයට අමතරව තවත් චිත්‍රපට කිහිපයක් තිරගත වීමට තිබෙනවා.
කලාවට වඩා ඔබේ ජීවිතයට ලොකු බරක් දැන් දැනේවි නේද?
ඒ ශක්තිය මට දැනිලා ඉවරයි. පවුලේ බර දැන් මට තමයි ගෙනියන්න වෙන්නේ. මොකද මගේ පවුලට දුවටත්, පුතාටත් මම විතරයි හිටියේ. පොඩි කාලේ ඉඳලා මගේ මවුපියන් මාව පුතෙක් වගේම, දුවෙක් විදියට තමයි හැදුවේ. මම මේ ක්‍ෂේත්‍රයට සම්බන්ධ වුණේ ආශාව නිසා තමයි. දැන් ඒ ආශාවන් එක්ක මට කරන්න වගකීම් රැසක් තිබෙනවා. දැන් අලුත් සෙනාලි ෆොන්සේකා කෙනෙක් විදියට තමයි කටයුතු කරන්නේ.
ඔබ මේ ක්‍ෂේත්‍රයට පය තිබ්බේ සිනමා තාරකාවියක් විදියට යන්න තමයි. නමුත් අපි එහි වෙනසක් දකිනවා?
එහෙම තමයි හිතාගෙන හිටියේ. ලංකාවේ චිත්‍රපට කර්මාන්තයක් තිබෙනවා. නමුත් ඉන්න පිරිසත් එක්ක හැදෙන කතා අඩුයි. ඉතින් එකම රැල්ලේ චිත්‍රපට බිහිවෙනවා. ඒ හරහා අපිත් කොටුවෙනවා. ඉතින් ඒ නිසාම තමයි මම ටෙලිනාට්‍ය ක්‍ෂේත්‍රයේ හොඳ නිර්මාණ කිරීමට යොමුවුණේ. මට ඕනෑ වෙනස් විදියේ චරිත කරන්නයි.
වසන්ත විතාරණගේ