අපේ ජනප්රිය කලා ශිල්පීන් කවුරුන් හෝ කාලෙන් කාලෙට මොකක් හරි හේතුවක් හරහා සමාජ මාධ්යවල වයිරල් වෙන එක දැන් පුරුද්දක් වෙලා. පහුගිය දවස්වල ඒ සංගදියට මුහුණ දුන්නේ ප්රවීණ ජනප්රිය ගායිකා නිරෝෂා විරාජිනී. ඒ වයිරල් වීමට හේතු වුණේ හදිසියේම වාගේ ඈ පැවිදි වූ බව කියමින් එහි අනන්යතාවද ඔප්පු කරමින් ඡායාරූපද සමග පළවෙන්නට ගත් පුවතක් නිසයි.Sri Lanka Latest News
හිතුවට වැඩිය වයිරල් වෙන එක උණුසුම් වෙනකොට නිරෝෂාත් ටිකක් කලබල වුණා. මේ ගැන ඇගෙන් පොඩි විමසීමක් කරන්න හිතුණු නිසා දුරකතන ඇමතුමක් ගත්තා.
නිරෝෂා කොහොමද ඉතින් සුවදුක්? පොඩ්ඩක් කතා කරන්නයි මේ යන්නේ.
ඒ විදියටයි අපි ඈ සමග කතාවට ආරම්භය හදාගත්තේ.
වරදක් නැහැ. මම හොඳින් සතුටින් මගේ සුපුරුදු කලා කටයුතු එක්ක දවස ගෙවනවා. හැබැයි මේ දවස්වල නම් ඉන්නේ පොඩි අවුලක. දන්නේ නැද්ද ඉතින් මේ සෝෂල් මීඩියාවල කාලෙන් කාලෙට මොකක් හරි වැඩකට නැති ගොසිප් එකක් වයිරල් කරනවනේ. ආරංචි ඇති නේද?
ඔව්. ඒ ගැන නොදන්නෙ කවුද? මොකක්ද නිරෝෂා ඇත්තටම ඔය සංගදිය?
මටත් තේරෙන්නේ නැහැ ඇත්තටම මේ මොකක්දැයි කියලා කියන්න. කිසිම හේතුවක් නැතුව අබමල් රේණුවක ඉඟියක් නැතුව මම මහණවෙලා කියලා. ඇත්තටම ඒක පේන විදියට පින්තූර වීඩියෝ එහෙමත් හදලා අමූලික මුසාවක් ‘ටේරන්ඩින් වන්’ කියන යූටියුබ් නාලිකාවේ ප්රචාරය වෙනවා. ඇත්තටම මම වුණත් ඒක දැක්කම එක්සයිට් වෙන තරමටයි ඒ වීඩියෝ එක හදලා තියෙන්නේ.
මහණ වුණාය කියන වෙනස්ම සිදුවීමක් මෙයාලා මේ විදියට හේතුවක් කරගත්තේ මොන විදියේ කාරණයක් හිතේ තියාගෙනද කියන්න මට තේරෙන්නේ නෑ ඇත්තටම.
කාගෙ හෝ ඉගැන්නුම් බහකට උසිගැන්වීමකට කළා වෙන්න බැරිද?
නැහැ. එහෙම දෙයක් වෙලා නැහැ. අනෙක මම කා එක්කවත් හතුරුකම් හදාගෙන නැහැ. මේ වගේ දේකට ප්රධානම හේතුව තමයි අද සමාජ මාධ්යවල කිසිම නීතියක් විනයක් සදාචාරාත්මක බවක් නැති වීම. ඒ නිසයි යූටියුබර්ස්ලා මේ විදියට කලාකරුවන්ගේ පුද්ගලිකත්වය සල්ලිවලට අලෙවි කරන්නේ. හොඳ විදියට නිර්මාණශීලීව යූටියුබ් චැනල් කරන කලාකාමී පිරිසක් ඉන්නවා. ඒ අතර මේ වගේ වෙනස් මානසිකත්වයක් තියෙන පිරිසකුත් ඉන්නවා.
මෑතකදී ආපු ඒඅයි තාක්ෂණය උපයෝගී කරගෙන තමයි මේ අය මම මහණ වෙච්ච වීඩියෝ දර්ශන හදලා තියෙන්නේ. ඒ වීඩියෝ එක බලන කෙනකුට ඒක බොරු ඕපාදූපයක් හෝ විකෘති කරලා හදපු එකක් බව නොපෙනෙන්නයි හුඟක්ම සූක්ෂ්ම විදියට මේ වැඩේ කරලා තියෙන්නේ.
ඒඅයි වැනි තාක්ෂණයක් රටට විනාශයක් කියලද ඔබ කියන්නේ?
හැමදේකම හොඳ සහ නරක කියන පැති දෙකක් තියෙනවා. විශේෂයෙන්ම ඒඅයි වැනි තාක්ෂණයන්ට ඒක ආවේණිකයි. එතැනදී ඒක භාවිතයට අරගෙන යම් නිර්මාණයක් සාර්ථකව කරනවා කියන එක හොඳ නිර්මාණශීලී හැකියාවක්. හැබැයි ඒ හැකියාව හරහා අනුන්ගේ පුද්ගලිකත්වයට හානි කරන දේ කරන්න නරකයි. ඒක මහත්මා ගතියක් නෙවෙයි. මගෙ නමයි රූපයයි අමු අමුවේ පාවිච්චි කරලා මේ කරලා තියෙන්නේ මගෙ තුන් හිතකවත් තිබුණේ නැති සිදුවීමක් බොරුවක් මායාවක් විදියට වයිරල් කරපු එකනේ.
ඇත්තටම කියනවා නම් ඒඅයි තාක්ෂණය පාවිච්චියට අරගෙන කලාකරුවන්ටයි, නමක් හදාගත්ත වෙනත් පුද්ගලයන්ටයි මේ රටේ තරම් අයහපත් නිර්මාණ කරපු රටක් මේ ලෝකෙ කොහේවත් නැතිව ඇති මම හිතන්නේ.
නිරෝෂා ඔබ තදින්ම කලකිරිලා වගේ ඉන්නේ?
ඇත්තටම මේ වගේ දේවල් ගැන ලොකු කලකිරීමක් තමයි දැනෙන්නේ.
ඔබට තිබුණා ඔවුන්ට කෙළින්ම මේ ගැන කතා කරන්න?
මම කතා කළා. බොහොම හොඳින් කතා කළා. ඉල්ලීමකුත් කළා. මේ වීඩියෝ එක අයින් කරන්න. මේක හොඳ දෙයක් නෙවෙයි කියලා පැහැදිලි කළා. ඒත් ඔවුන් එය කනකට ගත්තේ නැහැ. ඒ ඉල්ලීමෙන් පසුවත් දවස පුරාම වීඩියෝ එක වයිරල් වුණා. ඇත්තටම හිතට මහා කලකිරීමක් දැනුණා.
නීති මාර්ගයට ගියේ ඉන් පසුවද?
ඔව්. හොඳින් කියලා බැරිම තැන මම නීති මාර්ගයෙන් මේ වැඩේ නවත්තන්න කටයුතු කරගෙනයි යන්නේ. ඔවුන්ට තිබුණා මං කියපු විදියට මේ වීඩියෝ එක අයින් කරලා එයාලා කරපු වරද වෙනුවෙන් නිවැරැදි කිරීමක් කරන්න කියලා. ඒත් මං දන්නේ නැහැ ඇයි කියන්න. ඔවුන් එය තඹ සතේකටවත් මායිම් කළේ නැහැ. එයින් පසුවත් ඔවුන් ඒ වීඩියෝව සමාජ මාධ්ය පුරා සංසරණය වෙන්න ඇරියා.
ඔබේ ප්රතිරූපයට හානියක් කිරීමේ යටි අරමුණක් මෙහි ඇති බවක් හැඟෙනවද?
තේරුම් ගන්න අමාරුයි. මේ වෑයම මොකක්ද කියලා. කොහොමත් මම නීතිමය පියවර ගත්තා. එය මට නොකර බැරි වුණා.
නීතිමය පියවර ගැනීම ගැන ඔබ ඉන්නේ කම්පාවකද?
කොහොමවත් නැහැ. අනෙක මම එය කළේ මා වෙනුවෙන්ම පමණකුත් නෙවෙයි. සමාජ මාධ්ය හරහා අපහසුතාවට පත්වන කලාකරුවන් හැමෝම වෙනුවෙනුයි මම මේ පියවර ගත්තේ.
ඒ අතර මට ආදරය කරන රසික රසිකාවියන්ගෙන්ද මම ඉල්ලා සිටියා මෙම වීඩියෝවේ සංසරණයට විරුද්ධව කමෙන්ට් කරන්න රිපෝර්ට් කරන්න කියලා. ඒ හරහා මෙවැන්නන්ට තවදුරටත් මෙවැනි අශෝභන වැරැදි වැඩ මින් ඉදිරියට කරන්න බැරි වේවි.
පැවිදි වීමක් වැනි සිදුවීමක් ඔවුන් මේ සඳහා යොදාගත් හේතුව?
හිතාගන්න බැරි ඒකයි මටත්. මොකද පැවිදි වීම පූජනීය දෙයක් වුණත් මහණ වෙන්න අදහසක් මගේ හිතේ කොනකවත් නැහැ. මට මේ ජීවිතය හොඳයි. මම සතුටින් කල් ගෙවනවා.
මල්මි කෞෂල්යා
